O se Uo Fou mo Ueligitone
O lenei tala sa tupu i Rio de janeiro, Pasila.
“O tagata uma iinei e sili atu ona matutua nai lo a’u nei! E faapefea ona ou talanoa atu ia i latou?”
“Ua Tutusa Tagata Uma i le Atua” (2 Nifae 26:33).
Na uu e Ueligitone se pusa i ona vae a o tietie atu ma lona tama i Rio de Janeiro, Pasila. Sa la’ua pasia ni fale e lanu moana, meamata, ma le samasama. Sa paka e tama le taavale i fafo o se fale tele lanu enaena. Sa alu i fafo Ueligitone ma aveatu nisi pusa. Sa tumu i fasimoli, pepa solo, ma isi sapalai.
Sa la asiasi atu ma lona tama i se fale e tausia ai tagata matutua e tuuina atu ni sapalai i tagata matutua o e sa nonofo ai iina. I le taimi muamua, sa fiafia Ueligitone. Ae o lenei ua ia lagonaina sina fefe. Mata o le a faapei tagata iina? Pe mata o le a mataita? O le a sana tala e fai atu ia i latou?
Sa savali atu Ueligitone i totonu o le fale i tua o lona tama. Sa toatele tagata i le fale e nonofo ai tagata matutua. O nisi na feoa’i solo ma fatafaasavali. O nisi sa nonofo i nofoa faataavalevale, ma taaalo i le mu. O isi na o le nonofo na o i latou.
Sa u’uina e Ueligitone le lima o Tama. “Tama, ou te le iloa le mea e fai,” na ia musumusu atu ai. “O tagata uma iinei e sili atu ona matutua nai lo a’u nei! E faapefea ona ou talanoa atu ia i latou?”
Sa ataata Tama ma tootuli ifo i autafa o Ueligitone. “Ou te iloa e matutua atu tagata iinei, ma atonu foi e foliga ese. Ae o tagata uma iinei o se atalii o le Atua, e pei lava o oe! Atonu o loo i ai ni a latou tala mananaia e faamatalaina.”
Sa mafaufau Ueligitone i lena mea. E fiafia o ia e fai ni uo fou ma isi tamaiti i le aoga ma le Peraimeri. Atonu e mafai foi ona ia faia ni uo iinei!
A o tufaina atu e Tama ia pusa, na alu solo Ueligitone ma talanoa atu i tagata sa saofafai i le potu. Sa ia usuina nisi o ana pese Peraimeri e sili ona fiafia i ai ia i latou. E le’i umi ae talie le toatele o tagata ma pepese faatasi. Sa matuai malie tele lenei mea!
Sa tilotilo solo Ueligitone. Sa ia matauina se tamaitai o saofai na o ia i luga o se nofoa. E sinasina lona lauao ma tele ni maanuminumi.
Sa la savali atu agai ia te ia ma saofai i lalo i le nofoa. “Malo!” o lana tala lea. “O lo’u igoa o Ueligitone. Ae a oe?
Sa ia tepa mai ia te ia ma ata. “O A’u o Mariana,” o lana tala lea.
Sa popole Ueligitone, o lea na ia fesili atu ai i le fesili muamua e mafai ona ia mafaufau i ai. “O le a le meaai e te fiafia i ai?”
Sa ia mafaufau mo sina sekone. “E masani lava ona ou fiafia i le pão de queijo (pani sisi),” o lana tala lea.
“O le mea lena e sili foi ona ou fiafia i ai!” o le tala lea a Ueligitone. Sa fiafia o ia i tama’i pani sisi.
Sa amata ona la talanoa e uiga i pese, taaloga, ma manatuaga e fiafia i ai. Sa ta’u atu e Mariana ia te ia mea sa masani ona fiafia e fai a o laitiiti lava o ia.
“Faafetai lava mo lou sau iinei i lenei aso,” o lana tala lea. “E leai ni o’u aiga e o mai ma asiasi mai ia te a’u, ma e faigata ona faia ni uo fou.” Sa faanoanoa mata o Mariana. “O nisi taimi ou te lagona ai le tuuatoatasi.”
Sa le mautinoa e Ueligitone le tala e fai atu. Sa ia mafaufau i lona faanoanoa pe ana faapea e leai ni ana uo po o aiga e talanoa i ai. Ona ia mafaufau lea i le tala a lona tama e uiga i tagata uma i le avea ai ma se atalii o le Atua.
Sa ataata o ia ma tilotilo atu ia Mariana. “A ou tuuatoatasi, ou te fiafia e tatalo i le Tama Faalelagi. E Na te fesoasoani ou te maua ai lagona lelei. Ou te iloa e le’o tuuatoatasi a’u aua e mafai ona ou talanoa ia te Ia i taimi uma. Atonu e mafai foi ona e taumafai e tatalo foi.”
Sa ataata Mariana ma fusi ia Ueligitone. “Faafetai lava. Ou te manatu o se manatu lelei tele lena.”
E le’i pine ae sau Tama ia Ueligitone ma popo lona lima. “Ua oo i le taimi ta te o ai,” o lana tala lea.
“Ua uma?” o le tala lea a Ueligitone.
Sa ata Tama. “Aua e te popole. E mafai ona ta toe o mai i le vaiaso fou. ”
O lena mea na fiafia ai Ueligitone. Sa ia oso ese mai le nofoa. “Toe feiloai i le isi taimi!” sa ia fai atu ai i a Mariana.
Sa ataata o ia a o talotalo atu ma faatofa i lana uo fou. Sa le mafai ona onosai lona toe fia sau!
Ata na tusia e Liz Brizzi