¶ 1 BEA nae folofola a Jihova kia Mosese, o behe,

2 Ke ke ave a Elone mo hono gaahi foha, moe gaahi kofu moe lolo oe fakatabu‘i, moe bulu ki he feilaulau ma ae agahala, moe sibi tagata e ua, moe koto ma tae fakalevani;

3 Bea ke tanaki ae kakai ke fakataha ki he mataba oe fale fehikitaki oe kakai.

4 Bea nae fai e Mosese o hage koe fekau a Jihova kiate ia; bea nae tanaki fakataha ae kakai ki he mataba oe fale fehikitaki oe kakai.

5 Bea behe e Mosese ki he kakai, Ko eni aia kuo fekau e Jihova ke fai.

6 Bea nae omi e Mosese a Elone mo hono gaahi foha, o ne kaukau‘i akinautolu aki ae vai.

7 Bea naa ne ai kiate ia ae kofutua, o ne nonoo aki eia ae noo, o ai kiate ia ae kofu fakatōtōlōfa, mo ne ai kiate ia ae efoti, o ne nonoo aki ia ae noo fakanikoniko‘i oe efoti, o nonoo aki eia ia.

8 Bea naa ne ai ae kofu fatafata kiate ia: bea ne ai foki ki he kofu fatafata ae Ulimi moe Tumemi.

9 Bea naa ne ai ae tata ki hono ulu; bea naa ne ai ae bale koula ki he mu‘a tatā, koe tatā maonioni; o hage koe fekau a Jihova kia Mosese.

10 Bea nae too e Mosese ae lolo tākai, o ne tākai aki ae fale fehikitaki mo ia kotoabe nae i ai, o ne fakatabu‘i kotoabe ia.

11 Bea naa ne luluku aki ia ae feilaulauaga o liuga fitu, o ne tākai aki ae feilaulauaga mo hono nāunāu kotoabe, moe sene mo hono tuuga, ke fakatabu‘i ia.

12 Bea naa ne ligi mei he lolo tākai ki he ulu o Elone, o ne tākai aki ia, ko hono fakatabu‘i.

13 Bea nae omi e Mosese ae gaahi foha o Elone, o ne ai ae gaahi kofu kiate kinautolu, o ne nonoo aki akinautolu ae gaahi noo, o ne ai ae tatā kiate kinautolu; o hage koe fekau a Jihova kia Mosese.

14 Bea naa ne omi ae bulu ki he feilaulau ma ae agahala: bea nae hilifaki e Elone mo hono gaahi foha ho nau nima ki he ulu oe bulu ki he feilaulau ma ae agahala.

15 Bea naa ne tamate‘i ia: bea ave e Mosese ae toto, o ai takatakai ia aki hono tuhu ki he gaahi nifo oe feilaulauaga, koe fakamaa oe feilaulauaga, o ne ligi ae toto ki he tefito‘i feilaulauaga, koe fakatabu‘i ia, ke fai i hono fuga ae fakalelei.

16 Bea naa ne ave ae gako kotoabe nae i loto, moe ahu mei oluga i he ate, moe kofuua e ua, mo ho na gako, bea tutu ia e Mosese i he fuga feilaulauaga.

17 Ka koe bulu, mo hono kili, ko hono jino, mo hono tae, naa ne tutu aki ae afi ituaa i he abitaga; o hage koe fekau a Jihova kia Mosese.

¶ 18 Bea naa ne omi ae sibi tagata ki he feilaulau tutu: bea hilifaki e Elone mo hono gaahi foha ho nau nima ki he ulu oe sibi tagata.

19 Bea naa ne tamate‘i ia; bea luluku aki e Mosese ae toto ae fuga oe feilaulauaga o takatakai.

20 Bea naa ne tafa ae sibi tagata; bea tutu e Mosese ae ulu, moe gaahi koga, moe gako.

21 Bea fufulu eia ae tootooga moe keukeu aki ae vai; bea tutu e Mosese hono kotoa oe sibi tagata i he fuga feilaulauaga: koe feilaulau tutu ia koe mea namu kakala, koe feilaulau kuo gaohi aki ae afi kia Jihova: o hage koe fekau a Jihova kia Mosese.

¶ 22 Bea nae omi eia ae sibi tagata e taha, koe sibi tagata oe fakanofo: bea nae hilifaki e Elone mo hono gaahi foha ho nau nima ki he ulu oe sibi tagata.

23 Bea naa ne tamate‘i ia; bea ave e Mosese a hono toto o ne ai ia ki he mu‘a teliga toomatau o Elone, bea ki he motua nima o hono nima toomatau, bea ki he motua va‘e o hono va‘e toomatau.

24 Bea ne omi ae gaahi foha o Elone, bea ai e Mosese ae toto ki ho nau mu‘a teliga toomatau, bea ki he motua nima o ho nau nima toomatau, bea ki he motua va‘e o ho nau va‘e toomatau: bea nae luluku aki e Mosese ae toto ae fuga feilaulauaga o takatakai.

25 Bea naa ne ave ae gako, moe tuugaiku, moe gako kotoabe nae i he tootooga, moe ahu i oluga i he ate, mo hono kofuua e ua, mo ho na gako, moe alaganima toomatau:

26 Bea too eia ae foi ma e taha tae fakalevani mei he koto ma tae fakalevani i he ao o Jihova, moe foi ma nae loloi moe foi ma manifinifi, o ne ai ia ki he gako, bea ki he alaganima toomatau:

27 Bea nae tuku eia kotoabe ki he nima o Elone, bea ki he nima o hono gaahi foha, bea taaloalo aki ia koe feilaulau taaloalo i he ao o Jihova.

28 Bea nae too ia e Mosese mei ho nau nima, o ne tutu ia ki he fuga oe feilaulauaga ki he mea tutu: koe gaahi mea oe fakanofo koe mea namu kakala: koe feilaulau kuo gaohi aki ae afi kia Jihova.

29 Bea nae ave e Mosese ae fatafata, o taaloalo aki ia koe feilaulau taaloalo i he ao o Jihova: ko hono inaji ia o Mosese i he sibi tagata oe fakanofo; o hage koe fekau a Jihova kia Mosese.

30 Bea nae ave e Mosese ae lolo tākai, bea moe toto aia nae i he fuga feilaulauaga, o ne luluku aki ia a Elone, bea mo hono gaahi kofu, bea mo hono gaahi foha, bea moe gaahi kofu o hono gaahi foha; o ne fakatabu‘i a Elone, mo hono gaahi kofu, mo hono gaahi foha, moe gaahi kofu o hono gaahi foha.

¶ 31 Bea nae fekau e Mosese kia Elone bea ki hono gaahi foha, Haka ae kakano i he mataba oe fale fehikitaki oe kakai: bea kai ia i ai, moe ma oe gaahi fakanofo oku i he kato, o hage ko eku fekau, o behe, Ko Elone mo hono gaahi foha te nau kai ia.

32 Bea koia oku toe i he kakano, bea moe ma te mou tutu aki ae afi.

33 Bea oua naa mou hu ki tua i he mataba oe fale fehikitaki oe kakai i he aho e fitu, ke oua, ke gata ae gaahi aho o ho mou fakanofo: i he aho e fitu te ne fakanofo akimoutolu.

34 Hage koia kuo fai eia he aho ni, koia kuo fekau e Jihova ke fai, ke fai ae fakalelei maa moutolu.

35 Koia te mou nofo mau ai i he mataba oe fale fehikitaki oe kakai i he aho moe bo i he aho e fitu, o tauhi ae fekau a Jihova; telia naa mou mate: he kuo behe hono fekau‘i au.

36 Bea nae fai e Elone ae gaahi mea ni aia nae fekau e Jihova i he nima o Mosese.