O Le Solo a le Auso
E alala le tusitala i Iuta, ISA.
“Ua faafofoga mai Iesu, i a’u pese fai lemu” (viiga, nu. 140).
Sa faigata ona faalogoina ia nota uma. Pe mafai ona lava le lototele o Sofia e pese ai?
Sa fiafia Sofia e pese. Sa ia pese i le aoga, i fale o ana uo, ma i le aiga. O lona nofoaga e sili ona fiafia e pese ai o le lotu.
“Tina,” o le fesili lea a Sofia i se tasi aso, “ou te fia aoao ia faalelei atili la’u pese. E te manatu e mafai ona ave ni a’u lesona?”
“E foliga mai o se manatu lelei lena,” sa fai atu ai Tina. “Se’i ou vaai atu i se mea e mafai on ou mauaina.”
Sa le’i faigofie le pese i taimi uma mo Sofia. Sa tutuli o ia ma sa le mafai e ia ona lagona uma le tele o faaleoga. Sa i ai se tama’i masini sa i tua o ona taliga e fesoasoani ia te ia e mafai ona faalogo. E i ai se eseesega laititi o le lagonaina o mea e ia nai lo isi tagata. Ae sa fiafia lava Sofia e pese.
“Tala lelei, Sofia!” Sa fai mai tina i nai aso mulimuli ane. “Sa ou mauaina se vasega e mafai ona e auai. O se aufaipese ma isi tamaiti o e o loo aoao e pepese faatasi. Na fai mai le faiaoga e mafai ona e amata taeao!”
Sa sivasiva laitiiti Sofia. Sa matuai fiafia lava o ia!
Ae i lena po, sa amata ona ia popole.
“O e fiafia i lau vasega i le aso a taeao?” o le fesili lea a lona uso matua o Kayla.
Sa lue atu le ulu o Sofia. “Ioe. Ua fai lava si ou fefe laitiiti. Maimau pe ana ou le alu na’o au.”
“E mafai ona e faia!” Na fai mai ai Kayla. “Ae pe mata e fesoasoani pe a ta o? E mafai ona ta aoao e pepese faatasi.”
Na fusi e Sofia ia Kayla. “O le a sili lena.”
O le taeao na sosoo ai, na vave ala Sofia ma Kayla e o i le la vasega pese. Sa oo mafaufauga popole i le mafaufau o Sofia a o ia oso i totonu o le taavale. Ae faapefea pe afai na te le malamalama i le faiaoga? Ae faapefea pe afai e le maua ni ana uo? Ae faapefea pe a sioa atu tagata ia te ia?
Sa ave atu e tina le taavale i totonu o le pakaga ma faliu atu e tilotilo ia Sofia. Sa punou ifo i lalo Sofia i lona nofoa.
“Ou te le mautinoa pe ou te toe fia alu,” o lana tala lea.
“O le a le mea ua tupu?” O le fesili lea a tina. “Sa matuai e fiafia lava i le taimi muamua.”
E le’i faia se tala a Sofia. Sa ia tilotilo ifo i lalo ma kiki ona vae i tua ma luma.
Na ataata atu Tina. “Aua e te alu pe afai e te le fia alu. Ae afai e te popole, e mafai ona e tatalo i le Tama Faalelagi, ma o le a Ia fesoasoani ia te oe! Ma o le a i ai foi iina Kayla.”
Sa uu e Kayla ia le lima o Sofia. “Tate mafaia!” o lana tala lea.
Sa folo pata to [manava loloa]Sofia. Sa pei ua tumu lona manava i pepe felelei, ae na ia oso lava i fafo o le taavale. Sa ia pipiimau i le lima o Kayla a o la savavali atu i totonu o le potuaoga.
Mo nai aso muamua o le vasega, sa nofo ai lava Sofia i taimi uma i talaane o Kayla. Ona oo lea i se tasi aso, sa matauina ai e Sofia se teineitiiti sa masani lava ona nofo na o ia. Atonu foi sa fefe o ia. Sa alu Sofia ma nofo i ona autafa.
“Talofa!” Na fai atu ai Sofia. “E mafai ona ou nofo i i?” Na luelue atu le ulu o le teineititi. E le’i umi ae la talie ma pepese faatasi. Sa fiafia Sofia sa lava lona lototele e faia ai se uo fou.
O le pepese ma le kulupu sa matuai malie lava! Sa fiafia Sofia i le aoaoina o nota ma sa tata lona vae i le pa’ō o le musika. Sa mafai foi ona ia aoaoina nisi o tamaiti i le faiga o upu i le gagana faitaga.
I se tasi aso sa faia ai e le faiaoga se faasilasilaga fiafia. O tagata uma o le vasega o le a mafai ona usu ni vaega solo se tolu i se polokalama faapitoa. I le fale, sa galulue malosi ai Kayla ma Sofia e faataitai a la solo. E le’i umi ae mafai ona usuina e Sofia ia vaega muamua e lua o le solo. Ae o le vaega mulimuli na matuai faigata lava! Sa le mafai ona ia lagonaina nota uma. E faapefea ona ia usuina na o ia i luma o le toatele o tagata?
Sa manatua e Sofia le tala a lona tina e uiga i le tatalo i le Tama Faalelagi mo se fesoasoani. Sa ia tootuli i ona tulivae. “Le Tama Faalelagi, e ese le faigata o lenei pese mulimuli mo au. E mafai ona e fesoasoani mai ia te au e su’e se auala e usuina ai ma le le popole tele?”
I lana vasega pese na sosoo ai, na sau ai le faiaoga a Sofia ia te ia. “Ou te iloa o loo e popole i lau solo lona tolu. E te fia usuina faatasi ma Kayla? E mafai ona avea ma solo a le auso!”
Sa ataata Sofia. Sa ia lagonaina le mafanafana ma le fiafia. Sa ia iloa o loo tali e le Tama Faalelagi lana tatalo.
I le faafiafiaga, na usuina ai e Sofia ana pese solo muamua e lua ma le lototele. Ina ua oo i le taimi o lana solo lona tolu, sa ia oso i luga ma uu atu le lima o Kayla. Sa la savavali atu i luga o le tulaga ma usu leotele ma le mitamita le la solo a le auso. E le’i lagona e Sofia se popole po o le fefe ! Sa tali mai le Tama Faalelagi i lana tatalo i se auala na te le’i faamoemoeina, ae sa matuai faafetai o ia ona sa Ia faalogo mai pea ia te ia.
Ata na tusia e Alyssa Petersen