¶ 1 BEA nae folofola a Jihova kia Mosese i he mouga ko Sainai, o behe,

2 Lea ki he fānau a Isileli, mo ke behe kiate kinautolu, Oka mou ka hoko atu ki he fonua aia oku ou foaki kiate kimoutolu, e toki fai ai e he fonua ae sabate kia Jihova.

3 Koe ta‘u e ono ke ke to ai hoo goue, moe ta‘u e ono ke ke auhani hoo goue vaine, o tanaki hono fua;

4 Ka ko hono fitu oe ta‘u koe sabate ia ke mālōlō ai ae fonua, koe sabate ia kia Jihova: oua naa ke to ai hoo goue, be auhani hoo goue vaine.

5 Koia oku tubu iate ia be i he gaahi fua o hoo ta‘u oua naa ke tuuji, be toli ae gaahi kalebi oe vaine tae auhani; he koe ta‘u mālōlō ia ki ho fonua.

6 Bea koe sabate oe fonua koe mea kai ia maa moutolu; kiate koe, bea ki hoo tamaioeiki, bea ki hoo kaunaga, bea ki hoo tamaioeiki uga gaue, bea ki he muli oku aunofo kiate koe,

7 Bea ki hoo faga manu lahi, bea ki hoo faga manu i ho fonua kotoabe, koia kotoabe oku tubu koe meakai ia kiate kinautolu.

¶ 8 Bea ke lau kiate koe ae sabate e fitu oe gaahi ta‘u; koe ta‘u e fitu lau e fitu; bea ko hono lau oe sabate e fitu oe gaahi ta‘u koe ta‘u e fagofulu ma hiva.

9 Bea te ke toki fekau ke ifi ae mea lea oe jiubeli i hono hogofulu oe  aho i hono fitu oe mahina, i he aho oe fakalelei ke mou fakaogo atu ae mea lea i ho mou fonua kotoabe.

10 Bea ke mou fakatabu‘i hono nimagofulu oe ta‘u, o fakaha ae huhui i he fonua kotoabe ki hono kakai kotoabe; e iate kimoutolu ia koe jiubeli: bea e toe hoko ae tagata taki taha kotoabe ki hono abi, bea e toe ha‘u taki taha ae tagata ki hono fale.

11 Koe nimagofulu ta‘u koia e iate kimoutolu ia koe jiubeli: oua naa mou tūtū‘i, be tuuji aia oku tubu iate ia be, be tanaki mei he vaine oku tae auhani.

12 He koe jiubeli ia; e maonioni ia kiate kimoutolu: te mou kai a hono fua o ia mei he goue be.

13 Bea i he ta‘u oe jiubeli ni e toe ha‘u ae tagata taki taha kotoabe ki hono tofia.

14 Bea kabau oku ke fakatau ha mea ki ho kaugaabi, be fakatau ha mea meiate ia, oua naa mou fefakamamahi aki akimoutolu:

15 Ke ke fakatau mei ho kaugaabi o fakatatau ki hono lau oe ta‘u i he hili ae jiubeli, bea te ne fakatau kiate koe o fakatatau ki hono lau oe ta‘u o hono gaahi fua:

16 Te ke fakalahi a hono totogi o fakatatau mo hono lahi oe ta‘u, bea ke fakajiijii hono totogi o fakatatau ki hono jii oe ta‘u: he oku ne fakatau ia kiate koe o fakatatau ki hono lau oe ta‘u o hono fua o ia.

17 Koia oua naa mou fefakamamahi aki akimoutolu; ka ke manavahe ki ho Otua; he ko au ko Jihova ko ho mou Otua.

¶ 18 Koia ke mou fai eku gaahi fekau, bea tauhi eku gaahi tuutuuni, o fai ki ai; bea te mou nofo malu be i he fonua.

19 Bea e tubu i he fonua hono fua, bea te mou kai o makona, o nofo i ai i he fiemalie.

20 Bea kabau oku mou behe, Koeha te mau kai i hono fitu oe ta‘u? koeuhi e ikai te mau tūtū‘i, be tanaki e mau fua:

21 Teu toki fekau eku tabuaki kiate kimoutolu i hono ono oe ta‘u, bea e tubu i ai ae fua o feouga moe ta‘u e tolu.

22 Bea te mou tūtū‘i i hono valu oe ta‘u, kae kai ae fua motua o a‘u ki hono hiva oe ta‘u: te mou kai ae meakai motua kae oua ke hoko a hono toukai.

¶ 23 E ikai fakatau ae fonua o taegata: he oku ooku ae fonua; he koe kau muli moe aunofo akimoutolu kiate au.

24 Bea i he fonua kotoabe oku mou ma‘u te mou tuku ke huhui ae fonua.

¶ 25 Kabau kuo fakaaau o majiva a ho kaiga, bea kuo ne fakatau ha botu o hono abi, bea kabau e ha‘u ha niihi i hono kaiga ke huhui ia, ke ne huhui ai aia nae fakatau e hono kaiga.

26 Bea kabau oku ikai i he tagata ha toko taha ke huhui ia, bea oku faa huhui ia eia be;

27 Tuku ai ke ne lau eia ae gaahi ta‘u o hono fakatau o ia, bea atu hono toe o ia ki he tagata naa ne fakatau ia ki ai; koeuhi ke toe ha‘u ia ki hono abi.

28 Bea kabau oku ikai mafai eia ke toe omi ia kiate ia, bea koe mea nae fakatau e tuku be ia i he nima o ia naa ne fakatau ia o a‘u ki he ta‘u oe jiubeli: bea i he jiubeli e tukuage ia, bea e ha‘u ia ki hono abi.

29 Bea kabau oku fakatau e ha tagata ha fale nofoaga i loto kolo oku ai hano a maka, e gofua a ene huhui ia i he ikai oji ae ta‘u kotoa hili hono fakatau: i he ta‘u kotoa e gofua a ene huhui ia.

30 Bea kabau e ikai huhui ia i he ta‘u katoa, bea koe fale koia oku i he kolo a maka e oona ia naa ne fakatau ia o taegata i hono gaahi toutagata; e ikai toe tukuage ia i he jiubeli.

31 Ka koe gaahi fale i he gaahi botu kakai oku ikai ha nau a, e lau ia fakataha moe gaahi goue oe fonua: e gofua ke huhui ia, bea e tukuage ia i he jiubeli.

32 Ka koe gaahi botu nofoaga oe kau Livai, moe gaahi fale i he gaahi botu nofoaga o ho nau abi, e gofua ki he kau Livai, ke huhui ia i he kuoga kotoabe.

33 Bea kabau oku fakatau e ha tagata mei he kau Livai, bea koe fale nae fakatau, moe botu kakai o hono abi, e tukuage ia i he jiubeli: he koe gaahi fale oe gaahi botu kakai oe kau Livai, ko ho nau abi ia i he fānau a Isileli.

34 Ka koe goue oku hoko o ofi mo ho nau gaahi botu kakai, e ikai fakatau ia: he ko ho nau tofia tuu mau ia.

¶ 35 Bea kabau kuo hoko o majiva a ho kaiga, bea kuo vaivai ia; bea te ke tokoni ia; ne ogo be koe muli ia be ko ha aunofo kiate koe; koeuhi ke ne moui ai mo koe.

36 Oua naa ke too ha totogi iate ia, be hano tubu; ka ke manavahe ki he Otua; koeuhi ke moui ho kaiga mo koe.

37 Oua naa ke atu hoo koloa kiate ia ke ma‘u ai ae totogi, be no hoo meakai ke ma‘u ai hono tubu.

38 Ko au ko Jihova ko ho mou Otua, kuou omi akimoutolu mei he fonua ko Ijibite, ke foaki kiate kimoutolu ae fonua ko Kenani, bea keu hoko ko ho mou Otua.

¶ 39 Bea kabau kuo hoko o majiva ho kaiga oku nofo ofi kiate koe, bea fakatau eia ia kiate koe: oua naa ke fakabobula‘i ia ke fai o hage ha hoboate;

40 Ka e iate koe ia o hage ha tamaioeiki oku gaue ki ha totogi, moe aunofo, bea te ne iate koe koe tauhi o a‘u ki he ta‘u oe jiubeli:

41 Bea e toki alu ia iate koe, aia mo ene fānau mo ia, bea e toe hoko atu ia ki hono kaiga, bea e hoko ki he abi o ene gaahi tamai.

42 He ko eku kau tamaioeiki akinautolu, aia naaku omi mei he fonua ko Ijibite: oua naa fakatau akinautolu ke fakabobula‘i.

43 E ikai te ke bule‘i akinautolu i he malohi lahi; ka ke manavahe ki ho Otua.

44 Ko hoo kau tamaioeiki mo hoo kau kaunaga aia te ke ma‘u, e ma‘u ia mei he kakai taelotu oku nofo takatakai iate koe; ke mou fakatau iate kinautolu ae kau tamaioeiki moe kau kaunaga.

45 Bea koeuhi koe fānau ae kau muli oku aunofo iate kimoutolu, te mou fakatau iate kinautolu, bea i ho nau gaahi faahiga oku iate kimoutolu, aia naa nau fakatubu i ho mou fonua: bea ko ho mou kakai akinautolu.

46 Bea ke mou ma‘u akinautolu koe kakai ki hoo mou fānau oku muimui iate kimoutolu, ke nau ma‘u akinautolu ko ho nau kakai; ko hoo mou kau tamaioeiki o taegata; ka e ikai te mou bule malohi ki he fānau a Isileli ko ho mou kaiga, koe taha ki he taha.

¶ 47 Bea kabau e fakaaau o koloaia ha aunofo, be ha muli oku nofo ofi kiate koe, bea fakaaau o majiva ho kaiga oku nofo ofi kiate ia, o ne fakatau ia ki he muli be koe aunofo oku nofo aunofo ofi kiate ia, be ki ha toko taha i he hako oe muli:

48 Hili hono fakatau ia oku gofua ke huhui ia: oku gofua ke huhui ia e ha toko taha i hono kaiga.

49 E gofua ke huhui ia e he tokoua o ene tamai, be koe foha oona, be huhui ia e ha toko taha oku kaiga ofi kiate ia i hono kaiga; bea kabau oku ne mafai, ke huhui ia eia be.

50 Bea te ne lau kiate ia naa ne fakatau ia o fai mei he ta‘u nae fakatau ai ia kiate ia o hoko ki he ta‘u oe jiubeli: bea koe totogi oe fakatau e fakatatau ki hono lau oe ta‘u, e fakatatau ia kiate ia moe gaue ae tamaioeiki oku totogi.

51 Kabau oku toe lahi ae ta‘u kimui, e toe atu eia o fakatatau ki ai ae koloa o hono huhui mei he koloa nae fakatau aki ia.

52 Bea kabau oku toe jii be ae ta‘u ki he jiubeli, bea e lau ia ki ai mo ia, bea e toe atu kiate ia o fakatatau ki hono ta‘u ae totogi o hono huhui.

53 Bea e iate ia ia o hage ha tamaioeiki gaue oku totogi i he ta‘u taki taha; bea e ikai bule‘i malohi ia kiate ia i ho ao.

54 Bea kabau e ikai huhui ia i he gaahi ta‘u koia, bea e toki tukuage ia i he ta‘u oe jiubeli, aia, mo ene fānau mo ia.

55 He koe kau tamaioeiki kiate au ae fānau a Isileli; ko eku kau tamaioeiki akinautolu, aia kuou omi mei he fonua ko Ijibite: Ko au ko Jihova ko ho mou Otua.