¶ 1 BEA nae folofola a Jihova kia Mosese, o behe,

2 Lea ki he fānau a Isileli, o behe kiate kinautolu, Koe gaahi katoaga kia Jihova, aia te mou fakaha koe gaahi fakataha maonioni, io, ko eku gaahi katoaga aaku ia.

3 Koe aho e ono e fai ai ae gaue: ka ko hono fitu oe aho koe sabate mālōlō ia, koe fakataha maonioni; oua naa mou fai ai ha gaue e taha; he koe aho tabu ia o Jihova i ho mou gaahi fale kotoabe.

¶ 4 Koe gaahi katoaga eni a Jihova, io, ae gaahi katoaga maonioni, aia te mou fanogonogo i ho nau gaahi faahita‘u.

5 I he efiafi o hono hogufulu ma fa oe  aho oe uluaki mahina, koe lakaatu o Jihova ia.

6 Bea i hono hogofulu ma nima oe aho i he mahina koia, koe katoaga kai ma tae fakalevani kia Jihova; ke mou kai ma tae fakalevani i he aho e fitu.

7 Ke mou fai ae fakataha maonioni i he uluaki aho: oua naa fai ha gaue faiteliha i ai.

8 Ka mou atu ae feilaulau kuo gaohi aki ae afi kia Jihova i he aho e fitu: ko hono fitu oe aho koe katoaga maonioni; oua naa mou fai ha gaue faiteliha i ai.

¶ 9 Bea nae folofola a Jihova kia Mosese, o behe,

10 Lea ki he fānau a Isileli, o behe kiate kinautolu, Oka mou ka hoko atu ki he fonua oku ou foaki kiate kimoutolu, bea oku mou tuuji hono gaahi fua, te mou toki omi ae faluku e taha oe uluaki fua o hoo goue ki he taulaeiki:

11 Bea e taaloalo aki eia ae faluku oe koane i he ao o Jihova, ke ma‘u ia koeuhi ko koe: i he bogibogi i he hili ae sabate e taaloalo aki ia e he taulaeiki.

12 Bea te mou atu i he aho koia oku mou taaloalo aki ae faluku oe koane, ae lami tagata tae hano mele i hono uluaki ta‘u, koe feilaulau tutu kia Jihova.

13 Bea koe feilaulau meakai o ia koe oma e ua oe mahoaa lelei moe lolo, koe feilaulau kuo gaohi aki ae afi kia Jihova, koe mea namu kakala; bea koe feilaulau inu o ia koe uaine, ko hono fa oe vahe oe hini.

14 Bea e ikai te mou kai ae ma be koe uite tunu, be koe fua mata, kae oua ke hokojia ae aho koia oku mou omi ai ha feilaulau ki ho mou Otua: koe fekau fai mau ia i ho mou gaahi toutagata i ho mou gaahi nofoaga kotoabe.

¶ 15 Bea ke mou lau kiate kimoutolu mei he bogibogi i he hili ae sabate, mei he aho naa mou omi ai ae faluku oe feilaulau ke taaloalo aki; e katoa ae sabate e fitu:

16 Io, o hoko moe bogibogi i he hili hono fitu oe sabate ke mou lau ae aho e nimagofulu; bea ke mou atu ae feilaulau foou oe mea kai kia Jihova.

17 Ke mou omi mei ho mou gaahi fale ae foi ma taaloalo e ua oe oma e ua: e gaohi aki ia ae mahoaa lelei; e ta‘o ia moe levani; koe uluaki fua ia kia Jihova.

18 Bea ke mou atu fakataha moe ma ae lami e fitu tae ha nau mele, i he uluaki ta‘u, moe bulu mui e taha, moe sibi tagata e ua: koe feilaulau tutu ia kia Jihova, fakataha moe nau gaahi feilaulau meakai, moe feilaulau inu, io, koe feilaulau kuo gaohi aki ae afi, koe mea namu kakala kia Jihova.

19 Bea ke mou feilaulau aki ae uhiki‘i koji e taha koe feilaulau ma ae agahala, moe lami e ua oe uluaki ta‘u koe feilaulau fakamelino.

20 Bea e taaloalo aki ia e he taulaeiki fakataha moe ma oe uluaki fua, moe ogo lami koe feilaulau taaloalo i he ao o Jihova; e maonioni ia kia Jihova ma ae taulaeiki.

21 Bea ke mou fanogonogo i he aho be koia, ke iate kimoutolu ia koe fakataha maonioni; oua naa mou fai ha gaue faiteliha i ai: koe fekau fai mau ia i ho mou gaahi fale nofoaga kotoabe i ho mou toutagata kotoabe.

¶ 22 Bea oka ke ka tuuji ae gaahi fua o ho fonua, o ikai te ke fetuku ke oji mei he gaahi tuliki o hoo goue oka ke ka tuuji ia, bea e ikai te ke tanaki ae toega o hoo fua: ka te ke tuku ia ki he majiva, bea ki he muli: Ko au ko Jihova ko ho mou Otua.

¶ 23 Bea nae folofola a Jihova kia Mosese, o behe,

24 Lea ki he fānau a Isileli, o behe, I hono fitu oe mahina, i he uluaki  aho oe mahina, e iate kimoutolu ae sabate, koe fakamanatu oe ifi mea lea, koe fakataha maonioni.

25 E ikai te mou fai ha gaue faiteliha i ai: ka te mou atu ae feilaulau kuo gaohi aki ae afi kia Jihova.

¶ 26 Bea nae folofola a Jihova kia Mosese, o behe,

27 I hono hogofulu foki oe  aho o hono fitu mahina ni e ai ae aho oe fakalelei: koe aho ia oe fakataha maonioni kiate kimoutolu; bea ke mou fakamamahi ho mou laumalie, bea atu ha feilaulau kuo gaohi aki ae afi kia Jihova.

28 Bea e ikai te mou fai ha gaue i he aho koia: he koe aho ia oe fakalelei, ke fai ai ae fakalelei maa moutolu i he ao o Jihova ko ho mou Otua.

29 He koia oku ikai fakamamahi‘i ia i he aho koia, e motuhi ia mei hono kakai.

30 Bea koia e fai ha gaue i he aho koia, teu tamate‘i ia mei hono kakai.

31 E ikai te mou fai ha momoi gaue; koe fekau fai mau ia i ho mou gaahi toutagata i ho mou gaahi nofoaga kotoabe.

32 E iate kimoutolu ia koe sabate oe mālōlō, bea te mou fakamamahi ho mou laumalie: i hono hiva oe  aho oe mahina i he efiafi, mei he efiafi o a‘u ki he efiafi, ke mou tauhi ho mou sabate.

¶ 33 Bea nae folofola a Jihova kia Mosese, o behe,

34 Lea ki he fānau a Isileli, o behe, Ko hono hogofulu ma nima oe  aho i hono fitu mahina ni e hoko ia koe katoaga kia Jihova oe gaahi fale fehikitaki, i he aho e fitu.

35 I he uluaki aho ke mou fai ae fakataha maonioni; oua naa mou fai ha gaue faiteliha i ai.

36 Koe aho e fitu ke mou atu ai ae feilaulau kuo gaohi aki ae afi kia Jihova: i hono valu oe aho ke mou fai ae fakataha maonioni: bea te mou atu ae feilaulau kuo gaohi aki ae afi kia Jihova: koe fakataha mamalu: bea e ikai te mou fai ha gaue faiteliha i ai.

37 Koe gaahi katoaga eni a Jihova, aia ke mou fakaha koe gaahi fakataha maonioni, ke atu ai ae feilaulau kuo gaohi aki ae afi kia Jihova, koe feilaulau tutu, moe feilaulau meakai, moe feilaulau mea inu, taki taha be i hono aho:

38 Kae umaa foki ae gaahi sabate o Jihova, bea mo hoo mou gaahi foaki, mo hoo mou gaahi fuakava, moe gaahi feilaulau oku fai loto lelei be, aia oku mou foaki kia Jihova.

39 Bea i hono hogofulu ma nima foki oe aho i hono fitu oe mahina, hili hoo mou tanaki ae fua oe fonua, ke mou fai ha katoaga kia Jihova i he aho e fitu: ko hono uluaki aho, koe sabate ia, bea ko hono valu oe aho e sabate mo ia.

40 Bea te mou fili ekimoutolu ae gaahi vaa oe akau matamatalelei, ae gaahi vaa boga, moe gaahi vaa oe akau lalahi, moe gaahi uilou oe vaitafe; bea te mou fiefia i he ao o Jihova ko ho mou Otua i he aho e fitu.

41 Bea ke mou tauhi ia koe katoaga kia Jihova i he aho e fitu i he ta‘u. Koe fekau fai mau ia i ho mou gaahi toutagata: ke mou fai ia i hono fitu oe mahina.

42 Ke mou nofo i he gaahi fale louakau i he aho e fitu; ko kinautolu kotoabe kuo fanau‘i koe Isileli e nofo ia i he fale louakau:

43 Koeuhi ke ilo e ho mou gaahi toutagata naaku bule‘i ae fānau a Isileli ke nofo i he gaahi fale fehikitaki, i he eku omi akinautolu mei he fonua ko Ijibite: Ko au ko Jihova ko ho mou Otua.

44 Bea nae fakaha e Mosese ki he fānau a Isileli ae gaahi katoaga a Jihova.