¶ 1 E IKAI te mou gaohi ha mou otua loi, be ha fakatātā kuo togitogi, bea oua naa mou fokotuu hake ha mea fakatātā ke tuu, bea e ikai te mou fokotuu hake ha fakatātā maka i ho mou fonua, ke bunou hifo ki ai: he ko au Jihova ko ho mou Otua.

¶ 2 Ke mou tauhi hoku gaahi sabate, bea fai fakaabaaba ki hoku fale tabu: Ko au ko Jihova.

¶ 3 Kabau oku mou alu i he eku gaahi tuutuuni, bea tauhi eku gaahi fekau, bea fai ki ai;

4 Teu tuku ai kiate kimoutolu ae uha i hono faahita‘u lelei, bea e tubu i he fonua a hono fua, bea e tubu mei he gaahi akau oe goue ho nau gaahi fua.

5 Bea e hoko atu ho mou kuoga haha ki he tatao oe vaine, bea koe tatao vaine e hoko atu ia ki he tūtū‘i: bea te mou kai hoo mou ma bea makona, bea nofo fiemalie be i ho mou fonua.

6 Bea teu foaki ae melino ki he fonua, bea te mou tokoto hifo, bea e ikai fakamanavahe‘i akimoutolu e ha toko taha: bea teu fakaseesee ae faga manu kovi mei he fonua, bea e ikai alu ae heleta o aji i ho mou fonua.

7 Bea te mou tuli ho mou gaahi fili, bea te nau to i he heleta i ho mou ao.

8 Bea e tuli e ho mou toko nima ae toko teau, bea koe toko teau o moutolu e hola ai ae toko mano: bea e higa ho mou gaahi fili i ho mou ao i he heleta.

9 He teu tokaga kiate kimoutolu, o tabuaki akimoutolu, o fakatokolahi akimoutolu, o fakatuu mau eku fuakava mo kimoutolu.

10 Bea te mou kai ae mea motua, bea omi ae mea motua koeuhi koe mea foou.

11 Bea teu fokotuu hoku fale fehikitaki iate kimoutolu: bea e ikai fehia hoku laumalie kiate kimoutolu.

12 Bea teu eveeva iate kimoutolu, bea ko ho mou Otua au, bea te mou hoko ko hoku kakai.

13 Ko au ko Jihova ko ho mou Otua, aia nae omi akimoutolu mei he fonua ko Ijibite, koeuhi ke oua naa mou nofo bobula kiate kinautolu; bea naaku feji‘i ae noo o hoo mou haamoga, o gaohi akimoutolu ke mou alu totonu.

¶ 14 Bea kabau e ikai te mou tokaga kiate au, bea ikai fai ae gaahi fekau ni;

15 Bea kabau te mou liaki eku gaahi tuutuuni ni, bea kabau e fehia ho mou laumalie ki he eku gaahi fakamāu, bea ikai te mou fai eku gaahi fekau kotoabe, ka mou liaki eku fuakava:

16 Ko au foki teu fai eni kiate kimoutolu; Teu tuku kiate kimoutolu ae fakailifia, moe fakaauaujino, moe bubuke vela, aia e fakakui ai ho mata, bea ne laga‘i ae mamahi i loto: bea te mou tūtū‘i taeaoga hoo mou gaahi tega, koeuhi e kai ia e ho mou gaahi fili.

17 Bea teu jio fakafulofula kiate kimoutolu, bea e tamate‘i akimoutolu i he ao o ho mou gaahi fili: e bule kiate kimoutolu akinautolu oku fehia kiate kimoutolu; bea te mou hola ka oku ikai tuli akimoutolu e ha toko taha.

18 Bea kabau te mou jiaki kotoabe ia, o ikai jii tokaga kiate au, bea teu toki tautea akimoutolu ke tatuo fitu i hoo mou gaahi agahala.

19 Bea teu feji‘i ae laukau o ho mou malohi; bea teu gaohi ho mou lagi ke hage koe ukamea, mo ho mou kelekele ke hage koe balasa:

20 Bea e fakaoji taeaoga ho mou malohi: koeuhi e ikai tuku hake e he fonua hono tubu, bea e ikai tubu i he gaahi akau oe fonua ho nau fua.

¶ 21 Bea kabau te mou alu kehe be, bea ikai tokaga kiate au; teu omi kiate kimoutolu ae mamahi ke tatuo fitu o fakatatau mo hoo mou gaahi agahala.

22 Bea teu omi ae gaahi manu fekai kiate kimoutolu, aia e kaihaaji hoo mou fānau meiate kimoutolu, bea fakaauha hoo mou faga manu, o fakatokojii akimoutolu; bea e vaoa ho mou gaahi halamotua.

23 Bea kabau e ikai te mou tui kiate au i he gaahi mea ni o liliu ai, ka mou agatuu kiate au;

24 Behe teu alu hake foki kiate kimoutolu, bea teu tautea akimoutolu ke tatuo fitu i hoo mou gaahi agahala.

25 Bea teu omi ae heleta kiate kimoutolu, aia te ne totogi kiate kimoutolu i hono maumau‘i o eku fuakava: bea ka mou ka katoa fakataha i hoo mou gaahi kolo, teu fekau ae mahaki lahi kiate kimoutolu; bea e tukuage akimoutolu ki he nima oe fili.

26 Bea hili eku feji‘i ae tokotoko o hoo mou ma, koe kau fefine e toko hogofulu te nau ta‘o hoo mou ma i he gotoumu be taha, bea te nau toe atu fakatuhotuha be hoo mou ma kiate kimoutolu: bea te mou kai, kae ikai makona.

27 Bea kabau e ikai te mou tui kiate au ne ogo a eku fai eni kotoabe, ka mou fai kehe be kiate au:

28 Bea teu toki alu kehe be au iate kimoutolu i he houhau lahi: bea ko au, io, ko au teu tautea akimoutolu ke tatuo fitu i hoo mou gaahi agahala.

29 Bea te mou kai ae jino o ho mou gaahi foha, moe jino o ho mou gaahi ofefine te mou kai.

30 Bea teu maumau‘i ho mou gaahi botu maoluga, bea ta hifo hoo mou gaahi mea fakatātā, o laku ho mou gaahi agaaga ki he agaaga o ho mou gaahi otua loi, bea teu fākalilia kiate kimoutolu.

31 Bea teu gaohi hoo mou gaahi kolo ke lala, bea teu tuku liaki be ho mou gaahi fale tabu, bea e ikai teu nanamu ki he namu kakala o hoo mou mea namu kakala.

32 Bea teu fakalala ae fonua; bea ko ho mou gaahi fili aia oku nofo ai te nau ofo ki ai.

33 Bea teu fakahe‘i akimoutolu ki he gaahi fonua taelotu, bea teu toho ae heleta ke tuli aki akimoutolu: bea e lala ho mou fonua, bea e liaki ho mou gaahi kolo.

34 Bea e toki ma‘u malie be e he fonua hono gaahi sabate, lolotoga a ene lala, ka oku mou i he fonua o ho mou fili akimoutolu; io, e toki mālōlō ae fonua, bea ma‘u be hono gaahi sabate.

35 Lolotoga hono tuku liaki ia e mālōlō; koeuhi nae ikai mālōlō ia i ho mou gaahi sabate, lolotoga a hoo mou nofo ki ai.

36 Bea kiate kinautolu oku moui mo toe iate kimoutolu teu tuku ae vaivai ki ho nau loto i he gaahi fonua o ho nau fili; bea koe mumuhu oe louakau viligia te ne tulia akinautolu; bea te nau hola o hage koe hola mei he heleta; bea te nau higa i he ikai tuli akinautolu e ha toko taha.

37 Bea te nau to o fetaotaomi be akinautolu, o hage koe to i he ao oe heleta, ka oku ikai ha toko taha oku tulia akinautolu: bea e ikai te mou ma‘u ha malohi ke tuu i he ao o ho mou fili:

38 Bea te mou auha i he gaahi fonua taelotu, bea koe fonua o ho mou gaahi fili te ne kai o oji akimoutolu.

39 Bea ko kinautolu oku toe iate kimoutolu te nau fakaaau o oji i he e nau hia i he fonua o ho mou fili: bea i he hia ae nau gaahi tamai foki te nau fakaaau o mole ai.

40 Kabau te nau vete e nau gaahi hia, bea moe hia ae nau gaahi tamai, moe nau gaahi fai hala aia kuo nau agahala ai kiate au, bea behe mai foki, kuo nau alu o agatuu kiate au;

41 Bea kuou alu o fai kehe kiate kinautolu, bea kuou omi akinautolu ki he fonua o ho nau fili; kabau kuo toki fakavaivai a ho nau loto taekamu, bea nau ma‘u loto lelei ae tautea oe nau gaahi hia:

42 Behe teu manatu ai ki he eku fuakava kia Jekobe, bea mo eku fuakava mo Aisake, bea mo eku fuakava foki mo Ebalahame teu manatu‘i; bea teu manatu‘i ae fonua.

43 E tuku liaki be foki ae fonua ekinautolu, bea te ne ma‘u malie hono gaahi sabate, i he ene tuku liaki be ekinautolu: bea te nau tali lelei ae tautea oe nau hia: koeuhi, io, koe mea i he e nau liaki eku gaahi fono, bea koe mea i he e nau fehia ki he eku gaahi tuutuuni.

44 Ka ne ogo aeni kotoabe, oka nau ka i he fonua o ho nau fili, e ikai teu liaki akinautolu, bea e ikai teu fehia kiate kinautolu, ke fakaoji aubito akinautolu, bea ke liaki eku fuakava mo kinautolu: he ko au ko Jihova ko ho nau Otua.

45 Ka teu manatu koeuhi ko kinautolu, ki he fuakava ae nau uluaki mātua, aia naaku omi mei he fonua ko Ijibite i he ao oe kakai taelotu, koeuhi keu hoko ai ko ho nau Otua: Ko au ko Jihova.

46 Ko eni ae gaahi tuutuuni moe gaahi fono, moe gaahi fekau, aia nae fokotuu e Jihova ke kau kiate ia moe fānau a Isileli i he mouga ko Sainai i he nima o Mosese.