Amigos ’Āpī
Tē ora nei te ta’ata pāpa’i i Utah, i Marite.
’Aita Brigit i ’ite i te reo pāniora. Nāhea ra ’oia i te paraparau i te ta’ata ?
« E ta’ata ’ē au, ’e ’ua ’ite mai ’outou iā’u » (Mataio 25:35).
’Ua hi’o noa ’o Brigit nā te ha’amāramarama pere’o’o ’a tere ai tōna ’utuāfare nā roto i te mau purūmu piriha’o nō Caracas, i Venezuela. Tē vai ra te mau fare ’ū rau ’e te mau mou’a matie. E vāhi nehenenehe mau ā. ’Ua parau mai Māmā ’e ’o Pāpā e riro te orara’a i’ō nei ’ei ’ohipa ’āpī nō mātou.
Terā rā, ’ua vai noa te mana’o pe’ape’a i roto ia Brigit. Teie mahana ’o te taime mātāmua ïa rātou e haere ai i te purera’a i teie fenua ’āpī.
’Ua fāriu atu ’o Māmā i ni’a ia Brigit. « E aha tō ’oe huru ? », ani atu ra ’oia. « ’Ia hi’o-ana’e-hia, ’aita ’oe e maita’i ra. »
’Ua tāviriviri Brigit i tōna nā rima. « Tē taiā ra vau. ’Aita vau e parau i te reo pāniora. Nāhea vau e hoahia ai ? »
Tāpe’a a’era Māmā i tō Brigit rima. « ’Ua ’ite au ē, tē ha’ape’ape’a nei ’oe. Terā rā e maita’i te mau mea ato’a. Huti i te aho roa. »
Hi’o a’era ’o Brigit i raro, i tōna rima. ’Ua to’eto’e roa, noa atu e mea ve’ave’a i rāpae. ’Ōtu’itu’i tōna māfatu, ’e e huru ’ē tōna ’ōpū ’a tomo ai te pere’o’o i te vāhi tāpe’ara’a pere’o’o a te ’Ēkālesia. E aha rā ïa te huru te fare purera’a ? E ta’a ānei iāna i te tahi a’e mea ?
I te tomora’a atu i roto i te fare purera’a, e mana’o ta’ata ’e’ē tō Brigit. ’Ua hi’o ’oia ’ati a’e iāna i te tahi atu mau ’utuāfare, e reo pāniora ana’e. ’Ite atu ra ’oia e piti tamāhine hō’ē ā matahiti mai tōna.
I te ’itera’a nā tamāhine ia Brigit, ’ua horo atu ra ia Brigit ra. ’Ua paraparau vitiviti mai ra rāua ma te reo ’oa’oa ’e te mata ’ata’ata.
’Aita rā ’oia i ta’a ri’i a’e e aha tā rāua e parau ra. E horo ’ē ānei rāua ’ia ’ite rāua ē ’aita vau e paraparau i te reo pāniora ? uiui a’enei tōna mana’o.
ʼUa huti a’era Brigit i te aho. « No hablo español », tāna i parau atu ma te ueue i te upo’o. « ’Aita vau e paraparau i te reo pāniora. » Ha’amata ihora ihora te roimata i ni’a i tōna mata.
’Ua ha’ape’epe’e noa nā tamāhine i tō rāua pa’ufifi ’e ’ua rahi roa atu tō rāua mata ’ata’ata. Fa’atoro a’era te tahi tamāhine i ni’a iāna iho ma te parau ē, « Dayana. » ’Ia oti, fa’atoro atu ra ’oia i ni’a i te tahi atu tamāhine i te paraura’a ē, « Andrea. »
Ha’amata atu ra te mau pe’ape’a o Brigit i te mo’e. ’Ua ’ata’ata ’oia i te mau tamāhine ’e ’ua fa’atoro atu i ni’a iāna iho. « Brigit. »
’Ua pārahi ’o Dayana ’e ’o Andrea i pīha’i iho ia Brigit. ’Ua ha’api’i rāua iāna ’ia parau « pāpa’ira’a mo’a » nā roto i te reo pāniora ’e te tahi atu mau parau. I te ha’amatara’a te purera’a ’ōro’a, ’ua māmā te ’ā’au ’o Brigit ’e ’ua hau.
I muri a’e i te Paraimere, ’ua pārahi ’o Brigit ’e tōna mau hoa ’āpī i ni’a i te ’aihere i rāpae noa mai i te fare pure ’a paraparau noa ai tō rātou nā metua. ’Ua ha’api’i Dayana ’e Andrea ia Brigit i te tahi atu mau parau pāniora. I muri iho, ’ua fa’atoro Dayana i ni’a i te tumu rā’au ma te ui atu, « ¿Inglés [reo peretāne] ? »
’Ua ’ata’ata Brigit ’e ’ua fa’atoro ato’a atu. Nā ’ō atu rā ’oia, « Tree [Tumu rā’au] ». ’Oa’oa roa ’oia ’e ’ua fa’atoro atu ra i ni’a i te tahi atu mau mea ma te fa’ahiti i te mau ta’o nā roto i te reo peretāne. ’Ua fa’ahiti fa’ahou ’o Dayana ’e ’o Andrea i te mau parau nā roto i te reo peretāne. I muri iho ’ua ha’api’i rātou ia Brigit nāhea ’ia parau nā roto i te reo pāniora. ’Ua ha’api’i mai Brigit i te mau huru parau faufa’a ato’a, mai te libro (buka), te casa (fare), ’e te coche (pere’o’o). Te maita’i roa a’e, ’ua ha’api’i rāua iāna nāhea ’ia parau amigos (te mau hoa).
’E ’ua tae i te taime nō te ho’ira’a fare. ’Ua aroha tārape ’o Brigit ia Dayana ’e ia Andrea.
« E aha te huru o tō ’oe mahana mātāmua i te fare purera’a i Venezuela nei ? » Te uiraa ïa a Pāpā.
’Ua ’ata’ata Brigit. « E mea faʼahiahia ! ’Ua fa’ahoa vau i te tahi mau ta’ata. E tē ha’api’i mai nei rātou iā’u i te reo pāniora ! »
« E mea fa’ahiahia mau ! Tē ’oa’oa nei au i te mea ē, e mahana maita’i nō ’oe. »
’Ua feruri noa ’o Brigit i tō Dayana ’e tō Andrea fāri’ira’a iāna. ’Aita ’oia i huru ’ē fa’ahou mai te hō’ē ta’ata ’e’ē. ’Ua ’ite ’oia ē, tē tauturu ra te Metua i te ao ra iāna ’ia fa’ahoa i te ta’ata. ’E ’ua ’ana’anatae roa ’oia i te hi’o ē e aha te huru te toe’a o tōna taime i Caracas !
Fa’ahōho’ara’a nā Julia Castaño