Taitaia e Braden le Ala
E alala le tusitala i Kalefonia, ISA.
O lenei tala sa tupu i Louisiana, ISA.
Sa maoae le ola i le faatoaga o alikaita. Ae e tasi le mea na misi.
“Ia fai oe ma faaa’oa’o i e ua faatuatua” (1 Timoteo 4:12).
Sa tauave e Braden ma Tama ni pakete mamafa o meaai a alikaita e agai atu i le pa e fafaga ai. Na o ifo i luga ulu o alikaita ma faasee agai mai ia i laua. Ina ua taunuu atu Braden ma Tama i le mea e fafaga ai, sa faamaga mai e nisi o alikaita o latou gutu.
Ae sa le’i fefe Braden. O le galulue faatasi ma Tama i le faatoaga a alikaita o le mea sili lea.
“Taimi o le fafagaina!” Na fai mai ai Braden. Sa ia asuina i luga meaai ma lafoina i totonu o le vai.
Chomp. Chomp. Pisi.
O nisi o alikaita na pueina ia meaai i le ea. O isi na osofaia meaai ina ua pa’i i le vai. Sa tauai pea e Braden ma Tama meaai seia oo ina gaogao a laua pakete.
“Faafetai mo le fesoasoani mai ia te au,” o le tala lea a Tama. “Ta o. O le a le toe mamao ona o mai lea o faifeautalai.”
Na amata ona talanoa atu Braden ma lona aiga i faifeautalai i ni nai masina ua mavae. Sa fiafia o ia i faifeautalai! Ma sa fiafia o ia e aoao e uiga i le Ekalesia. O Tama sa o se tagata o le Ekalesia, ae e le’i toe alu i le lotu i se taimi umi. E le’i papatisoina lava Tina ma Braden.
“O le vaiaso ua te’a na e faatuina ai se sini e faitau le Mosaea 18,” o le faapea mai lea a Sister Cox i lena afiafi. Na faapefea mai lena mea?
Sa tilotilo atu Tina ma Tama i le tasi ma le isi ma sa filemu mo sina taimi. “Sa matou pisi i lenei vaiaso,” o le tala lea a Tina.
“Sa ou faitaua!” Na fai mai ai Braden.
“Malo lava!” Fai atu ai Sister Blood, ma aapa atu ai mo se lima faamalo. “O a ni ou lagona ina ua uma ona e faitaua?”
Na ataata tele Braden. “Lelei tele. Ma sa ou tatalo e uiga i le papatisoina. Ou te manao moni i ai!”
“Lelei tele! Ou te iloa o le mea lena e fiafia tele ai le Tama Faalelagi,” o le tala lea a Sister Cox. Sa ia liliu atu i le tina o Braden. “O le a sou lagona i ai?”
“Ou te le’i mautinoa lava. Ou te iloa ou te manaomia teisi se taimi,” o le tala lea a Tina.
Sa lagona e Braden sina faanoanoa i le taimi atoa na totoe o le lesona. Sa moomoo o ia o ona matua uma o ni tagata o le Ekalesia. Ma sa manao foi o ia e avea ma tagata o le Ekalesia!
Ina ua o ese faifeautalai, sa ia ta’u atu i ona matua e moni lava lana tala lea sa fai talu ai nei. “Ua matuai ou fia papatiso lava. Ma … ,” sa manava Braden i totonu. “Ou te matuai manao lava ia Tama e papatisoina au.”
Ina ua mavae sina taimi, sa talanoa mai Tama. “Ou te matuai manao lava foi i ai.”
Sa filemu Tina. “Tatou Tatalo e uiga i ai”
Sa tootutuli i lalo Braden ma lona aiga ma ole atu i le Tama Faalelagi pe tatau ona papatisoina o ia ma Tina. Sa ia lagonaina le mafanafana ma le alofaina.
Mo ni nai vaiaso na sosoo ai, sa faitau Braden i tusitusiga paia ma tatalo i aso uma. I le taimi muamua, o ia lava le tagata na fesili i ona matua pe latou te tatalo ma faitau faatasi ma ia. Ae e lei umi, ae amata ona la’ua fesili atu ia te ia. Ina ua fafagaina e ia ma Tama alikaita, la te talanoa e uiga i tusitusiga paia po o mea na la aoaoina i le lotu. E talanoa o ia ma Tina e uiga i lesona a faifeautalai. O aso uma lava, e foliga fiafia ai Tina ma Tama.
I se tasi aso i le taimi o se lesona ma faifeautalai, na ta’u atu e Tina ia upu sa faatalitali i ai Braden: “Ou te fia papatiso.”
Mo ni nai vaiaso na sosoo ai, na lagona e Braden ua pei na faaopeopea o ia i ao.
Ua oo, i le aso o le papatisoga o Tina ma Braden. Ina ua alu a’e i luga Braden mai le vai, sa ia lagonaina le alofa o le Tama Faalelagi ia te ia ma lona aiga. Sa ia tuu atu se opo lapo’a i lona Tama.
Sa opo mai faalatalata e Tama Braden ma musumusu atu i ai, “Faafetai lava mo le avea o oe o se faataitaiga lelei ma fesoasoani ia i ma’ua. Ou te alofa ia te oe.”
Ata na tusia e C.B. Canga