Fakaʻilekitulōnika Pē: Kakai Lalahi Kei Talavoú
Ko Hono Fakaloloto Hoʻo Mahino ki Ho Tāpuaki Fakapēteliaké
ʻI hoʻo ʻai ke hoko ho tāpuaki fakapēteliaké ko ha konga hoʻo moʻui fakaʻahó, te ke maʻu ai ʻa e mālohi mo e fakahinohino ʻoku maʻu mei he meʻafoaki fakalangi ko ʻení.
Faitaaʻi ʻe Lloyd Eldredge
Ko e fē taimi fakamuimuitaha naʻá ke lau ai ho tāpuaki fakapēteliaké?
ʻI ha māmani ʻoku fonu ʻi he ngaahi fili mahuʻingá, ʻoku hoko ho tāpuaki fakapēteliaké ko ha kāpasa fakatāutaha ke tokoni ki hono tataki koe ʻi he ngaahi faingataʻa ʻo e moʻui fakamatelié. Hangē ko e lea ʻa Palesiteni Thomas S. Monson (1927–2018) ʻo pehē: “Ko e tāpuaki fakapēteliaké ko ha fakahā ia ki he tokotaha ʻokú ne maʻú … ke maluʻi, ueʻi fakalaumālie, mo fakaʻaiʻai ʻa e mālohí mo e angatonú. ʻOku ʻi he tāpuaki fakapēteliaké ha ngaahi vahe mei hoʻo tohi ʻo e ngaahi tuʻunga malava taʻengatá.”1
ʻOku fakataumuʻa ho tāpuaki fakapēteliaké ke toutou ako ʻi he kotoa hoʻo moʻuí fakataha mo e folofolá mo e ngaahi lea ʻa e palōfitá, ko ia kapau kuo fuoloa hoʻo taʻe lau iá, mahalo te ke loto ke toe toʻo hake ia ʻo lau. Ko ha ngaahi fokotuʻu ʻeni ke tokoni atu ke mahino lelei ange ai kiate koe ʻa hono mahuʻinga ʻo ho tāpuaki fakapēteliaké pea ʻai ke hoko ia ko ha konga hoʻo moʻui fakaʻahó.
1. Lau mo Fakalaulauloto Maʻu pē Ki Ai
ʻE tokoni hoʻo toutou foki ki ho tāpuaki fakapēteliaké ke ke manatuʻi hono ngaahi lea fakalaumālié mo ʻiloʻi ʻenau fekauʻaki mo e ngaahi tuʻunga kehekehe ʻo hoʻo moʻuí. ʻI hoʻo toe lau ho tāpuakí, ʻokú ke fakahaaʻi ai ki he Tamai Hēvaní hoʻo loto fiemālie ke tuku ke Ne tataki koé.
Kapau te ke tuku ha taimi ke ako mo fakalaulauloto ai e ngaahi lea fakalaumālie ho tāpuaki fakapēteliaké, te ke lava ʻo maʻu ha meʻa foʻou mo ha mālohi ʻi he taimi kotoa pē ʻokú ke lau ai iá!
2. Kumi ha Faleʻi Fakalaumālie
ʻI hoʻo ako ho tāpuaki fakapēteliaké, manatuʻi ha faʻahinga fehuʻi pē te ke ala maʻu. ʻE lava ke kau he ngaahi fehuʻi ko ʻení ha faʻahinga meʻa pē mei he feituʻu ke ako aí mo hai ʻe mali mo iá. Neongo he ʻikai talaatu ʻe ho tāpuakí ʻa e meʻa kotoa maʻau, ka ʻe lava ʻo tokoni ke tataki koe ki ha feituʻu lelei. Hiki ha lisi ʻo e faleʻi pau ʻokú ke maʻu ʻi ho tāpuaki fakapēteliaké. Tauhi fakataha e lisi ko iá mo ho tāpuakí koeʻuhí ke ke lava ʻo toutou vakai ki ai mo vakai ki he kaunga ʻa e faleʻi pau ʻi ho tāpuaki fakapēteliaké ki hoʻo moʻuí.
3. Ako Fekauʻaki mo Ho Hakó
ʻOku tala atu ho tāpuaki fakapēteliaké pe ko hai ʻi he faʻahinga ʻe hongofulu mā ua ʻo ʻIsilelí ʻokú ke kau ki aí. ʻI heʻetau hoko ko e kau mēmipa ʻo e fale ʻo ʻIsilelí, ʻoku tau maʻu kotoa ha fatongia ke kau ʻi he ngāue ʻa e ʻEikí ʻi he ngaahi ʻaho kimui ní. Neongo pe ko e hā hotau faʻahinga paú, ka ko e hako kotoa kitautolu ʻo ʻĒpalahame, ko ia ʻoku tau maʻu kotoa ai e totonu ki he ngaahi tāpuaki ʻoku maʻu ʻi he fuakava faka-ʻĒpalahamé. Ako e ngaahi talaʻofa ʻi he fuakava ko iá mo e founga te ke lava ai ʻo fakahoko ho fatongia ki hono tānaki ʻo ʻIsilelí.
4. ʻIloʻi e Ngaahi Meʻafoakí mo e Ngaahi Talēnití
Fekumi ki ha ngaahi talēniti pau kuo tāpuekina ʻaki koe ʻe he ʻEikí. Mahalo he ʻikai fakamatalaʻi fakahangatonu ho tāpuakí ʻa e ngaahi meʻa ko ʻeni te ke malavá, ka ʻi hoʻo ako ho tāpuakí mo e fehuʻi ki hoʻo ngaahi meʻafoakí mo e talēnití, te ke lava ʻo ako lahi ange kiate koe. ʻE tokoni hono ʻiloʻi hoʻo ngaahi meʻafoaki fakalangí ki hono fakahoko ho misiona ʻi he moʻuí.
Ko e ngaahi tāpuaki fakapēteliaké ʻoku toputapu mo fakatāutaha ia. Ko ia ʻoku mahuʻinga ke ʻoua ʻe fakafehoanaki e ngaahi meʻa ʻi ho tāpuaki fakapēteliaké ki he niʻihi kehé. Hangē ko e fakamatala ʻa Palesiteni Monisoní: “Ko ho tāpuaki fakapēteliaké ʻoku ʻaʻau toko taha pē ia. ʻE lava pē ke nounou pe lōloa, mahino ngofua pe mahino ngataʻa. ʻOku ʻikai ke kaunga e tāpuaki fakapēteliaké ia ki he lōloá mo e lea fakafonuá. Ko e Laumālié ia ʻokú ne ʻomi e ʻuhinga totonú.”2
5. Manatuʻi Ho Mahuʻinga Fakalangí
ʻOku fonu ho tāpuaki fakapēteliaké ʻi he fakahinohino fakatāutaha mei hoʻo Tamai Hēvaní. Fakaʻilongaʻi e ngaahi lea ʻoku fakaʻaongaʻi ʻi ho tāpuakí ke fakamatalaʻi hoʻo hoko ko ha fānau ʻa e ʻOtuá. Tauhi ha lisi ʻo e ngaahi ʻulungaanga ko ʻení ke ke sio ki he founga ʻoku nau hoko ai ko ha fakamanatu ʻo ho mahuʻinga fakalangí. ʻI hoʻo fekumi ki he ngaahi potufolofola ʻoku nau fakamatalaʻi ko hai koé, te ke maʻu ha mahino lahi ange ki he anga e ʻafio mai ʻa e ʻOtuá kiate koé, pea ʻe tupulaki hoʻo fakamoʻoni ki ho mahuʻinga fakalangí.
6. Tauhi ha Fakakaukau ʻOku Taʻengatá
Neongo ko ha mape folau ho tāpuaki fakapēteliaké ke ne tataki koe ʻi he moʻui fakamatelié, ka ko ha kāpasa foki ia ke tataki koe ki he taʻengatá. Ko hono maʻu ha fakakaukau taʻengata ʻi he taimi ʻoku ako ai ho tāpuakí, ko e kī ia ki hono maʻu ha mahino ki hono mahuʻingá mo e moʻoni ko ia ko e ngaahi tāpuaki kotoa pē kuo talaʻofa maí—ʻo tatau ai pē pe ʻe maʻu ʻi māmani pe ʻi he moʻui ka hokó—ʻe fakahoko ia. Pea hangē ko e fakamatala ʻa ʻEletā Jeffrey R. Holland ʻo e Kōlomu ʻo e Kau ʻAposetolo ʻe Toko Hongofulu Mā Uá: “ʻE ʻi ai e ngaahi tāpuaki ʻe niʻihi ʻe hoko vave mai, ko e niʻihi ʻe hoko tōmui, pea ko e niʻihi ʻe toki hoko ʻi langi; ka ko kinautolu te nau tali lelei e ongoongolelei ʻo Sīsū Kalaisí, ʻe hoko ia.”3
ʻI hono toutou lau ho tāpuaki fakapēteliaké pea lau ia ko ha fakahinohino fakataautaha ki hoʻo moʻuí, te ke lava ai ʻo fehangahangai mo e ngaahi faingataʻa mo e ngaahi fili ʻoku hanganaki mai ʻi he loto-falalá. ʻE fakamālohia hoʻo ʻiloʻi ko ha fānau koe ʻa ha mātuʻa fakalangi, pea te ke maʻu ha mahino lahi ange ki ho misiona ʻi he māmaní.