Pionie i te mau fenua ato’a
Olga Šnederfler
Te matarona o te hiero mātāmua i Tchécoslovaquie
’Ua ’ite Olga ē, e haere ’oia i te hiero i te hō’ē mahana.
’Ua hi’o noa Olga i te hōho’a o te hiero i te tārerera’a i ni’a i te papa’i. ’Ua ’oto ’oia. ’Āhiri e nehenehe tōna ’utuāfare e haere i te hiero ! ’Aita ho’i e hiero tāpiri noa mai, ’e e mea fifi roa ’ia fa’aru’e i tōna fenua.
’Ua bāpetizohia Olga e rave rahi matahiti i mā’iri a’e nei. I muri iho rā, ’ua fa’ahepohia te mau misiōnare ’ia fa’aru’e i te fenua. ’Aita te mau melo o te ’Ēkālesia i fa’ati’a-fa’ahou-hia ’ia haere i te purera’a. E’ita ato’a e nehenehe ia rātou ’ia paraparau i te ta’ata nō ni’a i tō rātou fa’aro’o.
’Ua ha’apa’o noa Olga i te ’evanelia. Nā reira ato’a tāna tāne, ia Jirí. ’Ua pure rāua ’e ’ua tai’o i te mau pāpa’ira’a mo’a. E pō ’utuāfare tā rāua ’e ’ua ha’api’i i tā rāua nā tamari’i. I te sābati, e fa’atupu rātou i te purera’a ’ōro’a i roto i tō rātou nohora’a na’ina’i. E rave rahi hōho’a hiero tā rātou i fa’atārere.
’Ia tupu ana’e te mana’o mo’emo’e i roto ia Olga ’e tōna ’utuāfare, e ha’amana’o rātou ē, e rave rahi tauatini melo o te ’Ēkālesia ’ati a’e i te ao nei.
I te hō’ē mahana ’ua tupu te hō’ē ’ohipa ’oa’oa. ’Ua tere mai te peresideni Russell M. Nelson, te peresideni rahi o te Ha’api’ira’a Sābati, i tō rātou fenua. E mata ’ata’ata tō Olga i te aroha-rima-ra’a i te peresideni Nelson. I muri iho, ’ua parau ’oia i te hō’ē fafaura’a ta’a ’ē. « E te tuahine, ’ia tae i te hō’ē mahana e haere mai ’oe i te hiero. »
’Ua māhanahana roa te ’ā’au o Olga. « Māuruuru », muhumuhu atu ra ’oia.
Ē tau ’āva’e. Ē tau matahiti. ’Ua hi’o maoro ’o Olga i te mau hōho’a o te hiero i fa’atārerehia i ni’a i te papa’i. E au ra ē e mea fifi roa nō te haere i te hiero !
I muri a’e e maha matahiti, ’ua ani-manihini-hia ia Olga ’e ia Jirí ’ia haere i te ’āmuira’a rahi i Roto Miti, i Utaha, i Marite. ’Ua ha’ape’ape’a roa Olga ē e’ita paha rāua e haere. Mea fifi noa ā te mau ’ohipa i roto i tō rāua fenua. E rave rahi ’api parau e rave nō te tere atu. Terā ra, ’ua tupu maita’i te mau mea ato’a. ’Ua huru ’ē tō Olga ’ōpu i te rerera’a rāua nā ni’a i te manureva nō te fano atu i te fenua Marite. E temeio mau teie !
’Ua haere ’o Olga ’e ’o Jirí i te ’āmuira’a ’e ’ua fa’aro’o i te peropheta. ’Ua ti’a ia rāua ’ia māta’ita’i ia Temple Square ’e ’ia haere i te pū fāri’ira’a rātere. Terā rā, te tuha’a maita’i roa a’e ’o te tomora’a ïa i roto i te hiero !
Mā te ’ahuhia i te ’ahu ’uo’uo, ’ua tae mai te mana’o ia Olga ē tei te ra’i ’oia ’a rave noa ai i te mau fafaura’a ta’a ’ē ’e te Atua. ’Ua tā’ati-roa-ato’a-hia ’oia ia Jirí. ’Ua tupu te parau a te peresideni Nelson !
’Ua ho’i Olga ’e ’o Jirí i te fare. ’A he’e noa ai te tau, ’ua maita’i mai te mau ’ohipa i tō rāua fenua. I te pae hope’a, ’ua ti’a ia rātou ’ia haere i te purera’a, ’e e nehenehe tā te mau misiōnare e ha’api’i fa’ahou.
I te hō’ē mahana ’ua pātē mai te niuniu parauparau. ’O te peresideni Thomas S. Monson. ’Ua pi’i ’oia ia Olga ’ei matarona nō te hiero nō Freiberg Heremani. ’O Jirí ïa te peresideni hiero.
E mata ’ata’ata noa tō Olga ’a ti’a ai i roto i tōna ’ahu roa ’e te ’uo’uo i roto i te hiero nō Freiberg. I te ha’amatara’a e au ra ē mea ātea te hiero. I teienei rā, e nehenehe iāna ’ia poihere i te reira i te mau mahana ato’a ! E moemoeā nehenehe mau teie tei riro ’ei parau mau.
I muri a’e, ’ua riro mai te vāhi fa’aeara’a ’o Olga ’ei tuha’a nō te Rēpūpirīta Tchèque.
E rave rahi hānere pare nui i te Repupirita Tchèque.
Te matarona o te hiero ’o te hō’ē ïa ti’a fa’atere vahine i roto i te hiero.
Tē vai ra hau i te 20 hōho’a hiero i roto i tō Olga nohora’a.
’Ua fānau ’oia ’e ’o Jiri hō’ē tamaiti ’e hō’ē tamāhine.
’Ua tāpe’a ’oia i te hō’ē buka hōho’a nō te mau misiōnare tei ha’api’i iāna.
Fa’ahōho’ara’a nā Shawna J. C. Tenney