O Le Faamanatu FMT
E alala le tusitala i Kuala Lumpur, Meleisia.
O lenei tala sa tupu i Bulacan, Filipaina.
“Ia faia mea e tatau ma lelei i le silafaga a le Atua” (Teuteronome 6:18).
“Manatua pe o ai oe ma le mea o loo e tu ai,” o le tala lea a Sister Aquino.
Sa ataata Raish a o savali ese atu i fafo o le falesa. Sa ia faalogoina ni musika piano o sau mai lalo o le faletele. Ua oo i le taimi o le Peraimeri!
“Fai mea tonu ma fiafia,” sa usuina e Raish faatasi ma isi tamaiti. “O le a ou faia pea mea sa’o.”
Ina ua uma le taimi o pesepesega, sa tu Sister Aquino i le pito i luma o le potu. “E i ai se isi o i ai pea latou mama FMT?” o lana fesili lea.
Na sii i luga le lima o Raish. “O a’u!” sa ia fai atu ai. “Ou te teuina i totonu o la’u pusatoso i le fale.”
“Manaia tele lena, Raish,” o le tala lea a Sister Aquino. “Ou te manatua a o o’u laitiiti, sa ta’u mai pea e lo’u tina ia te au, ‘Manatua pe o ai oe ma le mea o loo e tu ai.’ Ou te faamoemoe o le a faia e outou uma le mea sili e filifili ai le mea sa’o. ”Ina ua taunuu Raish i le fale mai le lotu.
Sa ia tamoe atu i lana pusatoso ma aumai i fafo lana mama FMT. Sa manao o ia e faatele ona ia faamauluina e fesoasoani ai e faamanatu ia te ia e filifili le mea sa’o.
O le aso na sosoo ai i le aoga, na ave ai e Raish lana meaai i le laulau lea e nonofo ai lava i taimi uma ana uo. Sa fiafia lava o ia e talanoa ma Nadine ma Bituin!
Sa talie Raish ma ana uo i latou ata e fiafia i ai ina ua savali atu i ai se teineitiiti fou. Na nofo ifo o ia i talaane o Nadine. “Talofa,” sa ia fai atu ai lemu. “O a’u o Imelda.”
“Ia, tulou lava!” Na fai atu Nadine. “O la matou laulau lea.”
Na tu i luga Imelda. “Oi,” sa ia fai atu vave ai. “Faamalie atu.” Sa tilotilo ifo i lalo ma savali ese atu.
Sa olo le muaulu o Raish. “Aisea na e talanoa ai faapena?” na ia fesili ai ia Nadine. “E tatau ona tatou agalelei ia te ia. E fou o ia ma e ono ia manaomia foi ni uo.”
“Ae o le tatou laulau lea,” o le tala lea a Nadine.
“Ioe,” o le tala lea a Bituin.
Sa tilotilo ifo Raish i lalo i lana meaai. Sa ia lagona le faanoanoa mo Imelda. Ae sa fefe o ia e toe fai atu nisi tala. Ae faapefea pe a feitai Nadine ma Bituin ia te ia?
O lena po, sa mafaufau pea Raish e uiga ia Imelda. Sa filifili o ia e fai se tatalo. “Tama Faalelagi, faamolemole fesoasoani mai ia ou iloa le mea e fai e uiga i a’u uo. Fesoasoani mai ia te a’u e filifili le mea sa’o.”
A o faagasolo pea le vaiaso, sa vaavaai Raish mo Imelda i aso uma i le taimi o le malologa. Ma o aso uma, na vaaia e ia Imelda o nofonofo na o ia. Sa lagona e Raish le faanoanoa mo ia. Sa manao o ia e valaaulia Imelda e nofo i le latou laulau, ae e ono mafai ona tu atu o ia ia Nadine ma Bituin? Sa leiloa e Raish po o le a le mea a fai.
I se tasi aso sa vaaia ai e Raish Imelda o savali pasi ane i le latou laulau. “Vaai i le teine fou,” o le tala leotele lea a Nadine. “O lana meaai o loo afifi i le lau fa’i. E le manaia!”
Na ata Bituin. “E le o i ai se tupe a lona aiga e faatau ai se pusa e tuu ai lana meaai.”
Sa ū e Imelda lona laugutu. Sa amata ona savali televave ese o ia.
Na tilotilo atu Raish i le mama FMT i lona lima. Sa manao o ia e filifili le mea sao. Ona oso mai lea o se manatu i lona mafaufau. O le mea lea na fai mai ai Sister Aquino i le Peraimeri. Manatua pe o ai oe ma le mea o loo e tu ai. Sa manao o ia ia agalelei i taimi uma ma tu atu mo le mea tonu.
Na liliu atu Raish i ana uo. “Faamolemole taofi loa,” o lana tala lea. “E le’o faia e Imelda se mea ia te oulua. Na o le tuu lava pea o ia.”
Na tuuina atu e Nadine se vaaiga ita ia Raish.
Na tu i luga Raish. “O le a ou alu ma te nonofo ma Imelda,” o lana tala lea. Sa ia aveina atu ana meaai i le laulau gaogao lea sa nofo ai Imelda. Sa foliga te’i Imelda.
“Talofa,” sa fai atu ai Raish. “Ou te faamalie atu ona matou te le’i agalelei tele ia te oe. Ou te fia avea ma au uo.
Sa ataata Imelda. “Faafetai,” sa ia fai atu lemu ai.
Sa ataata atu Raish. Sa fiafia o ia ona e mafai ona avea o ia ma uo a Imelda. Ma sa fiafia o ia na ia filifilia le mea sao.
Ata na tusia e Jennifer Eichelberger