Mga Pioneer sa Matag Yuta
Margaret Cummings
Matinud-anon nga Santos gikan sa Australia
Ang tagsulat nagpuyo sa Utah, USA.
Miabot ba sila niini kalayo alang sa wala lang?
Gipahimutang ni Margaret ang iyang mga anak sa higdaanan. Ang iyang anak nga lalaki, si Jeffrey, miabli sa usa ka mata. “Mama, kanus-a kita makaadto sa templo?”
Si Margaret mihalok sa iyang agtang. “Dihadiha dayon kon mahuman na kini.” Gipalong niya ang suga.
Nagpaabot usab si Margaret alang sa pagpahinungod sa templo. Mahinamon siya nga masilyo ngadto sa iyang pamilya. Apan layo ang templo sa New Zealand. Mogasto kini og dakong kwarta nga mobiyahe gikan sa ilang panimalay sa Australia. Nakatigom na sila sulod sa pipila ka bulan. Gibaligya gani nila ang ilang sakyanan. Apan nagkinahanglan gihapon sila og dugang nga 200 ka libras [pounds].
Miluhod siya aron mag-ampo. “Langitnong Amahan, palihog tabangi kami nga makakuha sa dugang nga kwarta nga among gikinahanglan.”
Dayon misulod ang iyang bana, si Don. “Nagkita kami sa akong amahan karong adlawa. Nangayo siyag pasaylo nga wala makabisita kanato, ug siya mihatag kanato niini.”
Gitunol niya kang mama ang usa ka piraso nga papel. Usa kadto ka tseke alang sa 100 ka libras! Hapit dili makatuo si Margaret niini. Ang amahan ni Don wala makig-istorya kanila sulod sa pipila ka bulan. Usa kadto ka milagro!
Pipila ka adlaw ang milabay, mibisita ang mga ginikanan ni Margaret. “Nagtigom kami og gamay nga kwarta,” miingon ang iyang amahan. Hugot niyang gibutang sa kamot ni Margaret ang 100 ka libras. “Ayo-ayo sa inyong biyahe!”
Mipahiyom si Margaret. Aduna na silay igong kwarta karon!
Adunay usa na lang ka problema. Ang biyahe molungtad og unom ka semana. Ang agalon ni Don miingon nga siya dili mahimong mawala og ingon niana kadugay. Human sa daghang pag-ampo, nakahukom sila si Margaret ug Don nga moundang si Don sa iyang trabaho.
Sa kataposan panahon na aron moadto. Gitabangan nila ni Margaret ug Don og pasakay ang ilang mga anak ngadto sa tren. Nagsakay sila niini sulod sa tibuok lima ka adlaw.
“Hapit na ba kita maabot?” Nangutana si Jeffrey ni Margaret.
“Wala pa,” miingon siya. “Karon mosakay kita sa barko padulong sa New Zealand.”
Apan adunay dugang nga dili maayong balita. Nabangga ang barko. Wala kini nagpasakay og mga pasahero. Miabot ba sila niini kalayo alang sa wala lang?
Dili! Ang mga pag-ampo ni Margaret natubag pag-usab. Usa ka tawo ang mihatag kanila og mga tiket sa eroplano. Wala madugay si Margaret ug ang iyang pamilya naglupad ibabaw sa kadagatan. Sunod nga hunonganan, New Zealand!
Sa dihang sa kataposan nga misulod na si Margaret sa templo, ang iyang kasingkasing mainiton. Nakalamano gani siya sa propeta. “Ang Langitnong Amahan mopanalangin sa inyong pamilya tungod kay gipili ninyo nga moanhi dinhi,” miingon siya.
Wala madugay, si Margaret ug ang iyang pamilya nagsul-ob og puti. Miluhod sila palibot sa altar aron masilyo. Si Margaret malipayon gayod kaayo. Karon mahimo na silang magkauban sa kahangtoran!
Sa dihang nauli na sila, si Margaret ug si Don adunay 5 ka libras na lamang nga nahibilin. Apan nakahinumdom si Margaret sa saad sa propeta. Ang Langitnong Amahan mopanalangin kanila.
Ug gibuhat gayod Niya! Sa sunod nga semana, miuli si Don nga adunay malipayon nga balita. “Nakakita ako og trabaho! Mas nindot pa kini kay sa trabaho nako kaniadto.”
Si Margaret migakos kaniya pag-ayo. Nasayod siya nga ang pag-adto sa templo kanunay nga bililhon kaayo.
Ang Australia mao lamang ang nasod nga usa usab ka kontinente.
Ang Hamilton New Zealand Temple gipahinungod niadtong 1958.
Karon adunay lima na ka templo sa Australia.
Si Margaret nabunyagan human siya naminyo.
Si Margaret ug ang iyang bana nagserbisyo isip matron ug presidente sa duha ka managlahi nga mga templo sa Australia.
Si Margaret nagpuyo sa Perth, Australia, sobra pa sa 5,300 km (3,300 ka milya) gikan sa Hamilton, New Zealand.
Mga paghulagway pinaagi ni Margarida Esteves