Nagtan-aw ni Musa
Ang tagsulat nagpuyo sa Iowa, USA.
Tingali ang bag-ong bata dili gayod maldito.
“Ang tan-awon sa tawo mao ang panagway apan ang tan-awon sa Ginoo mao ang kasingkasing” (1 Samuel 16:7).
“Ma, adunay nahitabo sa eskwelahan ganina nga nakasamok gayod nako.” Gibutang ni Angie ang iyang backpack sa salog ug mihapla sa sopa.
Miyanghag si Mama gikan sa pagbasa sa libro. “Oh? Unsa may nahitabo?”
“Dah, adunay usa ka bag-ong batang lalaki ginganlan og Musa diha sa akong klase.”
“Maayo kana!” Miingon si Mama. “Nakig-istorya ka ba niya?”
“Wala, ug dili ko ganahan!” Miingon si Angie. “Maldito siya.”
“Unsa man ang iyang gibuhat?”
Mikusmod si Angie. “Nakit-an nako siya nga naglakaw sa eskwelahan uban sa iyang igsoong babaye. Iyang gipalakaw siya diha sa iyang luyo sa tanang higayon! Sa matag higayon nga siya mosulay sa paglakaw tapad kaniya, magdali siya ug mouna niya. Nakapalagot kadto nako.”
Mimug-ot ang nawong ni Mama. “Murag dili gyod na maayo. Tingali magkinahanglan siya og higala nga sama nimo aron mapakita niya unsaon sa pagtagad sa uban nga may gugma.”
Dayon, ang manghod ni Angie, si Meghan, daling misulod. “Ma, tag-ana unsa? Adunay usa ka bag-ong batang babaye sa akong klase! Ang iyang ngalan si Dalia Kader. Dili ba nindot kana nga ngalan?”
“Siguro ang iyang igsoong lalaki naa sa akong klase,” miingon si Angie.
“Mao ba? Swerte kaayo ka.”
Nagmug-ot si Angie. “Swerte? Ngano man?”
“Gisultihan ko ni Dalia sa tanan mahitungod kaniya!”
“Sigurado gibuhat niya,” mihagawhaw si Angie.
“Miingon siya nga iyang patuloan ang mata niining buntag, ug angay siya nga magsul-ob og antepara aron pagpanalipod sa iyang mga mata, apan nalimot siya. Mao nga sa dihang nanglakaw sila sa eskwelahan, si Musa milakaw sa iyang atubangan aron masalipdan siya gikan sa adlaw. Dili ba kana nindot kaayo?”
Nakapamilok si Angie sa kakurat. Nasayop ba siya sa paghukom ni Musa?
“Mura og manggihunahunaon siya nga pagkaigsoon,” miingon si Mama.
“Mao gyod!” Miingon si Meghan. “Ug sa dihang miabot na sila sa eskwelahan, miadto sila sa opisina aron sila makatawag sa balay. Ug nagpabilin siya kuyog niya hangtod ang iyang mama midala sa antepara.”
Wow, naghunahuna si Angie. Wala ra diay nako makita unsa gayod ang nahitabo.
Milingkod si Meghan tupad ni Angie diha sa sofa. “Ang mga antepara ni Dalia nindot kaayo! Tapol kini nga adunay mga diyamante. Ma, mahimo ba nako silang dapiton nga moanhi karong semanaha? Makasul-ob kaming duha sa among mga antepara ug magdula og ilis-ilis og mga sinina [dress-up]!”
“Maayo nga ideya,” miingon si Mama. “Nganong dili man nimo dapiton usab si Musa? Gusto kong makahimamat nilang duha. Unsay imong hunahuna, Angie?”
“Ganahan ko nga mahimamat usab sila.” Mipahiyom si Angie. “Siguro si Musa mahimong usa ka talagsaong higala.”
Mga paghulagway pinaagi ni Jörg Saupe