O Paionia i Atunuu Uma
Julia Mavimbela
Taitai o le alalafaga i Aferika i Saute
“E na o le faamagalo atu o isi e oo mai ai le alofa.”
Na solo e Julia lona muaulu. Ona ia siiina lea o lana suo ma amata ona eli. I le taimi nei, o le eleele sa siomia ai o ia ua na’o se vaega o le palapala. Ae o le a vave ona avea ma se togalaau matagofie.
Sa faigata taimi mo tagata uli i Aferika i Saute. O tulafono iina sa tuueseeseina ai tagata Uli mai tagata Papae. E toatele tagata Uli sa faamalosia e tuua o latou aiga ma nonofo i ni eria e ese mai tagata Papae, ma sa le mafai ona latou palota. Sa i ai le faasaua i le Nuu na nofo ai Julia, ma na tapunia aoga ona o lena mea. O nisi taimi sa le saogalemu le alu i fafo.
Ae sa le’i taofia ai Julia e lena mea. Sa manao o ia e faia se mea e aumai ai le lelei i lona nuu. O le mafuaaga lena sa ia amataina ai se togalaau.
Sa i ai nisi tamaiti sa vaai atu o galue Julia. “E mafai ona matou fesoasoani?” na latou fesili atu ai.
“Ae a, e mafai,” o le tala lea a Julia. Sa ia tuuina atu ia suo ia te’i latou taitasi. Sa ia faaali atu ia te i latou le auala e faamatagataga ai le palapala ma eli i luga vao.
“Ia tatou eliina le eleele o le oona, togi i ai se fatu o le alofa, ma vaai po o a fua e mafai ona tuuina mai ia i tatou,” o lana tala lea. “E na o le faamagalo atu o isi e oo mai ai le alofa.”
Na mavae vaiaso, ma ua tele atu laau ua tutupu. Na o mai isi tagata e galulue i le togalaau. Sa latou toso vao uumi. Sa latou totoina ni fatu se tele. Sa latou fuiina laau. Na fiafia ai Julia e vaai i le toatele o tagata o loo fesoasoani.
I se tasi aso na feiloai ai Julia i ni alii talavou se toalua. Sa te’i Julia ona sa seasea o mai ni tagata papae i lona pitonuu. Sa fai mai o i la’ua o ni faifeautalai. Sa ia valaaulia i la’ua e faasoa atu se savali i lona fale.
Ina ua faalogo le atalii o Julia e o mai i la’ua, sa te’i o ia. “Aisea na e valaaulia ai i la’ua?” na ia fai mai ai. “E Papae i la’ua. E le saogalemu.”
Ae sa faatuatuaina e Julia ia faifeautalai. “O nei tamalii e ese mai,” o le tala lea a Julia. “O loo la’ua tala’i atu le filemu.”
Ina ua oo mai faifeautalai, na faafeiloai i la’ua e Julia. O se tasi o i la’ua sa matauina se ata i luga o le fata. Sa mai le faaipoipoga a Julia.
“O ai lena?” sa fesili atu le faifeautalai, ma faasino atu i le ata.
“O lo’u toalua, o Ioane.” Sa tilotilo i lalo Julia. “Sa maliu o ia i se faalavelave tau taavale.”
Sa luelue mai le ulu o le faifeautalai. “Matou te talitonu e mafai ona faavavau aiga, e tusa lava pe a maliliu i latou.”
O se lagona o le toafilemu na oo ifo ia Julia. Sa ia lagona le fiafia e aoao e uiga i le fuafuaga a le Atua ma faaauau ai pea ona feiloai atu i faifeautalai. O le alofa i le talalelei sa tuputupu a’e i le loto o Julia, e pei lava o laau i lana togalaau. E lei leva ae filifili loa o ia e papatiso.
I le lotu, sa feiloai ai Julia i le toatele o tagata fou. O nisi e Uli. O nisi e Papae. Ae sa latou auauna uma atu ma aoao faatasi.
Sa faaali atu e Julia i tamaiti i le lotu le auala e fesoasoani ai i lana togalaau. “E tatau ona vaivai o tatou loto, e pei o lenei eleele,” o lana tala lea. “E tatau ona tatou faia se nofoaga mo le talalelei i totonu o i tatou lava. E tatau ona tatou faia se nofoaga mo le alofa.”
E sefulutolu tausaga talu ona uma le papatisoga o Julia, ae faamutaina le tulafono na tuu eseese ai tagata Uli ma tagata Papae i Aferika i Saute.
E toeitiiti lava 70,000 tagata o le Ekalesia i Aferika i Saute i le aso!
E 11 ni gagana aloaia i Aferika i Saute.
Sa fesoasoani Julia e amata se vaega a Tamaitai mo le Filemu, o se vaega e faalauiloaina ai le lotogatasi ma le filemu i Aferika i Saute.
O ia o se tasi o uluai tagata faigaluega o le malumalu i le Malumalu o Johannesburg Aferika i Saute.
Sa faiaoga Julia. Sa ia aoaoina tamaiti e faitau pe a latou galulue i lana togalaau.
Ata na tusia e Tracy Bishop