Kalinaw ug mga Kanta sa Primary
Gihanduraw ni Max ang mahimo niyang pamilya ugma damlag.
“Mas duol ko sa Dios kay gipamulong ang gugma dinhi” (Songbook sa mga Bata, 103).
Gatuya-tuya si Max sa iyang lingkoranan. Ang iyang paborito nga bahin sa Primary hapit na magsugod.
“Welcome sa panahon sa pagpanganta,” miingon si Sister Rose. Ang piano nagsugod sa pagtokar. Si Max midungan sa pagkanta.
Si Max ganahan sa panahon sa pagpanganta. Apan ang iyang pamilya dili sama sa malipayong mga pamilya nga iyang gikanta sa Primary. Lisod ang kahimtang sa panimalay.
Mao kana nganong ganahan kaayo si Max sa Primary. Siya kanunayng mibati nga gihigugma ug luwas kon siya anaa didto. Siya mibati og kalinaw diha sa Primary.
“Alang sa atong mosunod nga kanta, ako adunay usa ka espesyal nga hagit alang kaninyo,” miingon si Sister Rose. “Samtang manganta kita, gusto ko nga kamo maghunahuna mahitungod sa unsay mahitabo kon ikaw modako na ug aduna nay imong kaugalingong pamilya.”
Ang musika sa piano misugod na usab. Ang nota hinay ug malinawon. Gilibot og tan-aw ni Max ang kwarto. Makita niya ang mga hulagway ni Jesus ug sa templo nga gibitay sa bong-bong.
Ang ubang mga bata misugod sa pagkanta. Si Max misugod usab sa pagkanta. Among balay gihatagan sa priesthood gipanalanginan.
Si Max mipiyong sa iyang mga mata ug naghunahuna nga usa na ka papa. Naghunahuna siya nga nag-ampo uban sa iyang pamilya sa umaabot. Gihunahuna niya ang pagpanganta uban kanila, nagdula-dula, ug nag-home evening.
Samtang iyang gikanta ang kataposang mga pulong, si Max adunay dakong pahiyom sa iyang dagway. Mas duol ko sa Dios kay gipamulong ang gugma dinhi.
Ugma damlag si Max makahimo ra og usa ka pamilya sama niana. Ugma damlag makabaton ra siya og usa ka panimalay diin siya mibati nga malinawon sama sa iyang gibati sa Primary. Ang paghunahuna niini nakapahimo ni Max nga mibati og kainit sa tibuok lawas.
Siya miisa sa iyang kamot. “Sister Rose,” miingon si Max, “ako naghunahuna nga kana nga kanta sama sa usa ka resipe. Usa ka resipe alang sa usa ka malipayong pamilya
“Sakto ka,” miingon si Sister Rose. “Walay pamilya nga hingpit. Apan kon kita maningkamot nga mahisama ni Jesus, makatabang kita sa atong mga pamilya. Kita makatabang sa paghimo sa atong mga panimalay nga malinawon nga mga dapit.”
Mitan-aw si Max sa litrato sa templo diha sa bongbong. Nasayod siya nga makatabang siya sa iyang pamilya karon pinaagi sa pagkahimong sama ni Jesus. Ug bisan tuod layo pa kini, mahinamon siya nga makabaton sa iyang kaugalingong pamilya. Ug kini nakapalipay kaniya nga masayod nga siya mahimong makig-uban kanila hangtod sa kahangtoran.
Paghulagway pinaagi ni Matt Smith