Te Noela i Mārī
Tē ora nei te ta’ata pāpa’i i Texas, i Marite.
’Aita i ’oroma’i ia Judith i te tīa’ira’a i te fa’ahanahana i te fānaura’a o Iesu i roto i tāna ’āma’a.
« Hīmene te melahi nā ni’a mai te ra’i » (hīmene, N°120).
E mahana Noela teie. ’Ua ha’amā ri’i ’o Judith ’a haere ai ’oia i te fare purera’a. Tē haere nei rātou ’e tōna mau taea’e ’e te mau tuahine i te ōro’a Noela a tā rātou ’āma’a.
’Ua ’ata’ata tōna tuahine, ’o Esther. « E ’ere ānei ‘Hīmene te melahi’ terā hīmene ? »
« ’Ē ! ’O tā’u e au roa. Maita’i pa’i e hīmene tātou i te reira i teie mahana. » E mata ’ata’ata iti rahi tō Judith.
« E mea au roa nā’u teie himene ! » Te parau ra ’o Désiré, tōna taea’e. ’Ua himene pūai ’oia, « ’Ā-ā-ā-rue ! »
’Ua ’ata pā’āto’a rātou. ’Aore i ’oroma’i ia Judith i te tīa’ira’a nō te fa’ahanahana i te Noela ’e tā rātou ’āma’a. ’Aita i rahi te ta’ata i Mārī e fa’ahanahana nei i te Noela. I roto i teie tuha’a nō Afirika, ’aita te rahira’a o te mau ta’ata i ’ite ia Iesu. Nō rātou, ’ua riro te Noela ’ei mahana mātaro-noa-hia.
’Ua ’ī te mau purūmu i te ta’ata. Tē ho’o ra te mau ho’o tao’a i te merēni papa’ā matie. Tē amo ra te feiā āpī ’e te feiā pa’ari i te mau tihā pape i ni’a i tō rātou upo’o. Tē arata’i ra te hō’ē tamaiti ’āpī i te hō’ē pere’o’o hutihia e te ’āsini. ’Ua hi’o atu ’o Judith i ni’a i te pare teitei ’e te piriha’o o te hō’ē fare purera’a mahometa. E fare nehenehe i reira e ha’amori ai e rave rahi o tō rātou mau ta’ata tupu mahometa.
’O Judith, Esther ’e ’o Désiré tei haere na i te ’ēkālesia a tō rātou Pāpā. I te tau ve’ave’a i ma’iri a’enei, ’ua ’āmui atu rātou i Te ’Ēkālesia a Iesu Mesia i te Feiā Mo’a i te mau Mahana Hōpe’ā nei. I teienei, tē haere ’āmui nei rātou to’otoru i te purera’a i te mau hepetoma ato’a. E mea au nā Judith ’ia ’apo mai i te ha’api’ira’a nō ni’a ia Iesu i roto i te Paraimere.
I te pae hope’a ’ua tae atu rātou i te fa’a’oa’oara’a. Tei reira a’ena te rahira’a o te mau ’utuafāre i roto i te ’āma’a. Tē fa’a’ite ra te hō’ē ta’ata i te mau video nō Noela i ni’a i te patu o te fare purera’a. ’Ua hi’o noa ’o Judith ia Iosepha ’ia arata’i ia Maria nā Betelehema i ni’a i te hō’ē ’āsini. ’Ua fa’aha’amana’o te mau purūmu repo iāna i tō Mārī !
I te hopera’a te video, ’ua tāpe’a mai te hō’ē pere’o’o tāxi. ’Ua haere mai te tuahine ra ’o Valerie, te peresideni nō te Sōtaiete Tauturu i rāpae.
« ’Ua āfa’i mai au i te mā’a ! » tāna ïa i pi’i.
’Ua tauturu te mau ta’ata ato’a ’ia ’āfa’i i te mau fāri’i mā’a i ni’a i te taupe’e. E fa’a’amura’a mau teie ! Terā « salade » iti ’ūmara pūtete, te taroti (carrotte), te pipi matie, te raiti tea re’are’a, te moa farai… e mea au roa !
« Māuruuru maita’i roa, e te tuahine Valerie ! » ’Ua parau ’o Judith.
I muri iho, te mau tamahou tāta’itahi i te fari’ira’a i te hō’ē pōpō, te hō’ē pēpe ha’avare ’e ’aore rā te hō’ē pere’o’o ha’uti. ’Aita rā i nava’i te mau tao’a hōro’a, ’aore ’o Judith i fāri’i i te hō’ē, ’aita rā ’oia i māna’ona’o atu. ’Ua au roa ’oia i te hi’o atu i te mau tamahou i te ’ata’atara’a.
’Ua hope te fa’a’oa’oara’a nā roto i te hīmene. ’Ua ’ata’ata Judith ’a hīmene ai rātou « hīmene te melahi nā ni’a mai te ra’i ».
’Ua hīmene ’āmui te ’āma’a tā’āto’a. E mea nehenehe mau ā. ’I fānau-mau-hia ’o Iesu i terā mau matahiti i ma’iri ! ’Ua māuruuru roa ’o Judith i te mea ē, ’ua ’ite ’oia, ’o Désiré ’e ’o Esther nō ni’a iāna. ’E ’ua ’oa’oa roa ’oia i te fa’ahanahanara’ahia tōna fānaura’a.
’O Esther, ’o Judith, ’e ’o Désiré i mua i tā rātou fare purera’a.
Fa’ahōho’ara’a nā Steph Marshall