Mga Pag-ampo alang kang Tessa
Ang tagsulat nagpuyo sa Colorado, USA.
“Walay gusto kanako sa ilang team,” miingon si Tessa.
“Kinsay dapig sa Dios? Kinsa? Karon ipakita” (Mga Himno, nu. 161).
Gitutokan ni Tessa ang iyang mga sapatos. Panahon na alang sa pisikal nga edukasyon. Ang mga bata namili og mga kauban sa team aron sa pagdula og kickball. Nasayod siya nga kataposan siyang pilion nga maapil sa usa ka team. Kanunay gayod siyang kataposan nga pilion.
Sa wala madugay wala nay nahilibin gawas kang Tessa. “Murag kauban na pod kita niya,” mihunghong ang kapitan sa kuponan ngadto sa iyang higala. Silang duha bugalbugal nga nangatawa.
Nagpaaron-ingnon si Tessa nga wala siya makadungog.
Pipila ka minutos gikan sa pagsugod sa dula, usa ka batang babaye sa laing team ang mipatid sa bola. Nagpaingon gayod kini kang Tessa!
Akong ipakita nila nga kamao kong modula! Naghunahuna si Tessa. Mitikang siya paabante aron sa pagsalo sa bola. Apan kini miigo sa iyang mga bukton ug miuntol ngadto sa yuta.
“Wala ka bay husto nga mabuhat?” miingon ang kapitan sa team.
Dali nga milingi si Tessa aron sa pag-atubang sa kaniya. “Sige! Dili ka na kinahanglan nga makigkauban kanako!” Masuk-anon siyang miduol sa bola ug kusog kining gipatiran.
Ang suod nga higala ni Tessa, si Shondra, midagan ngadto kaniya. “Oy, ok ra kadto,” miingon si Shondra. “Bisan kinsa man ang dili makasalo sa bola.”
“Mao ba? Nan nganong wala may gusto kanako sa ilang team?” Miingon si Tessa.
“Tingali tungod kay grabe ka masuko,” miingon si Shondra. Milakaw siyag balik diin ang ubang mga bata naghulat.
Milingkod si Tessa sa lingkoranan sa kilid sa dulaanan. Ang iyang mga mata nagluha. Dili siya gusto nga ang eskwelahan motawag pag-usab sa iyang mga ginikanan. Mitawag na sila kaniadto. Ang prinsipal miingon nga si Tessa naglisod sa pakighalubilo sa ubang mga bata.
Wala makahibalo si Tessa kon nganong milihok siya sa paagi nga iyang gibuhat. Dili siya gusto nga makaingon og kasamok. Gibati lamang niya usahay ang hilabihan nga kasuko ug kaguol, ug naglisod siya sa pagkontrolar sa iyang mga emosyon.
Nanghupaw si Tessa. “Dili gayod ako mahisakop,” miingon siya sa iyang kaugalingon.
Pagkahuman sa eskwela, nagdali nga migawas si Tessa. Anaa didto si Mama sa pagkuha kaniya. Naminaw siya samtang misugilon si Tessa mahitungod sa iyang adlaw.
“Dili gayod ako nila pilion nga maapil sa ilang team,” miingon si Tessa. “Gibati nako nga ingon og walay modapig gayod kanako.”
“Gikasubo ko, mahal,” miingon si Mama. “Usahay ang mga tawo dili mabination. Apan ang Langitnong Amahan kanunay nga nagdapig gayod kanimo. Ug mao usab ang imong pamilya.” Gigakos niya si Tessa. “Mamauli na ta. Aduna akoy surprisa alang kanimo.”
Sa dihang nauli na sila, si Lola anaa didto! Kanunay gayod nga ganahan si Tessa sa iyang mga pagbisita.
“Gusto akong masayod sa tanan nga nangahitabo sa imong kinabuhi,” miingon si Lola. “Komosta ang pag-eskwela?”
Miduko si Tessa. “Dili kaayo maayo.”
“Miingon ang imong mama nga naglisod ka,” miingon si Lola. “Nasayod ka nga siya ug ang imong papa nag-ampo alang kanimo, sakto?”
“Oo.”
“Ug nasayod ka nga si Lolo ug ako nag-ampo alang kanimo, sakto?”
Mitando si Tessa.
“Nan, karon adunay daghang ubang tawo nga nag-ampo alang kanimo usab!”
“Unsay buot nimong ipasabot?” Nangutana si Tessa.
“Gibutang nako ang imong ngalan diha sa lista sa mga nanginahanglan og pag-ampo [prayer roll] sa templo,” miingon si Lola. “Niana nga paagi, daghang tawo ang nag-ampo alang kanimo—bisan ang mga tawo nga wala makaila kanimo.”
“Nan, kini ba ingon og sila anaa sa sama nga team kanako?” Miingon si Tessa.
“Pwede kaayo, mahimo nimong lantawon kini niana nga paagi,” miingon si Lola. “Ang Langitnong Amahan kanunay nga nag-abiba kanimo! Ug karon, mao usab kadtong tanan nga tawo nga nag-ampo alang kanimo.”
“Salamat, Lola!” Gigakos og maayo ni Tessa si Lola.
Sa sunod higayon nga mibati si Tessa nga nasagmuyo sa eskwelahan, mipiyong siya ug miginhawa og lawom. Gihinumdoman niya ang tanan nga tawo nga nag-ampo alang kaniya. Kana mitabang kaniya nga moarang-arang ang pamati. Dayon miduko siya aron mag-ampo sa iyang kaugalingon.
Salamat, Langitnong Amahan, siya miampo. Salamat sa pag-abiba kanako.
Mga paghulagway pinaagi ni Rayanne Vieira