Fakakomipiuta Pē
ʻOfa, Uouangataha, Fakaʻapaʻapa, mo e Anga Fakakaumeʻá—Ngaahi Pōpoaki Fakamuimuitaha mei he Kau Palōfitá mo e Kau ʻAposetoló
Vakai ki he meʻa ne toki akoʻi kimuí ni ʻe he kau palōfita moʻuí fekauʻaki mo e ngaahi tefito ko ʻení ʻi he mītia fakasōsialé.
ʻI he Veʻe Vaitupú, tā ʻe Crystal Close
Kuo lea ʻa e kau mēmipa ʻo e Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá ʻi he konifelenisi lahí ʻo kau ki he mahuʻinga ʻo e uouangatahá, fakaʻapaʻapá, mo e anga fakakaumeʻá. Kuo nau vahevahe foki ha ngaahi pōpoaki fekauʻaki mo e ngaahi tefito ko ʻení ʻi he mītia fakasōsialé, kau ai e ngaahi meʻá ni:
Ke ke Angaʻofa pea Fakangata ʻa e Fakakikihí
“Feinga ke angaʻofa ki he niʻihi kehé. ʻI he taimi naʻe ʻaʻahi ai ʻa e Fakamoʻui ko Sīsū Kalaisí ki he ongo ʻAmeliká, hangē ko hono lekooti ʻi he Tohi ʻa Molomoná, ko e taha ʻo e ngaahi ʻuluaki meʻa naʻá Ne akoʻí ko e fiemaʻu ko ia ke taʻofi ʻa e fakakikihí ʻi heʻetau moʻuí. Ko ia, kātaki ʻo manavaʻofa, ʻai ke ke maʻu ha mahino, fakatuotuai ki he fakamāú, pea vave ki he fakamolemolé.”
Palesiteni Russell M. Nelson, Facebook, Jan. 1, 2022, facebook.com/russell.m.nelson.
Fokotuʻu ha Laumālie ʻo e Ngāue Fakatahá
“ʻE lava ke fakahaofi moʻui moʻoni ʻa e anga fakakaumeʻá mo e fakaʻapaʻapá.
“Naʻá ku kau ʻi he niʻihi naʻe ngāue ke faʻu ha mīsini ki he mafú mo e maʻamaʻá, ʻa ia naʻe tokoni ʻi he kamataʻanga ʻo e tafa mafú. Naʻe ʻi ai ha laumālie lahi ʻo e fetokoniʻakí mo e fakaʻapaʻapá ʻi he niʻihi tokosiʻi ʻo kimautolu ne ngāue ʻi he tafaʻaki foʻou ko ia ʻo e fakatotolo fakafaitoʻó. Naʻa mau ʻilo naʻa mau feʻauʻauhi moʻoni mo e mahakí pea mo e maté. Naʻe fakahaofi moʻoni ʻa e ngaahi moʻuí ʻe heʻemau fetokoniʻaki ʻi he lova ke kamataʻi ha ngaahi founga fakafaitoʻo foʻoú.
“ʻOku malava pē ke kehekehe ʻetau fakakaukaú mo e niʻihi kehé ʻo ʻikai maumauʻi ʻa e fekau ʻa e Fakamoʻuí ke ʻmou feʻofaʻaki kiate kimoutolu, ʻo hangē ko ʻeku ʻofa kiate kimoutolúʼ (Sione 15:12). ʻOku malava pē ke kehe hoʻo fakakaukaú mei ho kaungāʻapí kae kei ʻofa pē ʻi he kaungāʻapi ko iá. ʻOku malava pē ke ʻfeʻauʻauhiʼ ʻi he laumālie ʻo e fefakaʻapaʻapaʻaki ʻa ia ʻokú ne ʻomi ʻa e lelei tahá ʻi he tokotaha kotoa pē.
“ʻOfa ke tau fakakaukau fakataautaha ki he meʻa te tau lava ʻo fai ke taʻofi ai ʻa e fakakikihí mei heʻetau moʻuí ʻi heʻetau tali ʻa e … lelei tahá, anga fakakaumeʻá, mo e fakaʻapaʻapá.”
Palesiteni Russell M. Nelson, Facebook, Jul. 3, 2021, facebook.com/russell.m.nelson.
Liʻaki ʻa e Loto-fakamāú pea Poupouʻi ʻa e Fakaʻapaʻapá
“ʻOku mau talitali lelei ʻa e ngaahi faingamālie ko ʻení ke fokotuʻu ai ha feohi fakakaungāmeʻa mo aleaʻi ha ngaahi ngāue fevahevaheʻaki ʻa ia ʻe hokohoko atu ke fakatupulaki ai ʻa e femahinoʻakí mo e fefakaʻapaʻapaʻakí.
“ʻOku fakatupulaki ʻetau moʻuí ʻi he faʻahinga feohi fakakaungāmeʻa peheé mo fakahoʻata e ngaahi akonaki mahuʻinga ʻa e Fakamoʻuí. …
“ʻOku ou toe fakaongo atu ʻeku kolé1 ki he kāingalotu ʻo e Siasí ʻi he feituʻu kotoa pē ke siʻaki ʻa e ngaahi ʻulungaanga mo e tōʻonga ʻo e loto-fakamāú pea poupouʻi ʻa e fakaʻapaʻapa ki he fānau kotoa ʻa e ʻOtuá. Ko e fakaʻilonga ʻeni ʻo e kau muimui moʻoni kotoa pē ʻo Sīsū Kalaisí.
“Kuo pau ke mahulu atu e liʻaki ʻo e loto-fakamāú ʻi he meʻa ʻoku tau lea ʻaki ʻi he tuʻunga malangá. ʻOku fiemaʻu foki ke tau siʻaki ʻa e ngaahi lea fakamamahi mo taʻeʻofa ʻi heʻetau fepōtalanoaʻakí, ʻi heʻetau ngaahi pōpoaki fakafoʻituituí pea ʻi he mītia fakasōsialé, pea mahuʻinga tahá, ʻi hotau lotó. ʻE hoko ʻeni ʻi heʻetau tali kakato ʻa e ngaahi akonaki ʻa e Fakamoʻui ko Sīsū Kalaisí, ʻa ia naʻá Ne folofola, ʻKe mou feʻofaʻaki kiate kimoutolu; [ʻo] hangē ko ʻeku ʻofa kiate kimoutolúʼ (Sione 13:34).
“Fakatauange te tau feinga ke muimui ʻiate Ia ʻaki ʻetau moʻui ʻo fakatatau ki Heʻene sīpinga māʻolungá, ʻofá, mo fakalūkufuá.”
Palesiteni Russell M. Nelson, Facebook, Jun. 14, 2021, facebook.com/russell.m.nelson.
Fakaleleiʻi ʻa e Ngaahi Faikehekehé
“Neongo ʻoku kei fakamamahi taʻefiemālie pē hotau sosaietí ʻi hono tokangaʻi e vā fetuʻutaki ʻo e tauʻatāina fakalotú mo e ʻikai filifilimānakó, ka ʻoku ou tui ʻoku ʻikai fiemaʻu ia ke nofo pehē. … ʻI heʻeku hoko ko e ʻAposetolo ʻa e ʻEiki ko Sīsū Kalaisí, ʻoku ou taukaveʻi ʻa e mahuʻinga fakaeʻulungaanga mo fakapolitikale ʻo hono fakaleleiʻi e ngaahi fepakipaki ʻoku lolotonga hokó mo fakaʻehiʻehi mei he ngaahi fepakipaki foʻoú.
“ʻOku totonu ke tau tali ʻa e moʻoni ko ia ko e kaungā tangataʻifonua kitautolu ʻoku tau fiemaʻu ʻa e niʻihi kehé, ko ha makatuʻunga fakapotopoto ia ki heʻetau moʻui fakatahá. ʻOku fiemaʻu heni ke tau tali ha ngaahi lao ʻoku tau fehiʻa ai, pea ke tau nofo melino mo ha niʻihi ʻoku kehe honau ngaahi tuʻunga ʻulungaanga mahuʻingá mei haʻatautolú. ʻI he taimi ʻoku taukapoʻi ai ʻe ha niʻihi ʻa e ngaahi leʻo fakatupuʻitá pe fakahoko ha fanga kiʻi fakaʻitaʻi iiki kehé, ʻoku totonu ke tukunoaʻi kinautolu ʻe he ongo tafaʻakí fakatouʻosi. Kuo ʻosi fuʻu lahi pē ʻa e ngaahi fekeʻikeʻi taʻefeʻunga ʻi hotau sosaietí. Kapau te tau tali fakafoki, ʻoku tau fakahehema ke fakafokiʻi atu ʻa e fakaʻitá.
“ʻOku ʻikai ko ha vaivaiʻanga ʻa hono fakaleleiʻi ʻo e ngaahi tuʻunga faingataʻá ʻo fakafou ʻi he alea fakaʻapaʻapá, ko ha ʻulungaanga lelei ia. Hangē ko e akonaki ʻa Sīsuú, ʻʻOku monūʻia ʻa e faʻa fakaleleí, ʻe ui ai ʻa kinautolu ko e fānau ʻa e ʻOtuáʼ (Mātiu 5:9).
“Ko e meʻa pē ʻoku fiemaʻu ki he uouangatahá mo e fengāueʻaki lahi ke poupouʻi ʻetau fiemaʻu angamaheni ki he tauʻatāina fakalotú, ko ʻetau tui tatau ko ia kuo fekauʻi kitautolu ʻe he ʻOtuá ke tau feʻofaʻaki, kau ai hotau ngaahi kaungāʻapi ʻoku kehe ʻenau tuí mo e anga fakafonuá.”
Palesiteni Dallin H. Oaks, Facebook, Nov. 12, 2021, facebook.com/dallin.h.oaks.
ʻOfa ʻo Hangē ko e ʻOfa ʻa Kalaisí
“ʻOku ou ongoʻi e maama, fakatuʻamelie mo e fakamoʻoni ʻoku maʻu mei he ivi tākiekina ʻo e Laumālie Māʻoniʻoní ʻi heʻeku manatua, fakalaulauloto, mo feinga ke faʻifaʻitaki ki he Fakamoʻui ʻo e Māmaní.
“… Kuo pau ke tau feinga ke ʻofa ʻo hangē ko Iá.
“Naʻe ʻikai ke Ne fakafaikehekeheʻi e tuʻumālié mo e masivá, ʻa e talavoú pe toulekeleká, ʻa e moʻui leleí pe mahamahakí. Naʻe ʻikai ke Ne liʻaki ʻa kinautolu ʻoku kehe ʻenau tui fakalotú pe ko kinautolu ʻoku kehe honau anga fakafonuá. Naʻá Ne ʻofeina e taha kotoa pē. ʻOkú Ne ʻofaʻi e taha kotoa pē. Pea kuó Ne fekau mai ke tau ‘feʻofaʻaki,’ ʻo hangē ko ʻEne ʻofa ʻiate kitautolú (Sione 15:12).”
Palesiteni Henry B. Eyring, Facebook, Dec. 20, 2020, facebook.com/henry.b.eyring.
Fakakau ʻa e Niʻihi Kehé
“ʻOku mamahi hoku lotó ke fakakaukau he ʻikai ongoʻi ʻe ha taha ʻoku ʻi ai ha feituʻu maʻanautolu ʻi he lotú he Sāpaté. ʻOku ʻi ai ha feituʻu maʻá e fānau kotoa ʻa e Tamai Hēvaní. ʻOku tau hoko kotoa ko ha mēmipa mahuʻinga ʻo e fāmili ʻo e ʻOtuá. Haʻu! Ko e fē pē ha feituʻu ʻokú ke ʻi ai, pe ko hai koe. …
“ʻOku ou fakatauange ʻe ngāue ʻa e kāingalotu ʻo e uōtí ʻi he laumālie ʻo e uouangatahá ke fakakau mai ʻa e niʻihi kehé. ʻOku totonu ke tau manatuʻi ʻoku mahuʻingaʻia pē ʻa e Fakamoʻui ko Sīsū Kalaisí ʻi heʻetau tupulaki fakatāutahá, kae ʻoua te tau loto fefakamaauʻaki. ʻOku ʻikai totonu ke tau fakafehoanaki kitautolu mo e niʻihi kehé. Tau feʻofaʻaki, pea manatuʻi naʻa mo Ia naʻá Ne ʻfai atu mei he ʻaloʻofa ki he ʻaloʻofa, ʻo aʻu ki Heʻene maʻu hono fonúʼ [Tokāteline mo e Ngaahi Fuakava 93:13].”
Palesiteni M. Russell Ballard, Facebook, Oct. 13, 2021, facebook.com/mrussell.ballard.
Fakahaaʻi ʻa e ʻOfá mo e Talitali Leleí
“ʻOku ou houngaʻia ko e ngaahi kaungāmeʻa moʻoni ʻi heʻeku moʻuí.
“Ko e kaungāmeʻa peheé, ko Faifekau Toketā ʻAnitelū Tila, faifekau mo e tokotaha fakateolosia ʻi he ʻUnivēsiti ʻOkisifōtí. ʻI heʻema fetaulakí, ne hangē kuó ma maheni fuoloá. ʻOkú Ne manavaʻofa, faitotonu, mo angaʻofa moʻoni. ʻOku mahulu hake homa vā fakakaungāmeʻá ʻi he ngaahi faikehekehe fakalotu mo fakafonua ne mei malava ke ma māvahevahe aí. Ka, ʻokú ma tokanga taha ki he ngaahi meʻa lahi ʻokú ma faitatau aí, hangē ko ʻema ʻofa ki he ʻOtuá mo ʻema holi ke vahevahe ʻEne ʻofá mo e niʻihi kehé.
“Kuó u ako ha meʻa lahi mei he malava fakanatula ʻa ʻAnitelū ke ʻofa mo tali hono ngaahi tokouá mo e tuofāfiné. ʻOkú ne fakafepakiʻi ʻa e tokanga pē kiate kitá pea ʻi he ngaahi ngāue taʻesiokitá, ʻokú ne talitali lelei ʻa e kakaí mei he ngaahi tūkunga kehekehe ʻo e moʻuí ki hono loto-foakí. Kuo ʻaonga kiate au mo Peti ʻa e ʻofa mo e talitali lelei ko iá lolotonga ʻema ʻaʻahi kiate ia ʻi he taimi kotoa pē ʻi ʻOkisifōtí.
“Feohi mo ha ngaahi kaungāmeʻa moʻoni ʻa ia ʻoku ʻikai ngata pē ʻi hoʻo fiefia aí ka te ke lava ʻo ako mei ai ha ngaahi lēsoni mahuʻinga. Te tau lava ʻi he foungá ni ʻo fakahoko ʻa e fekau lahi taha hono uá, ke ʻʻofa ki ho kaungāʻapí ʻo hangē pē ko koéʼ [Maʻake 12:31].”
ʻEletā Jeffrey R. Holland, Facebook, Feb. 28, 2022, facebook.com/jeffreyr.holland.
Lau ʻa e Tokotaha Kotoa ko e Kāinga
“ʻI heʻetau hoko ko e kau tangataʻifonua ʻo e māmaní, ʻoku lahi ange e meʻa ʻoku tau faitatau aí ʻi he meʻa ʻoku tau fakakaukau atu ki aí. ʻOku ʻikai ngata pē ʻene moʻoni ia kiate kitautolu ko e kau mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ka ki he fānau kotoa foki ʻa ʻetau Tamai Hēvaní. …
“Kapau te tau tokanga taha pē ki he ngaahi aʻusia mo e ʻamanaki ʻoku tau faitatau ai he moʻuí, ʻoku ʻikai totonu ke fuʻu faingataʻa ke feohi mo e fakafoʻituituí, tukui koló, mo e ngaahi puleʻangá—ʻo tatau ai pē pe ko e fē feituʻu ʻoku tau nofo aí pea tatau ai pē pe ko e hā hotau puipuituʻá pe tūkunga ʻo e moʻuí.
“Kapau kuo akoʻi mai ʻe he hisitōlia ʻo e māmaní ha meʻa, ʻoku tau ako ai ko ha faʻahinga fakahehema ia ʻa e tangatá ke tau fakakaukau ko kitautolu pē ʻa e ʻkau tangata leleíʼ—ʻo hangē ko e kau moʻungaʻi tangata ʻo e talanoá. Pea ko kinautolu ʻoku kehe ʻenau fakakaukaú mo e tōʻongá? Ko kinautolu ia ʻa e ʻkau koví.ʼ
“ʻI heʻetau lau ko e filí ʻa e niʻihi kehé, ʻoku tau fekumi ai ki he kovi taha ʻiate kinautolú pea mo e lelei taha ʻiate kitautolú.
ʻOku tau fakamaauʻi hotau tafaʻakí ʻaki ʻetau ngaahi taumuʻa leleí, pea mo honau tafaʻakí ʻaki ʻenau ngaahi tōʻonga koví.
ʻOku akoʻi kitautolu ʻe he ongoongolelei ʻo Sīsū Kalaisí ke tau fakatupulaki ʻa e ʻofá ʻi hotau lotó kae ʻoua kuo tau vakai ki he kakai tangata mo fafine kotoa pē ko hotau kaungāʻapi—ko hotau kāinga. ʻOku fakatahaʻi mo fakamaʻumaʻulutaʻi ʻe Heʻene ongoongoleleí ʻa e tangata, fefine, mo e fānau kotoa pē. ʻOkú ne akoʻi ʻoku ʻikai ko ha ngaahi fili kitautolu, ka ko e fāmili fakalangi mo taʻengata pē kitautolu; ko e ngaahi foha mo e ngaahi ʻofefine ʻa ha Tamai Hēvani ʻofa.”
ʻEletā Dieter F. Uchtdorf, Facebook, Oct. 18, 2021, facebook.com/dieterf.uchtdorf.
Fakamālohia e Ngaahi Vā Fetuʻutaki mo e ʻEikí pea mo e Niʻihi Kehé
“ʻOku hoko e feohi fakakaungāmeʻá ko ha konga mahuʻinga ia ʻo ʻetau moʻuí. ʻI heʻetau fakahoko mo moʻui ʻaki ʻetau ngaahi fuakava mo e ʻOtuá, ʻoku tau feohi mo kau fakataha ai. ʻI heʻetau haʻisia ki he fuakavá, ʻoku tau fefakamālohiaʻaki ai ʻi Heʻene ʻofá, ʻo tau malava ai ke ʻofa lahi ange ki he ʻOtuá mo e niʻihi kehé. ʻI he haʻisia ki he fuakavá, ʻoku ʻuhinga ʻa e kau ki he ʻOtuá mo fekauʻaki ʻiate kitautolú ke tau fiefia ʻi he ngaahi tūkunga taʻeʻamanekiná ʻo hangē ko ʻetau mamata ʻaki ʻa e mata ke mamatá mo fanongo ʻaki ʻa e telinga ke fanongó. ʻOkú Ne liliu kitautolu mo hotau ngaahi vā fetuʻutakí ke tau hoko ʻo tatau ange mo Ia mo ʻEne ngaahi fetuʻutakí. ʻOfa ke fakamālohia kitautolu ʻi hotau vā fetuʻutaki mo e ʻEikí pea mo e niʻihi kehé ʻi heʻetau fononga fakataha ʻi he hala ʻo e moʻuí.”
ʻEletā Gerrit W. Gong, Facebook, Jul. 30, 2021, facebook.com/gerritw.gong.