Tusia e oe

O Le A Ou Toe Vaai i Lo’u Tuagane

Saunia e Isapela S., 11 tausaga, Iuta, ISA

O le isi vaiaso o le aso fanau a lo’u tuagane laititi o Kaperielu. Semanu e fitu ai ona tausaga, ae sa le atoatoa lona mafaufau ma maliu ai i le lua tausaga ua mavae. I le Peraimeri sa matou usuina ai le “Ketesemane.” Sa manino ma anoa ia upu. Sa faatumulia ai le potu i le Agaga.

Ina ua uma le pese, sa tuuina atu e Sister Webster lana molimau e uiga i le Togiola a Iesu Keriso. Sa faatumulia atili ai le potu i le Agaga. Ona ia talanoa mai lea e uiga i le maliu o lona tuagane i ni nai tausaga ua mavae. Sa ou mafaufau ai ia Kaperielu, ma na toeitiiti lava a amata ona ou tagi. Sa ou mafaufau i le taimi na ou fusiina ai Kape mo le taimi mulimuli. Sa ou faanoanoa, ae sa ou lagonaina foi le filemu.

Sa talanoa Sister Webster e uiga i lona fiafia tele i lona iloa o le a ia toe vaai i lona tuagane. Fai mai o ia, na ia iloaina o i tatou uma o le a vaai i e pele ia i tatou o e ua maliliu.

Ina ua uma le Peraimeri sa ou fusi atu ia Sister Webster. Sa ma fetagisi faatasi mo ni nai minute. Sa matua malosi le Agaga. Sa ia ta’u mai ia te au o le a ou toe vaai i lou tuagane laitiiti. Sa ia fai mai o le Togiola a Iesu Keriso e le mo na o le amioleaga ae faapea foi mo le tiga. Sa ia fesili mai po o le a le mea e sili ona ou misia ai Kape, ma sa ou fai atu, sa matua ou misia lava lana ata.

Sa ou faamatala atu ia Sister Webster sa ou faanoanoa aua o le aso fanau o Kaperielu ia lena vaiaso ma sa manaomia tele lou iloaina o le a ou toe vaai i lo’u tuagane. Sa ia ta’u mai ia te au o loimata sa ma fetagisi ai, o loimata o le fiafia. Sa ou lagonaina le Agaga, ma na ou iloaina le moni o lana tala na fai mai. Ou te mautinoa o le a ou toe vaai ia Kaperielu, ma ua ou matua fiafia ai lava. Ou te alofa ia te ia. Ou te iloa ona o le alofa o Iesu Keriso ia te au, na Ia ofoina mai Lona ola ina ia mafai ai ona ou toe vaai ia Kaperielu.