Usa ka Adlawng Natawhan didto sa Templo

Ni Lori Fuller Sosa

Mga Magasin sa Simbahan

(Gibase sa usa ka tinuod nga istorya)

Ang adlawng natawhan ni Lydia duol na.

“Unsay imong gusto sa imong adlawng natawhan, Lydia?” Nangutana si Mama.

Naghunahuna si Lydia og pipila ka minutos. Gusto ba siya og bag-ong dulaan? Gusto ba siya og usa ka libro nga basahon? Dayon kahibalo na si Lydia kon unsa gayod ang iyang gusto kaayo.

“Gusto ko nga mobisita sa templo,” miingon si Lydia. Gusto siya nga ikauban ang iyang pamilya. Gusto siya nga moadto og dapit nga malipayon. Ug unsay dapit nga mas malipayon kay sa templo?

Sa adlawng natawhan ni Lydia, si Mama, si Papa, si Lydia, ug ang iyang mga igsoong babaye nangandam aron sa pag-adto sa templo. Si Lydia miimbitar pa gani sa iyang higala nga si Grant.

Layo ang biyahe. Apan OK ra kadto. Mipasiaw si Lydia ni Grant ug sa iyang igsoong babaye nga si Lucy. Siya misaysay og istorya sa iyang mga manghod nga babaye, si Eliza ug Ellie.

Ug sa kataposan, nakita na ni Lydia ang templo. Miabot na sila!

“Tan-awa ang anghel Moroni!” Miingon si Lydia. Siya mitudlo sa templo.

Dihang migawas na siya sa sakyanan, si Lydia nagdali paingon sa ganghaan sa templo.

Adunay maanindot nga mga punoan sa kahoy sa palibot sa templo. Ang mga punoan sa kahoy adunay sanag nga kahil og dalag nga dahon. Ang mga dahon diha sa yuta nadugmok sa pagtunob ni Lydia ug ang iyang pamilya naglakaw libot sa templo.

Dakong huros sa hangin miigo sa mga punoan sa kahoy. Mitan-aw si Lydia sa mga dahon nga nangapadpad sa hangin. Midagan siya aron saw-on ang dahon sa dili pa kini motugpa sa yuta. Nindot kaayo kadto! Iya kining gibutang sa iyang bulsa.

Gibasa ni papa ang sulat diha sa templo. Giingon diha nga, “Pagkabalaan ngadto sa Ginoo: Ang Balay sa Ginoo.”

“Nagpasabot kana nga kita mahimong mobati nga duol ni Jesus dinhi,” miingon si Mama.

Mibati si Lydia og kalinaw. Kini mao ang usa ka malipayon kaayo nga dapit!

Sa ilang pagbiya, gikuha ni Lydia ang iyang dahon. Sa dihang miabot na siya sa panimalay gibutang niya kini sa usa ka espesyal nga kahon. Nianang paagiha siya kanunayng mahinumdom niining maanindot nga adlaw!