Ou te Iloa se Pese e uiga i Lena Mea!
E alala le tusitala i Leinster, Aialani.
E pei o le tele o tamaiti i Aialani, na alu Annie i se aoga Katoliko. Sa na o ia lava se tagata O Le Ekalesia a Iesu Keriso o le Au Paia o Aso e Gata Ai i lana vasega.
Sa i ai se faiaoga lelei a Annie na aoao atu e uiga i le tele o mea. Sa oo lava ina ia aoao atu e uiga ia Iesu. Sa fiafia Annie e faalogologo i tala e uiga ia Iesu. O tala lava ia e tasi sa ia aoaoina i le Peraimeri ma i le aiga.
I se tasi aso na ta’u atu ai e le faiaoga a Annie le taimi na savali ai Iesu i luga o le vai. Sa ataata Annie. O le tala pito sili ona ia fiafia ai lena!
Sa aoaoina e Annie le pese “O Le Vavega” i le Peraimeri. Na faamatala e lena pese le savali a Iesu i luga o le vai. E masani lava ona lagona e Annie le mafanafana i totonu pe a ia usuina. Sa mafaufau o ia i upu o le pese.
“Sa savali Iesu i luga o le vai. Sa Ia vavao le āfa ma faamalu le sami.”
Sa manao Annie i lana vasega ia iloa foi le pese! Sa sii lona lima ma fai mai, “Ou te iloa se pese e uiga i lena mea!”
Sa ataata lona faiaoga. Sa fai atu ia Annie e faasoa i le aso na sosoo ai i le vasega.
Sa fiafia Annie ina ua taunuu i le fale. Sa fesoasoani tina ia te ia e sue le pese i luga o le komepiuta ina ia mafai ai e le faiaoga a Annie ona tata le pese mo lana vasega.
O le aso na sosoo ai sa faalogologo ai Annie ma lana vasega atoa i le pese. Sa lagona e Annie le lagona mafanafana sa ia lagonaina i taimi uma i le Peraimeri. Sa fiafia o ia ona sa ia faasoa atu lenei pese faapitoa e uiga ia Iesu.
Ata na tusia e Sinéad Poznanski