1 Mo i bin hapen se Inok i bin gohed long toktok blong hem, i stap talem se: “Luk, papa blong yumi, Adam, i bin tijim olgeta samting ia, mo plante oli bin biliv mo oli bin kam ol boe blong God; mo plante oli no bin biliv, mo oli bin ded wetem ol sin blong olgeta, mo oli stap wet wetem fraet, wetem bigfala harem nogud, long bigfala faea blong kros blong God, blong i kapsaet antap long olgeta.”

2 Mo stat long taem ia i go, Inok i stat blong profesae, i stap talem long ol pipol se: “Taem mi bin stap wokbaot, mo mi bin stanap long ples ia, Mahuja, mo mi bin krae long Lod, nao wan voes i kamaot long heven i stap talem se—‘Yu jenisim rod blong yu, mo yu go long hil Simeon.’

3 Mo i bin hapen se mi bin jenisim rod mo mi bin go antap long hil; mo taem mi bin stap stanap antap long hil, mi bin luk ol heven oli open, mo ol klos blong glori oli kavremap mi;

4 Mo mi bin luk Lod; mo hem i bin stanap long fored blong fes blong mi, mo hem i toktok wetem mi, semmak olsem wan man i stap toktok wetem wan narafala man, we fes blong hem i fesem fes blong mi; mo hem i talem long mi: ‘Luk, mo bae mi soemaot wol long yu, wol blong plante jeneresen we bae oli kam yet.’

5 Mo i bin hapen se mi bin luk insaed long vale blong Sum, mo mi luk gud, wan bigfala grup blong ol pipol i bin stap insaed long ol tenet, we oli ol pipol blong Sum.”

6 Mo bakegen, Lod i talem long mi: “Luk;” mo mi bin luk i go long Not, mo mi bin luk ol pipol blong Kenahan, we oli bin stap insaed long ol tenet.

7 Mo Lod i talem long mi: “Yu talem ol profesi;” mi bin talem ol profesi, mi talem se: “Luk ol pipol blong Kenahan, we namba blong olgeta i bigwan, bae oli go laen long faet agensem ol pipol blong Sum, mo bae oli kilimded olgeta mekem se bae oli ded evriwan; mo ol pipol blong Kenahan bae oli seraotem olgeta oli go olbaot long kantri ia, mo kantri ia bae i drae mo i no tekem frut, mo bae i no gat wan narafala pipol we bae i stap long ples ia, be ol pipol blong Kenahan nomo;”

8 From luk, Lod bae i sakem wan strong nogud tok long graon ia se bae ples i hot tumas, mo graon ia bae i drae gogo i stap blong oltaem; mo wan blak kala i kam long skin blong evri pikinini blong Kenahan, mekem se evri pipol oli no laekem olgeta.

9 Mo i bin hapen se Lod i talem long mi: “Luk;” mo mi bin luk, mo mi bin luk kantri blong Saron, mo kantri blong Inok, mo kantri blong Omna, mo kantri blong Hinae, mo kantri blong Sem, mo kantri blong Hana, mo kantri blong Hananiha, mo evri pipol we oli stap laef long ol ples ia;

10 Mo Lod i talem long mi se: “Yu go luk ol pipol ia, mo talem long olgeta se—‘Yufala i sakem sin,’ nogud mi kam mo sakem wan strong nogud tok long olgeta, mo oli ded.”

11 Mo hem bin givim wan komanmen long mi, se bae mi mekem baptaes long nem blong Papa, mo long nem blong Pikinini, we i fulap long gladhat mo trutok, mo long nem blong Tabu Spirit, we i stap testifae long saed blong Papa mo Pikinini.

12 Mo i bin hapen se Inok i bin gohed blong singaot long evri pipol blong oli sakem sin, be i no long ol pipol blong Kenahan;

13 Mo fet blong Inok i bin bigwan, mekem se hem i bin lidim ol pipol blong God, mo ol enemi blong olgeta oli bin kam blong faet agensem olgeta; mo hem i bin talem toktok blong Lod, mo graon i bin seksek, mo ol bigfala hil oli bin ronwe folem oda blong hem; mo ol reva blong wota oli jenisim rod blong olgeta; mo singaot blong ol laeon, man i save harem long waelples; mo evri nesen oli bin fraet tumas, from se toktok blong Inok i gat bigfala paoa, mo paoa blong lanwis we God i bin givim long hem i bin strong tumas.

14 Wan graon i bin kamaot aot long dip ples blong solwota, mo fraet blong ol enemi blong pipol blong God i bin bigwan tumas, nao oli bin ronwe mo oli bin stanap longlongwe, mo oli bin go long graon ia we i bin kamaot aot long dip ples blong solwota.

15 Mo ol bigfala man we oli dabolbun blong graon ia, olgeta tu, oli bin stanap longlongwe; mo wan strong nogud tok i bin go raon agensem evri pipol we i bin faet agensem God;

16 Mo stat long tetaem ia i go, i bin gat ol wo mo blad we i bin ron long medel blong olgeta; be Lod i bin kam mo i bin stap wetem ol pipol blong hem, mo oli bin stap long stret mo gud fasin.

17 Mo respek long Lod i bin stap long evri nesen, from glori blong Lod, we i bin stap long ol pipol blong hem, i bin bigwan. Mo Lod i bin blesem kantri ia, mo pipol ia i bin kasem blesing antap long ol bigfala hil, mo antap long ol hae ples, mo i bin gro gud.

18 Mo Lod i bin singaotem pipol blong hem, Saeon, from se oli bin gat wan hat mo wan maen, mo oli bin stap laef long stret mo gud fasin; mo i no bin gat puaman long medel blong olgeta.

19 Mo Inok i bin gohed blong prij wetem stret mo gud fasin long ol pipol blong God. Mo i bin hapen se long ol taem blong hem, hem i bin bildim wan bigtaon we oli singaotem Bigtaon blong Tabu Fasin, we i Saeon.

20 Mo i bin hapen se Inok i bin toktok wetem Lod; mo hem i bin talem long Lod: “I tru, Saeon bae i stap sef blong oltaem.” Be Lod i talem long Inok se: “Mi bin blesem Saeon, be namba blong ol pipol we i bin stap, mi bin sakem wan strong nogud tok long olgeta.”

21 Mo i bin hapen se Lod i bin soem long Inok evri pipol we oli stap laef long wol; mo hem i bin luk, mo i luk gud, Saeon, afta sam taem, we Lod i tekem hem i go insaed long heven. Mo Lod i bin talem long Inok: “Luk, ples we bae mi stap long hem blong oltaem.”

22 Mo Inok i bin luk tu namba blong ol pipol we i bin stap, we oli bin ol boe blong Adam; mo oli bin kamkamaot long evri laen blong Adam, be i no aot long laen blong Ken, from we laen blong Ken i bin blak, mo i no bin gat ples long medel blong olgeta.

23 Mo afta we Lod i tekem Saeon i go antap long heven, Inok i bin luk, mo i luk gud, evri nesen blong wol ia, oli bin stap long fored blong hem;

24 Mo wan jeneresen i kam folem wetem wan narafala jeneresen; mo Inok i bin stap antap mo hae antap, we i bin stap kolosap gud long Papa, mo long Pikinini blong Man; mo luk, paoa blong Setan i bin stap long ful fes blong wol.

25 Mo hem i bin luk ol enjel oli stap kamdaon aot long heven; mo hem i bin harem wan voes we i laod we i stap talem: “Sore tumas, sore tumas long ol pipol we oli stap laef long wol.”

26 Mo hem i bin luk Setan; mo hem i bin holem wan bigfala jen long han blong hem, mo jen ia i blokem fes blong wol wetem tudak; mo hem i bin luk i go antap mo i bin laf, mo ol enjel blong hem oli bin stap glad.

27 Mo Inok i bin luk ol enjel oli stap kamdaon aot long heven, oli stap testifae abaot Papa mo Pikinini; mo Tabu Spirit i bin stap long plante man, mo ol paoa blong heven i tekem olgeta i go insaed long Saeon.

28 Mo i bin hapen se God blong heven i bin lukluk long namba blong ol pipol we oli bin stap, mo hem i bin krae; mo Inok i bin testifae long hemia, i talem se: “?Olsem wanem nao i save hapen se ol heven oli krae, mo wota blong ae i ron olsem ren i stap foldaon antap long ol bigfala hil?”

29 Mo Inok i bin talem long Lod se: “?Olsem wanem nao i save hapen se yu save krae, from se yu yu tabu, mo yu stastap long ful taem we i no save finis i go kasem ful taem we i no save finis?

30 Mo sapos i posibol blong man i save kaontem namba blong ol smol pis blong wol, yes, ol milian wol olsem hemia, bae hemia tu i no stat blong namba blong ol kriesen blong yu; mo ol rido blong yu oli hang yet i stap be yu yu stap long ples ia yet, mo hat blong yu i stap long ples ia; mo yu yu gat stret fasin; yu yu gat sore mo yu yu gat kaen fasin blong oltaem;

31 Mo yu yu bin tekem Saeon i kam kolosap gud long yu; yu tekem Saeon aot long evri kriesen, aot long ful taem we i no save finis i go kasem ful taem we i no save finis; mo i no gat nara samting, be pis, jastis, mo trutok i stap long ples blong jea blong yu; mo sore bae i stap long fored blong fes blong yu mo i no gat en; ?olsem wanem nao i save hapen se yu yu krae?”

32 Mo Lod i bin talem long Inok se: “Luk olgeta brata blong yu; oli wanem we mi wokem long han blong mi, mo mi givim save blong olgeta long dei ia we mi bin krietem olgeta; mo insaed long Garen blong Iden, mi givim long man fridom blong hem blong mekem joes;

33 Mo mi bin talem long ol brata blong yu, mo mi bin givim komanmen long olgeta tu, se oli mas lavlavem olgeta bakegen, mo se bae oli mas jusum mi, Papa blong olgeta; be luk, oli no gat lav, mo oli no laekem nating stret bladlaen blong olgeta;

34 Mo faea blong kros blong mi i girap agensem olgeta; mo from mi no glad nating, bae mi sendem ol bigfala wota i ron antap long olgeta, from strongfala kros blong mi i girap agensem olgeta.

35 Luk, mi mi God; Man blong Tabu Fasin i nem blong mi; Man blong Advaes i nem blong mi; We I No Gat En, mo We I No Save Finis i nem blong mi tu.

36 Taswe, mi save stretem ol han blong mi i go mo holem evri kriesen we mi bin mekem; mo ae blong mi i save lukluk tru olgeta tu, mo long medel blong evri samting we mi bin wokem wetem ol han blong mi, i no gat wan bigfala fasin nogud olsem hemia we i stap long medel blong ol brata blong yu.

37 Be luk, sin blong olgeta bae i stap antap long hed blong ol papa blong olgeta; Setan bae i papa blong olgeta, mo harem nogud bae i fiuja blong olgeta; mo evriwan long ol heven bae oli krae from olgeta, we oli wanem we mi wokem long ol han blong mi; taswe, ?olsem wanem? ?Bae ol heven oli no save krae taem bae oli luk se olgeta ia bae oli safa?

38 Be luk, olgeta ia we ae blong yu i bin lukluk olgeta, bae oli ded long ol bigfala wota; mo luk, bambae mi sarem olgeta; wan kalabus ia, mi bin mekem rere i stap blong olgeta.

39 Mo hem we mi bin jusum hem, i bin krae long fes blong mi. Taswe, hem i bin safa from ol sin blong olgeta; sapos oli sakem sin blong olgeta long taem ia we Hem we mi bin Jusum bae i kambak long mi, be kasem dei ia, bae oli stap harem nogud nomo;

40 Taswe, from hemia nao bae ol heven oli krae, yes, wetem evri samting we mi bin wokem long ol han blong mi.”

41 Mo i bin hapen se Lod i bin toktok long Inok, mo i bin talem long Inok long saed blong evri samting we ol pikinini blong ol man oli stap mekem; taswe, Inok i bin save, mo i bin lukluk long fasin nogud blong olgeta, mo long harem nogud blong olgeta, mo i bin krae, mo i bin stretem han blong hem, mo hat blong hem i bin solap gogo i bigwan olsem taem we i no save finis; mo ol insaed blong hem oli fulap long sore; mo evri taem we i no save finis i bin seksek.

42 Mo Inok i bin luk Noa tu, wetem famli blong hem; se Lod bae i lukaotem gud laen blong evri boe blong Noa wetem wan gud laef long wol ia;

43 Taswe, Inok i bin luk we Noa i bin bildim wan bigfala sip; mo Lod i bin glad long hem, mo i bin holem bigfala sip ia long han blong hem; be long namba blong olgeta we oli nogud we oli bin stap, ol bigfala wota oli bin kam mo i bin solemdaon olgeta.

44 Mo taem Inok i bin luk hemia, bigfala konkon i kam long sol blong hem, mo hem i bin krae from ol brata blong hem, mo i bin talem long ol heven: “Bae i no gat wan samting bae i mekem mi harem gud;” be Lod i bin talem long Inok: “Leftemap hat blong yu, mo stap glad; mo luk.”

45 Mo i bin hapen se Inok i bin luk; mo stat long taem blong Noa, hem i bin luk evri famli blong wol; mo hem i bin krae long Lod, i talem se: “?Wetaem nao dei blong Lod bae i kam? ?Wetaem nao bae blad blong Stret mo Gud Man bae i ron, blong mekem se evriwan long olgeta we oli stap krae ia, bae oli kam tabu mo kasem laef we i no save finis?”

46 Mo Lod i bin talem: “Bae i hapen long medel blong taem, long ol taem blong fasin nogud mo fasin blong wantem stap givimbak.”

47 Mo luk, Inok i bin luk dei we Pikinini blong Man i kam, long mit mo bun; mo sol blong hem i bin stap glad, i talem se: “Oli leftemap Stret mo Gud Man, mo oli kilimded Smol Sipsip stat long stat blong wol; mo tru long fet, mi stap kolosap gud long Papa, mo luk, Saeon i stap wetem mi.”

48 Mo i bin hapen se Inok i bin lukluk i go long wol; mo hem i bin harem wan voes we i kamaot long ol insaed blong wol ia, we i stap talem se: “Sore tumas, sore tumas long mi, mama blong ol man; mi mi harem nogud, mi mi taed, from ol fasin nogud blong ol pikinini blong mi. ?Wetaem nao bae mi spel, mo bae mi kam klin long ol doti we oli kamaot long mi? ?Wetaem bae Krieta blong mi bae i mekem mi mi tabu, blong mi save spel, mo stret mo gud fasin i stap blong smol taem long fes blong mi?”

49 Mo taem Inok i bin harem wol i stap krae, hem i bin krae, mo hem i singaot i go long Lod, i talem se: “O Lod. ?Yu bae yu no gat lav mo sore long wol ia? ?Bae yu yu no blesem ol pikinini blong Noa?”

50 Mo i bin hapen se Inok i bin gohed long krae blong hem long Lod, i talem se: “Mi askem yu, O Lod, long nem blong Wan Stret Pikinini Ia Nomo blong yu, we i Jisas Kraes, se bae yu gat sore long Noa mo laen blong hem, blong mekem se i nomo gat ol bigfala wota we bae i kavremap wol ia.”

51 Mo Lod i no save holemtaet hemwan; mo hem i bin mekem wan kavenan wetem Inok, mo i bin promes long hem wetem wan strong promes, se bae hem i holemtaet ol bigfala wota; se bae hem i toktok wetem ol pikinini blong Noa;

52 Mo hem i bin sendemaot wan toktok we oli no save jenisim, se bae smol haf blong laen blong Inok, oltaem bae i stap long medel blong evri nesen, long taem we wol bae i stap;

53 Mo Lod i bin talem: “Mi blesem laen blong hem we bae Mesaea i kam tru long hem; from hem i bin talem—Mi mi Mesaea, King blong Saeon, Strong Ston blong Heven, we i bigwan olsem taem we i no save finis; huia i kam insaed, tru long get, mo i klaem i kam antap, tru long mi, bae i neva foldaon; taswe, mi blesem olgeta ia we mi jes tokbaot olgeta, from se bae oli kam wetem ol singsing blong wan glad we i no gat en.”

54 Mo i bin hapen se Inok i bin krae long Lod, i talem se: “Taem we Pikinini blong Man bae i kam long mit mo bun, ?bae wol i spel? Mi askem yu, Papa, blong yu soem olgeta samting ia long mi.”

55 Mo Lod i bin talem long Inok: “Luk, mo hem i bin lukluk i go, mo hem i bin luk Pikinini blong Man we oli leftemap hem antap long kros, folem fasin blong ol man;”

56 Mo hem i bin harem wan voes we i laod; mo wan vel i kavremap ol heven; mo evri kriesen blong God oli bin stap krae; mo wol i krae from i harem nogud; mo ol strong ston oli bin brok; mo evri sent oli bin girap, mo oli kasem wan hat blong king wetem glori long raet han saed blong Pikinini blong Man;

57 Mo evri spirit we oli bin stap long kalabus oli bin kam fored, mo oli bin stanap long raet han saed blong God, mo haf we i stap, oli stap long jen blong tudak kasem taem blong jajmen blong bigfala dei ia.

58 Mo bakegen, Inok i bin krae, mo i bin singaot i go long Lod, i talem se: “?Wetaem bae wol i spel?”

59 Mo Inok i bin luk Pikinini blong Man i bin gobak long Papa; mo Inok i askem long Lod i talem se: “Bae yu Lod, ?yu no kambak bakegen long wol? From we yu yu God, mo mi mi save yu, mo yu yu bin mekem wan promes long mi, mo yu yu bin givim wan komanmen long mi, se bae mi askem yu long nem blong Wan Stret Pikinini Ia Nomo blong yu; mo yu nao yu bin mekem mi, mo yu bin givim mi wan raet long jea blong yu, i no tru long miwan nomo, be tru long gladhat blong yu; taswe, mi askem yu, Lod, ?sapos bae yu kambak bakegen long wol o no?”

60 Mo Lod i bin talem long Inok: “Semmak olsem we mi laef, semmak, bae mi kam long ol las dei, long ol taem blong fasin nogud mo fasin blong stap givimbak, blong mekem strong promes we mi bin mekem long yu i hapen, promes ia long saed blong ol pikinini blong Noa;

61 Mo dei bae i kam we bae wol i spel, be bifo dei ia, ol heven bae oli kam tudak, mo wan vel blong tudak bae i kavremap wol; mo ol heven bae oli seksek, mo wol tu; mo bigfala hadtaem bae i kam long medel blong ol pikinini blong ol man, be bae mi mekem ol pipol blong mi oli stap sef;

62 Mo stret mo gud fasin, bae mi sendem i kamdaon aot long heven; mo bae mi sendem trutok i go long wol, blong testifae abaot Wan Stret Pikinini Ia Nomo blong mi; taem we hem i bin laef bakegen long ded; yes, mo tu, taem we evri man bae i laef bakegen long ded; mo bae mi mekem stret mo gud fasin mo trutok bae i swipim wol olsem wan bigfala wota, blong karem i kam wanples, olgeta we mi jusum aot long ol fo pat blong wol ia, i go long wan ples we bae mi mekem rere, wan Tabu Bigtaon, blong mekem se ol pipol blong mi oli save rere, mo oli stap wet from taem ia we bae mi kam; from tabenakol blong mi bae i stap ia, mo bae mi singaotem Saeon, wan Niu Jerusalem.”

63 Mo Lod i bin talem long Inok: “Nao long tetaem ia bae yu mitim olgeta, yu mo ful bigtaon blong yu, mo bae yumi tekem olgeta oli kam kolosap gud long yumi, mo bae oli luk yumi; mo bae yumi putum han blong yumi raon long nek blong olgeta, mo bae oli putum han blong olgeta raon long nek blong yumi, mo bae yumi kisim yumi;

64 Mo hemia i ples we bae mi stap long hem, mo bae hem i Saeon, we bae i defren long evri kriesen we mi bin mekem; mo blong wan taem blong wan taosen yia, bae wol i spel.”

65 Mo i bin hapen se Inok i bin luk dei we Pikinini blong Man bae i kam, long ol las dei, blong hem i stap long wol wetem stret mo gud fasin blong wan taem blong wan taosen yia;

66 Be bifo long dei ia, hem i bin luk ol bigfala hadtaem long medel blong ol nogud man; mo hem i bin luk solwota tu, se i stap muvmuv, mo hat blong man i nomo strong, mo oli bin stap wet wetem fraet long ol jajmen blong God we I Gat Olgeta Paoa, we bae i kam long ol nogud man.

67 Mo Lod i bin soem evri samting ia long Inok, i gogo kasem en blong wol; mo hem i bin luk dei blong ol stret mo gud man, aoa blong taem blong pemaot olgeta, mo hem i kasem wan glad we i fulwan;

68 Mo namba blong evri dei blong Saeon, long ol taem blong Inok, i bin tri handred mo sikstifaef yia.

69 Mo Inok mo evriwan long ol pipol blong hem oli bin wokbaot wetem God, mo hem i bin stap long medel long Saeon; mo i bin hapen se Saeon i nomo bin stap long wol, from we God i tekem hem i go kolosap gud long hem; mo stat long tetaem ia i go, toktok ia i stat: Saeon i Ronwe.