Ineine nō te hiero
’Ua tupu teie ’ā’amu i Jamaica.
« E nāhea vau e fāri’i ai i te hō’ē parau fa’ati’a ? » Te uira’a ïa a Ajan.
« E rave rā i te mau mea ato’a ma te au maita’i » (Moromona 9:29).
’Ua ’ata roa ’o Ajan ’a fa’aro’o ai ’oia i te pātōtōra’ahia i ni’a i te ’ōpani. ’Ua ani manihini ’o Madda (Māmā) i tō rāua taea’e aupuru ’ia tauturu ia rāua nō te hō’ē pō utuāfare ta’a ’ē.
’Ua ’īriti ’oia i te ’ōpani. « Wah gwaan, te taea’e Williams ! » (« E aha te huru » ?)
« Everyting is irie ! » ’O te parau ïa a te taea’e Williams. (« Mea maita’i te mau mea ato’a » !) ’Ua hōro’a atu ra ’oia ia Ajan i te hō’ē pūtē vī nō ni’a mai i tāna tumu vī.
Pārahi ihora te taea’e ra ’o Williams i ni’a i te ro’i. ’Ua ani ’o Madda i te tuahine iti o Ajan, ia Dana, ’ia rave mai i te pure.
I muri mai i te pure, ’ua parau atu te taea’e ra ’o Williams : « I teie matahiti, e ti’ahia tō Ajan 12 matahiti. ’Ua ’ite ānei ’outou ē nō te aha e matahiti ta’a ’ē teie nōna ? »
’Ua ’oa’oa roa ’o Tejaun te teina o Ajan. « Nō te mea e nehenehe iāna ’ia fāri’i i te autahu’ara’a ’e ’ia ’ōpere i te ’ōro’a mo’a ! »
« ’Ua ti’a roa te reira ! » ’O te parau ïa a te taea’e Williams. « Tē vai ato’a ra te tahi tumu ta’a ’ē. »
’Ua ’īriti ’oia i tāna pūtē moni ’e ’ua huti mai i te hō’ē ’api parau na’ina’i. « E parau fa’ati’a teie nō te hiero. »
’Ua toro atu ’oia i te reira ia Ajan ra.
« Nave ! » ’Ua fa’ahorohoro Ajan i tōna nā manimani rima i ni’a iho i te hiero ’auro e vai nei i ni’a i te tāreta. « E aha tā ’oe e rave i teie taoʼa ? »
« E fa’a’ite atu vau i te reira i te ta’ata e pārahi ra i muri i te ’iri fari’i’ra’a i roto i te hiero. E fa’a’ite te reira ia rātou ē, ’ua ti’amā vau nō te tomo atu i roto. »
« Fa’a’ite mai na ! » ’Ua haru ’o Dana i taua mea ra a Ajan ’e ’ua hi’o māite ’oia i te reira.
« I tā ’oe hi’ora’a, e aha tō ’oe mana’o ’āhani e parau fa’ati’a tā ’oe ? » Te uira’a ïa a te taea’e Williams.
« E mana’o fa’ahiahia tō’u ! » ’Ua hi’o atu ra Ajan nā ni’a i te tāreta. « Terā rā, ’aita vau i ite ē, e nehenehe ānei iā’u ’ia haere i te hiero. « E mea moni roa te ho’o o te tīteti manureva nō te haere i reira. »
« E’ita ato’a vau e nehenehe e haere pinepine i te hiero », te parau ïa a te taea’e Williams. « Terā rā, tē fa’aha’amana’o mai nei tā’u parau fa’ati’a iā’u ē ’ia vai ineine noa vau no te tomo i roto. »
’Ua feruri a’era ’o Ajan hō’ē minuti. « ’Ua hina’aro ato’a vau e fa’aineine iā’u », ’o tāna ïa parau. « E nāhea vau e fāri’i ai i te hō’ē parau fa’ati’a ? »
« E fārerei ’oe i te ’episekōpo », te parau ïa a te taea’e Williams. « E ui mai ’oia ia ’oe i te tahi mau uira’a nō te hi’o ē, ’ua ineine ānei ’oe. »
« Mai te huru ra ē e hi’opo’ora’a ? » ’Ua ui ’o Ajan, ma te mata’u iti.
« E au te reira mai te hō’ē ’āparaura’a », te parau ïa a te taea’e Williams. « E tau’a te ’episekōpo nō ’oe, ’e tē hina’aro nei ’oia e tauturu ia ’oe ’ia vai ineine noa. »
’Ua tā’iri’iri a’era ’o Ajan i tōna upo’o. ’Ua au ’oia i te ’episekōpo.
« E hina’aro ānei ’oe e hi’o i te mau uira’a ? » ’Ua hōro’a atu te taea’e Williams ia Ajan i te hō’ē ’api parau ’e te tahi mau uira’a i ni’a iho. ’Ua tāpiri atu ’o Dana ’e ’o Tejaun i pīha’i iho iāna nō te hi’o atu.
« Nūmera hō’ē », tē tai’o ra ’o Ajan. « ‘E fa’aro’o ānei tō ’oe ’e te ’itera’a pāpū nō ni’a i te Atua, te Metua Mure ’Ore ; i tāna Tamaiti, ’o Iesu Mesia ; ’e i te Vārua Maita’i ?’ »
’Ua mata ieie ’oia. E mea ōhie ho’i. « ’Ē ! »
’Ua tāmau noa ’oia i te tai’o tāta’itahi i te mau uira’a. ’Ua ha’amāramarama ’o Madda ’e te taea’e Williams i te aura’a o te tahi mau parau.
I muri mai, ’ua tai’o fa’ahou ā ’o Ajan i te tahi atu ā uira’a : « ‘Tē māramarama ra ānei ’oe i te parau pa’ari ’e tē ha’apa’o ra ānei ’oe i te reira ?’ » ’Ua mata tu’atu’a a’era ’oia. « I te hō’ē taime ’ua hōro’a mai ’o D’andre iā’u i te tahi inu rāmu punch i tō’u ti’ara’a atu i tōna fare », tē nā reira mai ra ’oia. « Terā rā ’aita roa atu vau i hina’aro i te inu fa’ahou i te reira. Te aura’a ra, e’ita ïa vau e nehenehe e fāri’i i te hō’ē parau fa’ati’a nō te hiero ? »
« Te ha’apa’ora’a i te parau pa’ari ’o te ’orera’a ïa e inu i te ’ava, ’e te rāmu punch e ’ava ta’ero ïa tō roto », tē nā reira mai ra te taea’e Williams. « Terā rā e nehenehe ia ’oe e tātarahapa i te mau taime ato’a, ’e ’ia vai ti’amā nō te haere i te hiero. »
« Maoti o Iesu ! » te parau ïa a Tejaun.
« Te reira iho ā ! » ’O te parau ïa a te taea’e Williams. « I muri iho e fa’aha’amana’o noa tā ’oe parau fa’ati’a nō te hiero ia ’oe ’ia ha’apa’o tamau noa i te parau pa’ari. ’E ’ia vai ineine noa nō te haere atu i te hiero. »
’Ua ’ata’ata ’o Ajan. ’Ua huru maita’i roa mai ’oia.
« Penei a’e e haere ’oi’oi au i te hiero i te tahi taime » ’o te parau ïa a Ajan. « ’E ’ia nā reira ana’e au, ’ua ineine ïa vau ! »
Fa’ahōho’ara’a nā Shawna J. C. Tenney