¶ 1 BEA nae folofola a Jihova kia Mosese, o behe,

2 Koeni foki, ke ke lea ki he fānau a Isileli, Koia fulibe i he fānau a Isileli, be i he kau muli oku aunofo i Isileli, oku ne foaki hono hako kia Moleki; koe mooni e tamate‘i ia: e tologaki ia aki ae maka e he kakai oe fonua.

3 Bea teu fakahagatonu hoku fofoga ki he tagata koia, ke motuhi ia mei hono kakai: koe mea i he ene foaki a hono hako kia Moleki, ke uli‘i hoku fale tabu, mo fakaogokovi‘i hoku huafa maonioni.

4 Bea kabau oku fufu ho nau mata e he kakai oe fonua mei he tagata, i he ene foaki hono hako kia Moleki, bea ikai tamate‘i ia;

5 Bea teu fakahaga hoku fofoga ki he tagata koia, bea ki hono fale, bea ko ia, mo kinautolu kotoabe oku fai hala o muimui iate ia, ke fai agahala mo Moleki, teu motuhi mei ho nau kakai.

¶ 6 Bea koia oku tafoki kiate kinautolu oku vaka ai ae gaahi laumalie uli, moe kau taula fakafaahikehe, ke alu holi kovi kiate kinautolu, teu fakahaga mooni hoku fofoga ki he tagata koia, bea teu motuhi ia mei hono kakai.

¶ 7 Koia mou fakamaonioni‘i akimoutolu, bea ke mou maonioni: he ko au ko Jihova ko ho mou Otua.

8 Bea ke mou tauhi eku gaahi fekau o fai ki ai: Ko au ko Jihova oku ou fakamaonioni‘i akimoutolu.

¶ 9 He koia kotoabe oku kabe‘i ene tamai be ko ene fa‘e, koe mooni e tamate‘i ia: kuo ne kabe‘i ene tamai be ko ene fa‘e; bea e iate ia be hono toto.

¶ 10 Bea koe tagata oku tono‘i ae unoho oe tagata e toko taha, io, koia oku tono‘i ae unoho o hono kaugaabi, koe tagata tonofefine moe fefine tonotagata, e tamate‘i mooni akinaua.

11 Koe tagata oku mohe moe unoho o ene tamai kuo fakatelefua eia a ene tamai: e tamate‘i akinaua fakatouoji be; e iate kinaua ho na toto.

12 Bea kabau e mohe ae tagata mo hono ofefine i he fono, e tamate‘i akinaua fakatouoji be: kuo na fai fakamaveuveu; e iate kinaua ho na toto.

13 Bea kabau e mohe ha tagata moe tagata, o hage ko ene mohe moe fefine, kuo na fai fakalielia fakatouoji be; ke tamate‘i mooni akinaua; e iate kinaua ho na toto.

14 Bea kabau oku omi e ha tagata mo hono unoho ae fa‘e a hono unoho ke na unoho, koe mea kovi ia: e tutu akinautolu aki ae afi, aia mo kinaua; koeuhi ke oua naa ai ha kovi iate kimoutolu.

15 Bea kabau e mohe ha tagata moe manu, e tamate‘i mooni ia: bea ke mou tamate‘i ae manu.

16 Bea kabau e unuunu atu ha fefine ki ha manu, bea tokoto ki ai ia, e tamate‘i ae fefine, moe manu: e tamate‘i mooni akinaua; e iate kinaua ho na toto.

17 Bea kabau e ave e ha tagata hono tuofefine, koe ofefine o ene tamai, be koe tama a ene fa‘e, o mamata ki he ene telefua, bea mamata ia ki he ene telefua aana; koe mea kovi ia: bea e motuhi akinaua i he ao o ho na kakai: kuo tatala o fakatelefua a hono tuofefine; e fua eia ene hia.

18 Bea kabau e mohe ha tagata moe fefine oku iate ia hono mahaki, bea tatala hono mahaki; kuo ne fakatelefua hono mahaki, bea kuo tatala eia ae mata o hono toto: bea e motuhi akinaua fakatouoji mei ho na kakai.

19 Bea oua naa ke fakatelefua ae tokoua o hoo fa‘e, be koe tuofefine o hoo tamai: he koia oku ne  fai behe oku fakatelefua hono kaiga ofi: te na fua e na hia.

20 Bea kabau e mohe ha tagata moe unoho oe tokoua o ene tamai, kuo fakatelefua eia a hono tuajina: te na fua e na agahala: te na mate tae ha fānau.

21 Bea kabau e ma‘u e ha tagata ae unoho a hono tokoua, koe mea tae maa ia: kuo fakatelefua a hono tokoua; te na mate tae ha fānau.

¶ 22 Koia ke mou tauhi ai eku gaahi tuutuuni ni, mo eku gaahi fekau, o fai ki ai: telia naa lua aki akimoutolu e he fonua oku ou omi akimoutolu ki ai.

23 Bea e ikai te mou fai ki he gaahi aga oe buleaga, aia oku ou kabuji mei ho mou ao: he kuo nau fai ae gaahi mea ni, bea koia kuou fehia ai kiate kinautolu.

24 Ka kuou lea kiate kimoutolu, Te mou ma‘u ho nau fonua, bea teu atu ia kiate kimoutolu ke mou ma‘u ia, koe fonua oku mahu tafea i he hua huhu moe honi: Ko au ko Jihova ko ho mou Otua, aia kuou vahe‘i akimoutolu mei he kakai kehe.

25 Koia ke mou vahe‘i ae faga manu maa moe tae maa, bea lau kehe ae faga manu tae maa oku kabakau moe maa: bea oua naa mou fakalielia‘i akimoutolu i he manu, be ha manu kabakau, be i ha mea e taha oku totolo i he kelekele, aia kuo vahe‘i ia iate kimoutolu koe tae maa.

26 Bea te mou maonioni kiate au: he ko au Jihova oku ou maonioni, bea kuou fakamavae akimoutolu mei he kakai kehe, koeuhi ke ooku akimoutolu.

¶ 27 Koe tagata foki, be koe fefine oku vaka ai ae laumalie uli, bea koe taula fakafaahikehe, e tamate‘i mooni ia: e tologaki akinautolu aki ae maka: e iate kinautolu ho nau toto.