Te manihini rahi
Tē ora nei nā ta’ata pāpa’i i Dar Es Salaam, i Tanzania, ’e i Utah, i te fenua Marite.
Nāhea Amona e nehenehe ai e tauturu i tōna ’utuāfare ’ia fāri’i poupou i tā rātou manihini ?
« Ha’amau i te hō’ē fare […] nō te ha’apa’o, ’ei fare ho’i nō te Atua » (Te Parau Ha’api’ira’a ’e te mau Parau Fafau 88:119).
E avatea mahana mā’a ho’i. ’Ua hina’aro Amona e haere ri’i e ha’uti.
Na ’ō atu rā ’oia ē : « Māmā, nehenehe tā’u e haere i rāpae nō te ha’uti ? »
« Nā mua e tāmā ’oe i tō ’oe piha », parau mai ra Māmā.
’Ua parau Amona ē : « E Māmā, e’ita ānei te piha e nehenehe e tīa’i ? »
« ’Ua hina’aro tātou e ani i te tahi manihini rahi ’ia haere mai. Nō reira, ’ia mā ’e ’ia naho te fare. »
« E manihini rahi ? » ’Ua parau Amona. « I tō tātou fare ? »
« ’Oia mau, ’e e nehenehe ’oe e tauturu mai », ’ua parau Māmā. « Nō reira, ’a haere ’e ’a tāmā mai i tō ’oe piha. »
’Ua ʼoaʼoa roa ʼo Amona. Mea au nāna ’ia fāri’i i te mau manihini. ’Ua uiui tōna mana’o ’o vai ra te manihini. Te tāvana ’oire ? Te ta’ata fa’atere o te fare ha’api’ira’a ? Penei a’e ’o te ’episekōpo !
’Ua haere atu ’oia i tōna piha. ’A tahi, ’ua ’itehia mai tōna mau tōtini repo i ni’a i te tahua. ’Ua tu’u atu i roto i te ’ete ’ahu. I muri iho, ’ua ’āpapa Amona i tāna buka ha’api’ira’a i ni’a i te ’iri ’ohipara’a. ’Ua hina’aro ’oia i te manihini ’ia ’ite ē, e mea au nāna ’ia ha’api’i i te mau mea ’āpī.
Haere mai ra te tua’ana o Amona, ’o Angel, i roto i tōna piha. « E aha tā ’oe e rave ra ? » ’ua ani mai ’oia.
« ’Ua parau Māmā e manihini rahi tē haere mai », ’ua parau atu Amona. « ’Ua ani mai ’oia ’ia tauturu iāna ’ia fa’aineine nōna. »
’Ua hi’o rāua to’opiti ato’a ra ia Māmā i te ’ūputa.
E aha atu ā tā tātou e nehenehe e rave nō te fa’aineine ? » ’Ua parau Amona. « ’Ia ’ite tō tātou manihini rahi ē tē fāri’i-poupou-hia nei ’oia. »
« E aha tō ’oe mana’o ? » Tē ui mai ra Māmā.
« E nehenehe tā tātou e parau karibu », ’ua parau mai ’o Amona. I te reo Swahili, tōna aura’a, « Tē fāri’i-poupou-hia nei ’oe i roto i tō mātou fare. Fāri’i-poupou-ato’a-hia ’oe ’ia paraparau. »
« E nehenehe tātou e fa’aro’o », ’ua parau mai ra Angel. « E mea faufa’a ’ia fa’aro’o. »
« E mau mana’o maita’i te reira », ’ua parau mai ra Māmā. « E hi’o ana’e tātou e aha tā Baba (Pāpā) e parau ’ia ho’i ana’e mai ’oia i te fare. »
Hō’ē hora i muri mai tē tae mai nei ’o Baba.
Tē tīa’i noa ra Amona. « Tē parau ra ’o Māmā ē, tē fāri’i nei tātou i te hō’ē manihini ta’a ’ē i te fare nei. Tē fa’aineine noa nei rā mātou. »
’Ua ’ata’ata Baba. « Tē ’oa’oa nei au. Haere mai. ’A pārahi. Paraparau ana’e. Angel, ’a haere ato’a mai ’oe. »
I te ’āmuira’a rātou, ’ua parau mai ra Baba : « ’Ua paraparau māua Māmā nō ni’a i tā tātou manihini ta’a ’ē, ’e e aha tā tātou e nehenehe e rave ’ia fāri’i-maita’i-hia ’oia. ’A tahi, e parau atu vau ’ia ’outou ’o vai tā tātou manihini. ʼO te Vārua Maita’i ïa. ’O ’oia te hō’ē o te mau manihini faufa’a roa a’e. »
’Ua hi’o a’era Amona ’e ’o Angel i te tahi ’e te tahi. E ’ere ’ōna tā Amona e tīa’i ra !
« ’E e manihini ’oia ’o tā tātou e nehenehe e ani ’ia tae mai i pīha’i iho ia tātou i te mau taime ato’a », te parau ïa a Māmā. « E Angel, i muri a’e i tō ’oe bāpetizora’a, ’ua ha’amauhia ’oe. ’E ’ua hōro’ahia ia ’oe te hō’ē ō. Tē ha’amana’o ra ānei ’oe i te mea tā Baba i parau i roto i te ha’amaita’ira’a ? »
« ’Ua parau mai ’oia iā’u ’ia fāri’i i te Vārua Maita’i. »
« E parau mau », ’ua parau Māmā. « ’Ua anihia ’oe ’ia fāri’i i te Vārua Maita’i. Nō reira, Amona, i tō’u paraura’a ē, e nehenehe tā ’oe e tauturu ’ia ani manihini iāna, e aha ïa tā’u i hina’aro e parau ? »
’Ua feruri Amona. ’Ua ’ōpua ’oia e hāmani i te hō’ē tāreta tītaura’a manihini nō te hōro’a i te manihini. Nāhea pa’i ïa e tītau manihini i te Vārua Maita’i ? « Tē mana’o nei au ē, nā roto i te ravera’a i te mau mea e ’ite ai ’oia ē, tē fāri’i-poupou-hia nei ’oia, tē ani manihini ra ïa vau iāna », ’ua parau mai ra Amona.
« ’Ua ti’a te reira ! » Te parau ïa ’a Baba. « Te hō’ē rāve’a e nehenehe ai ia tātou ’ia ani iāna ’ia tomo mai i roto i tō tātou fare, nā roto ïa i te fa’anaho-maita’i-ra’a ’e te tāmāra’a i te reira. »
« Nō reira ïa Māmā i hina’aro ai ia māua ’ia tāmā i tō māua piha ? » ’Ua ui Amona.
« ’Ē ! » Te reo ïa o Māmā. « E aha atu ā tā tātou e nehenehe e rave nō te anira’a iāna ’ia tae mai i rotopū ia tātou ? »
« E nehenehe tātou e pure », parau mai nei Amona. « ’E ’ia tai’o i te mau pāpa’ira’a mo’a. »
« E nehenehe tā tātou e fa’aro’o i te pehe maita’i », nā ’ō a’era Angel. « E nehenehe tātou e hīmene ’āmui i te mau hīmene purera’a. »
« E nehenehe e rave maita’i i te ta’ata, ’eiaha e fetafetau », ’ua parau Amona.
« Parau mau roa », ’ua parau Baba. « ’Ia tāmata ana’e tātou i te rave i te mea tā Iesu Mesia i ha’api’i, e tītau tātou i te Vārua Maita’i ’ia pārahi mai i pīha’i iho ia tātou. ’E e tauturu ’oia i tō tātou ’utuāfare ’ia riro ’ei vāhi i reira tātou e ’ite ai i te here ’e te hau. »
’Ua feruri a’era ’o Amona hō’ē minuti. « ’Ua tano ’oe, Baba. Te Vārua Maitai ’o te hō’ē ïa o te mau manihini faufa’a roa a’e o te mau manihini ato’a ! »
Fa’ahōho’ara’a nā Mark Jarman