1 Im ālikin men kein Inok eaar wōnm̧aanļo̧k wōt ilo ekkōnono eo an, im ba: Lo, jemād Adam eaar katakin men kein, im elōn̄ raar tōmak im erom m̧aan ro nejin Anij, im elōn̄ rekar jab tōmak, im rekar mej ilo jero̧wiwi ko aer, im rej reim̧aanļo̧k kōn mijak, ilo en̄taan, n̄an an libabne ekakijeekek in illu an Anij lutōkleplep ļo̧k ioer.

2 Im jān iien eo m̧aanļo̧k Inok ar jino in kanaan, im ba n̄an armej ro, bwe: Ke iaar ito-itak, im kar jutak ioon jikin eo Mahujah, im kar kūr n̄an Irooj, eaar wōr juon ainikien jān lan̄, ej ba—Kwōn oktak, im kwōn bōkļo̧k eok ioon toļ Simeon.

3 Im ālikin men kein iaar oktak im kar wanlōn̄ļo̧k ioon toļ eo; im ke iaar jutak ioon toļ eo, iaar lo lan̄ ko repeļļo̧k, im kar kōkōņak eō kōn aiboojoj;

4 Im iaar lo Irooj; im Eaar jutak im̧aan meja, im Eaar ekkōnono ippa, em̧ool āinwōt juon armej ej ekkōnono ippān bar juon, jelm̧ae doon; im Eaar ba n̄an eō: Kwōn reilo̧k, im I naaj kwaļo̧k n̄an eok laļ in ium̧win tōrean elōn̄ epepen ko.

5 Im ālikin men kein iaar lo kom̧laļ in Sum, im lo, juon armej eļap rekar jokwe ilo em̧ nuknuk ko, ro me rekar armej in Sum.

6 Im bar juon alen Irooj eaar ba n̄an eō: Kwōn reilo̧k; im iaar reilo̧k n̄an tuiōn̄, im iaar lo armej in Keinan, ro me rekar jokwe ilo em̧ nuknuk ko.

7 Im Irooj eaar ba n̄an eō: Kwōn kanaan; im iaar kanaan, im ba: Lo armej in Kanaan, ro rekanooj lōn̄, naaj kalejar ilo pata ņae armej in Sum, im naaj m̧ane er bwe ren kanooj jako; im armej in Kanaan renaaj ajeje doon ilo āneo, im āneo enaaj jakimej im lo̧urō, im ejjeļo̧k bar armej enaaj jokwe ijo a armej in Kenean;

8 Bwe lo, Irooj enaaj kaliaik āneo kōn eļap bwil, im jakimej eo ijo enaaj wōnm̧aanļo̧k n̄an indeeo; im eaar wōr juon kilmeej eaar itok ioon aolep ro nejin Keinan, im kar matōrtōre er ilubwiljin aolep armej.

9 Im ālikin men kein Irooj eaar ba n̄an eō: Kwōn reilo̧k; im iaar reilo̧k, im iaar lo āneen Sheron, im āneen Inok, im āneen Omner, im āneen Heni, im āneen Shem, im āneen Haner, im āneen Hanannaia, im aolep ro rej pād ijoko;

10 Im Irooj eaar ba n̄an eō: Kwōn etal n̄an armej rein, im ba n̄an er—Ukeļo̧k, n̄e Iab iwōj im den̄ļo̧ke er kōn juon lia, im remej.

11 Im Eaar letok n̄an eō juon kien bwe in peptaij ilo etan Jemān, im etan Nejin, eo eobrak kōn jouj im m̧ool, im etan Jetōb Kwōjarjar, eo ej kam̧ool kōn Jemān im Nejin.

12 Im ālikin men kein Inok ar wōnm̧aanļo̧k n̄an kūr ioon aolep armej ro, ijello̧kun wōt armej in Keinan, n̄an ukeļo̧k;

13 Im āindein ar kanooj ļap tōmak eo an Inok bwe eaar tōl armej ro an Anij, im rikōjdat ro aer raar itok n̄an kōpata ņae er; im eaar ekkōnono naan eo an Irooj, im laļ ar wūdiddid, im toļ ko rekar ko, em̧ool ekkar n̄an naan in jiron̄ eo an; im reba ko in dān rekar oktak jān ijoko rej to̧o̧rļo̧k ie; im rorror an kidu ļaioon ko kar ron̄ jān āne jem̧aden; im aolep laļ otemjeļo̧k rekar kanooj lōļn̄o̧n̄, jon̄an kar kajoor in naan ko an Inok, im jon̄an kar kanooj kajoor in kajin eo me Anij eaar leļo̧k n̄an e.

14 Eaar barāinwōt wōr juon āne eaar wanlōn̄tak jān m̧wilaļ in lo̧meto, im ekanooj kar ļap mijak eo an rikōjdat ro an armej ro an Anij, jon̄an rekar ko im jutakļo̧k ettoļo̧k im ilo̧k ioon āneo eaar wanlōn̄tak jān m̧wilaļ in lo̧meto.

15 Im riineea ro iāneo, barāinwōt, rekar jutakļo̧k ettoļo̧k; im eaar ilo̧k juon lia ioon aolepān armej ro rekar ire ņae Anij;

16 Im jān iien eo m̧aanļo̧k eaar wōr tariņae ko im kōto̧o̧rļo̧k bōtōktōk ilubwiljier; a Irooj eaar itok im jokwe ippān armej ro An, im rekar jokwe ilo wānōk.

17 Im mijake Irooj eaar pād ioon aolep laļ otemjeļo̧k, jon̄an kar kanooj ļap in aiboojoj eo an Irooj, eo eaar pād ioon armej ro An. Im Irooj eaar kōjeraam̧m̧an āneo, im rekar jeraam̧m̧an ioon toļ ko, im ioon jikin ko reutiej, im kar jebar.

18 Im Irooj eaar ņa etan armej ro An Zaion, kōnke rekar juon wōt ilo bōro im juon wōt ilo ļōmņak, im rekar jokwe ilo wānōk; im ar ejjeļo̧k rijeram̧ōl ilubwiljier.

19 Im Inok eaar wōnm̧aanļo̧k an kwaļo̧k naan ilo jim̧we n̄an armej ro an Anij. Im ālikin men kein ilo raan ko an, eaar kalōk juon jikin kwelo̧k kar etan Jikin Kwelo̧k Ekwōjarjar, em̧ool Zaion.

20 Im ālikin men kein Inok eaar ekkōnono ippān Irooj; im eaar ba n̄an Irooj: Em̧ool Zaion enaaj jokwe ilo lur indeeo. A Irooj eaar ba n̄an Inok: Zaion Iaar kōjeraam̧m̧ane, a bwe eo bwe in armej ro Iaar kaliaiki.

21 Im ālikin men kein Irooj eaar kwaļo̧k n̄an Inok aolep ro rej pād ioon laļ; im eaar lo, im lo, Zaion, ilo wōnm̧aanļo̧k in iien, kar bōklōn̄ļo̧k ilo lan̄. Im Irooj eaar ba n̄an Inok: Lale ijin jikū indeeo.

22 Im Inok barāinwōt eaar lo bwe eo bwe in armej ro me rekar m̧aan ro nejin Adam; im rekar koba in aolep ineen Adam ijello̧kun wōt ineen Kein, bwe ineen Kein rekar kilmeej, im ekar ejjeļo̧k jikier ilubwiljier.

23 Im ālikin kar bōklōn̄ļo̧k Zaion ilo lan̄, Inok eaar lo, im lo, aolep laļ ko ilo laļ rekar pād im̧aan;

24 Im ekar itok epepen ioon epepen; im Inok eaar utiej im kar kotaklōn̄ļo̧k, em̧ool ilo ubōn Jemān, im ubōn Nejin Armej; im lo, kajoor eo an Setan eaar pād ioon aolep mejān laļ.

25 Im eaar lo enjeļ ro rej wanlaļtak jān lan̄; im eaar ron̄ juon ainikien eļļaaj ej ba: Jerata, jerata n̄an ro rej pād ilo laļ.

26 Im eaar lo Setan; im eaar wōr juon tomede eļap ilo pein, im eaar kalbubuuk aolepān mejān laļ kōn marok jilōn̄lōn̄; im eaar kotak mejān im ettōn̄, im enjeļ ro an rekar m̧ōņōņō.

27 Im Inok eaar lo enjeļ ro rej wanlaļtak jān lan̄, im bōktok naan in kam̧ool kōn Jemān im Nejin; im Jetōb Kwōjarjar eaar wōtlo̧k ioon elōn̄, im er rekar weaaklōn̄ļo̧k jān kajoor ko an lan̄ ļo̧k ilo Zaion.

28 Im ālikin men kein Anij in lan̄ eaar reilo̧k ioon bwe eo bwe in armej ro, im Eaar jan̄; im Inok eaar kam̧ool kake, im ba: Ekōjkan an lan̄ ko jan̄, im kōto̧o̧rļo̧k dān in kōmjaaļaļ ko aer āinwōt wōt ioon toļ ko?

29 Im Inok eaar ba n̄an Irooj: Ekōjkan Am̧ maron̄ jan̄, ke m̧ool eo Kwe Kwokwōjarjar, im jān aolep indeeo n̄an aolep indeeo?

30 Im eļan̄n̄e ekar maron̄ bwe armej en maron̄ bwini būn̄al in laļ, aaet, milien in laļ ko āinwōt in, e ban kar jino in oran mennin kōm̧anm̧an ko Am; im katiin̄ ko am rej erļo̧keļo̧k wōt; im mekarta Kwōj pād wōt ijo, im Ubōm̧ ej pād ijo; im barāinwōt Kwe Kwo jim̧we; im Kwe kwo tūriam̧o im jouj indeeo;

31 Im Kwaar bōk Zaion n̄an Ubōm̧ make, jān aolep mennin kōm̧anm̧an ko Am, jān aolep indeeo n̄an aolep indeeo; im ejjeļo̧k a aenōm̧m̧an wōt, jim̧we, im m̧ool ej jepooļe tūroon eo Am; im tūriam̧o enaaj etal im̧aan Mājam̧ im ejjeļo̧k jem̧ļo̧kin; ekōjkan Am̧ maron̄ jan̄?

32 Irooj eaar ba n̄an Inok: Kwōn lo rein jeiūm̧ im jatūm; er rej eļtan pā ko Peiū make, im Iaar leļo̧k n̄an er jeļāļo̧kjeņ eo aer, ilo raan eo Iaar kōm̧anm̧an er; im ilo Jikin Kallib in Iden, Iaar leļo̧k n̄an armej an anemkwōj in kāālet;

33 Im n̄an ro jeiūm̧ im jatūm Iaar ba, im barāinwōt leļo̧k kien eo, bwe ren iakwe doon, im bwe er ren kāālet Eō, eo Jemāer; a lo, er ejjeļo̧k aer en̄jake, im er rej dike bōtōktōkier make;

34 Im kijeek eo in Aō libabne ej urur ņae er; im ilo Aō jam̧ōņōņō ebwil I naaj jilkinļo̧k ibwijleplep ko ioer, bwe Aō illu elāj ej urur ņae er.

35 Lo, N̄aij Anij; Armej in Kwōjarjar ej Eta; Armej in Kapilōk ej Eta; im Ejjeļo̧k Jem̧ļo̧kin im Indeeo ej Eta, barāinwōt.

36 Kōn menin, I maron̄ erļo̧keļo̧k Peiū im jibwi aolep mennin kōm̧anm̧an ko me Iaar kōm̧m̧ani; im Meja remaron̄ wākare er barāinwōt, im ilubwiljin aolep men ko eļtan pā ko Peiū ejjan̄in kar wōr nana ekanooj ļap āinwōt ilubwiljin ro jeiūm̧ im jatūm.

37 A lo, jero̧wiwi ko aer renaaj pād ioon bōran ro jemāer; Setan enaaj jemāer, im liaajlo̧ļ enaaj aer ko̧kkure; im aolepān lan̄ ko renaaj jan̄ ioer, em̧ool aolep men ko eļtan pā ko Peiū; kōn menin lan̄ ko ren jab jan̄, ke aolep lan̄ ko rej lo rein renaaj en̄taan ke?

38 A lo, rein me mājām rej pād ioer renaaj jako ilo ibwijleplep ko; im lo, I naaj kiil er; juon kalbuuj em̧ōj Aō kōpooje n̄an er.

39 Im men eo me Iaar kāālet e eaar akweļap im̧aan Meja. Kōn menin, ej en̄taan kōn jero̧wiwi ko aer; toun wōt aer naaj ukeļo̧k ilo raan eo Rikāālet eo Aō enaaj ro̧o̧ltok n̄an Ippa, im m̧ae raan eo renaaj pād ilo en̄taan;

40 Kōn menin, kōn un in lan̄ ko renaaj jan̄, aaet, im aolep men ko eļtan pā ko Peiū.

41 Im ālikin men kein Irooj eaar ekkōnono n̄an Inok, im ba n̄an Inok aolep kōm̧m̧an ko an ro nejin armej raņ; kōn menin Inok ar jeļā, im kalimjek nana ko aer, im aer būrom̧ōj, im eaar jan̄ im erļo̧keļo̧k pā ko pein, im būruōn ar depakpakļo̧k āinwōt indeeo; im būruōn ar tūriam̧o; im aolep mennin kōm̧anm̧an rekar wūdiddid.

42 Im Inok eaar barāinwōt lo Noa, im nokwe eo an; bwe ro bwijjin aolep ļōm̧aro nejin Noa renaaj kar bōk lo̧mo̧o̧r kōn juon lo̧mo̧o̧r n̄an mour in;

43 Kōn menin Inok eaar lo bwe Noa eaar jek juon wa; im bwe Irooj eaar ettōn̄dikdik ioon, im kar dāpiji ilo Pein make; a ioon bwein ro renana ibwijleplep ko rekar itok im kar oran̄ļo̧k er.

44 Im ke Inok eaar lo men in, an eaar obrak kōn metak, im eaar jan̄ kōn ro jein im jatin, im eaar ba n̄an lan̄ ko: Inaaj m̧akoko in bōk kaenōm̧m̧an; a Irooj eba n̄an Inok: Kwōn kotak būruōm, im kwōn m̧ōņōņō; im reilo̧k.

45 Im ālikin men kein Inok ar reilo̧k; im jān Noa, eaar lo aolep nokwe ko an laļ; im eaar kūr n̄an Irooj, im ba: N̄āāt naaj raan in an Irooj itok? N̄āāt bōtōktōkin eo Ewānōk naaj to̧o̧rļo̧k, bwe aolep ro rej liaajlo̧ļ ren maron̄ bōk kokwōjarjar im bōk mour indeeo?

46 Im Irooj eaar ba: Enaaj kōm̧m̧an ilo ioļapļap in iien, ilo raan ko an nana im idenoņe.

47 Im lo, Inok ar lo raan in itok eo an eo Nejin Armej, em̧ool ilo kanniōk; im jetōb eo an ar m̧ōņōņō, im ba: Eo Ewānōk em̧ōj kotake, im Lamb eo em̧ōj m̧ane jān foundasōn eo an laļ; im kōn tōmak n̄aij pād ilo ubōn Jemān, im lo, Zaion ej pād ippa.

48 Im ālikin men kein Inok eaar reilo̧k ioon laļ; im eaar ron̄ juon ainikien jān itulowaan, eo eba: Jerata, jerata ej n̄a, eo jinen armej raņ; N̄aij metak, N̄aij kijeļo̧k, kōnke nana eo an ro nejū. N̄āāt inaaj kakkije, im karreo jān ettoonon eo ej diwōjļo̧k jān eō? N̄āāt eo aō Rikōm̧anm̧an enaaj kokwōjarjar eō, bwe in maron̄ kakkije, im wānōk en pād ioon turun meja ium̧win jidik tōrean?

49 Im ke Inok ar ron̄ an laļ liaajlo̧ļ, eaar jan̄, im kūr n̄an Irooj, im ba: O Irooj, ta eban wōr Am̧ tūriam̧o kōn laļ ke? Ta Kwo ban kōjeraam̧m̧an ro nejin Noa ke?

50 Im ālikin men kein Inok ar wōnm̧aanļo̧k an kūr n̄an Irooj, im ba: Ij kajjitōk Ippam̧, O Irooj, ilo etan eo Nejūm̧ Kwaar Make Keotake, em̧ool Jisōs Kraist, bwe Kwōn tūriam̧okake Noa im ineen, bwe laļ en jamin bar libobo kōn ibwijleplep ko.

51 Im Irooj ekar jab maron̄ dāpiji; im Eaar kōm̧m̧an bujen ippān Inok, im kar kanejnej n̄an e kōn juon kanejnej, bwe E naaj kabbōjrak ibwijleplep ko; bwe E naaj kūr ioon ro nejin Noa;

52 Im Eaar jilkinļo̧k juon kean̄ eban irļo̧k, bwe juon m̧ōttan ineen naaj loe aolep iien ilubwiljin aolep laļ ko, ke laļ ej ja pād wōt;

53 Im Irooj eba: Em̧ōņōņō e eo ineen Messaia enaaj itok jān e; bwe Ej ba—N̄aij Messaia, Kiin̄ eo an Zaion, Dekā in Lan̄ eo, eo edepakpak āinwōt indeeo; eo ej itok ilo kōjām eo im tallōn̄ tok Iturū ejjāmin wōtlo̧k; kōn menin, em̧ōņōņō ro im Iaar ekkōnono kake er, bwe renaaj wōnm̧aantak kōn al ko in lan̄lōn̄ ejjeļo̧k jem̧ļo̧kin.

54 Im ālikin men kein Inok ar kūr n̄an Irooj, im ba: N̄e eo Nejin Armej ej itok ilo kanniōk, laļ enaaj lur ke? Ij akweļap n̄an Kwe, kwaļo̧k n̄an eō men kein.

55 Im Irooj eba n̄an Inok: Kwōn reilo̧k, im eaar reilo̧k im lo eo Nejin Armej rej kotak ioon debwāāl eo, ilo̧kan jekjek eo an armej raņ;

56 Im eaar ron̄ juon ainikien eļļaaj; im lan̄ ko rekar libobo; im aolep mennin kōm̧anm̧an ko an Anij rekar liaajlo̧ļ; im laļ eaar n̄irļo̧k; im dekā ko rekar potak; im ro rekwōjarjar rekar jerkak, im kar bōk kūrawūn ianbwijmaron̄ in eo Nejin Armej, kōn kūrawūn ko in aiboojoj;

57 Im jon̄an wōt lōn̄ in jetōb ro ilo kalbuuj rekar diwōjtok, im jutak ianbwijmaron̄in pein Anij; im bwe eo rekar dāpij wōt er ilo tomede in marok jilōn̄lōn̄ m̧ae ekajet eo ilo raan eo eļap.

58 Im bar juon alen Inok eaar jan̄ im kūr n̄an Irooj, im ba: N̄āāt laļ enaaj kakkije?

59 Im Inok eaar lo eo Nejin Armej ej wanlōn̄ļo̧k n̄an Jemān, im eaar kūr n̄an Irooj, im ba: Ta Kwo ban bar itok ioon laļ ke? Bwe kōnke Kwe Kwōj Anij, im ijeļā Kwe, im Kwaar kanejnej n̄an eō, im jiron̄ eō bwe in kajjitōk ilo etan Nejūm̧ Kwaar Make Keotake; Kwaar kōm̧anm̧an eō, im kar letok n̄an eō jim̧we eo n̄an tūroon eo Am, im jab jān n̄a make, ak kōn jouj eo Am; kōn menin, ij kajjitōk eļan̄n̄e Kwo ban bar itok ioon laļ.

60 Im Irooj eba n̄an Inok: Āinwōt Aō mour, em̧ool āindein I naaj itok ilo raan ko āliktata, ilo raan ko in nana im idenoņe, n̄an kakūrm̧ool e kanejnej eo me Iaar kōm̧m̧ane n̄an eok kake ro nejin Noa;

61 Im raan eo enaaj itok im laļ enaaj kakkije, a m̧okta jān raan eo lan̄ ko naaj kōmaroki, im juon kalbubu in marok jilōn̄lōn̄ enaaj kalbubu laļ; im lan̄ ko renaaj m̧akūtkūt, im barāinwōt laļ; im en̄taan ko reļļap renaaj pād ilubwiljin ro nejin armej raņ, a armej ro Aō I naaj oņaake er;

62 Im wānōk I naaj jilkinlaļļo̧k jān lan̄; im m̧ool I naaj jilkinļo̧k jān laļ, n̄an kam̧ool kōn Nejū Iaar Make Keotake; jerkakpeje eo An jān ro remej; aaet, im barāinwōt jerkakpeje eo an armej otemjeļo̧k; im wānōk im m̧ool I naaj kōm̧m̧an bwe ren pooke laļ āinwōt juon ibwijleplep, n̄an aintok ro Aō rikāālet jān m̧ōttan ko emān an laļ in, n̄an jikin eo me I naaj kōpooje, juon Jikin Kwelo̧k Ekwōjarjar, bwe armej ro Aō ren maron̄ kan̄ōrn̄ōre ipier, im reim̧aanļo̧k n̄an iien itok eo Aō; bwe ijo enaaj pād em̧ nuknuk eo Aō, im naaj ņa etan Zaion, juon Jerusalem Ekāāl.

63 Im Irooj eba n̄an Inok: Innām kwe im aolep jikin kwelo̧k eo am renaaj ioon er ijo, im Jenaaj bōk er ilo ubōd, im renaaj lo kōj; im jenaaj wōtlo̧k ioon kōnwaer, im renaaj wōtlo̧k ioon kōnwad, im kōjwōj naaj mejenmaik doon;

64 Im ilo ijeņ ijo Jikū enaaj pād, im enaaj Zaion, eo enaaj wōnm̧aantak jān aolep mennin kōm̧anm̧an ko me Iaar kōm̧m̧ani; im kōn tōrean eo juon to̧ujin iiō ko laļ enaaj kakkije.

65 Im ālikin men kein Inok eaar lo raan in itok eo an eo Nejin Armej, ilo raan ko āliktata, n̄an jokwe ioon laļ ilo wānōk n̄an tōrean eo juon to̧ujin iiō ko;

66 A m̧okta jān raan eo eaar lo en̄taan ko reļļap ilubwiljin ro renana; im eaar barāinwōt lo lo̧jet eo, bwe ekar ajbokdede, im menono an armej raņ rekar likjab jān er, im reim̧aanļo̧k kōn mijak n̄an ekajet ko an Anij Ekajoor Bōtata, ko renaaj itok ioon ro renana.

67 Im Irooj eaar kwaļo̧k men otemjeļo̧k, em̧ool n̄an jem̧ļo̧kin laļ; im eaar lo raan eo an ro rewānōk, awa in lo̧mo̧o̧ren eo aer, im ar bōk juon tarlep in lan̄lōn̄;

68 Im aolep raan ko an Zaion, ilo raan ko an Inok, rekar jilubukwi im jiljinon̄oul ļalem iiō.

69 Im Inok aolep armej ro an raar etetal ippān Anij, im Eaar jokwe ilo ilubwiljin Zaion; im ālikin men kein Zaion eaar jako, bwe Anij eaar bōk e lōn̄ļo̧k ilo Ubōn make; im jān iien eo m̧aanļo̧k eaar etal ennaan eo, Zaion E Emootļo̧k.