Ani manihini ana’e i te mau ta’ata ato’a
Tē ora nei te ta’ata pāpa’i i Utah, i Marite.
’Ua hina’aro Jarom ’ia haere mai tōna ’utuāfare tā’āto’a i tōna bāpetizora’a.
« Hina’aro vau i tō’u ’utuāfare. ’Ua fa’a’ite te Fatu iā’u ». (Te mau hīmene, N°184).
’Ua pārahi Jarom i roto i te ’aihere i mua i te marae o tōna Nana (māmā rū’au). Tē fātata mai ra te taime nō te fa’a’oa’oara’a ’utuāfare !
Hi’o a’era ’oia i te mau nana’o ’ute’ute i te hiti o te fare. Ui atu ra ’oia : « E Māmā, e nāhea ’oe i te parau i te i’oa o Nana nā roto i te reo vāvā ? » E tari’a turi tō te māmā rū’au o Jarom. I te tahi taime e fa’a’ohipa rātou i te reo vāvā nō te ha’amana’o iāna.
« Mai teie te huru », ’ua parau Māmā. ’Ua ’aparima a’era ’oia i te i’oa. Pe’e ato’a atu ra Jarom i tōna nā rima. E mea au nāna ’ia ha’api’i mai nō ni’a i tōna ’utuāfare.
« E hina’aro vau e tāmata ! » ’Ua pārahi mai rā te tuahine fēti’i o Jarom, ’o Kati i pīha’i iho ia rāua. ’Aparima fa’ahou atu ra Māmā i te i’oa.
« I te ’āva’e i mua nei, nō tō’u bāpetizora’a, e nehenehe ānei tāua e hīmene i te hō’ē hīmene nā roto i te reo vāvā ? » Ui atu ra Jarom.
« ’Oia mau », nā ’ō a’era māmā.
« E aha te hō’ē bāpetizora’a ? » Ani a’era Kati.
Te rahira’a o te ’utuāfare o Iaroma e ’ere ïa i te melo nō Te ’Ēkalesia a Iesu Mesia i te Feiā Mo’a i te mau Mahana Hope’a nei. « Te bāpetizora’a, e ’ohipa ta’a ’ē ïa i roto i tā’u ’ēkālesia », ’ua parau Jarom. « ’O te taime ïa e fafau ai ’oe ’ia pe’e ia Iesu, ’e e fafau mai ’oia e tauturu ia ’oe ».
« ’Aita atu ai », ’ua parau Kati.
« E hina’aro ānei ’oe e haere mai i tō’u bāpetizora’a ? » Ui atu ra Jarom.
« ’Oia mau ! » ’Ua ’ata’ata Kati. Fāriu atu ra Jarom i ni’a i tōna Māmā.
« E nehenehe ānei e ani ato’a i te toe’a o tō’u mau fēti’i ’ia haere mai ? Tō’u mau pātea (tatie) ato’a ’e tō’u mau pā’ino (tonton) ? »
’Ua tā’iri’iri māmā i te upo’o nō te fāri’i. « Tē mana’o nei au e mana’o maita’i roa te reira ».
’Ua ani atu ra Jarom ’e ’o māmā i te toe’a o te ’utuāfare ’ia haere mai i te bāpetizora’a. ’Aita te mau pātea ’e te mau pā’ino i ’ite rahi nō ni’a i te bāpetizora’a. ’Ua ’ite rā rātou ē, e mahana ta’a ’ē teie nō Jarom. « E tae atu mātou ! », pahōno mai nei rātou.
Tau hepetoma i ma’iri. Tae mai nei te mahana bāpetizora’a o Jarom ! I te tomora’a Jarom i roto i te fare purera’a, e mata ’ata’ata iti rahi tōna. ’Ua ’ī te mau ’ana’ira’a pārahira’a i te mau melo o tōna ’utuāfare !
’Ua hōro’a nā mua te Pāpā o Jarom i te a’ora’a nō ni’a i te bāpetizora’a ’e te hōro’a o te Vārua Maita’i. ’Ua paraparau ato’a ’oia nō ni’a i te faufa’a o te mau ’utuāfare. « E ’oa’oa rahi tō mātou e bāpetizohia Jarom i teie mahana. ’E tē ’oa’oa nei mātou ē ’ua tae mai te ’utuāfare fēti’i ! » ’ua parau ’oia. « E aha te mea faufa’a roa a’e i te ao nei ? » ’ua ui atu ’oia. « ’O te ta’ata ïa, te ta’ata, te ta’ata ».
’Ua ’ata’ata te ta’ata. E parau Māori teie, tei auhia e rātou pā’āto’a.
I muri a’e i te a’ora’a a Pāpā, nā Jarom ’e nā Māmā te taime. ’Ua hīmene rāua i te hō’ē hīmene Paraimere nā roto i te reo vāvā. ’Ua ha’afātata te reira ia Jarom i tōna Māmā rū’au.
I muri iho, tomo a’era Jarom rāua ’o Pāpā i roto i te ’āpo’o bāpetizora’a. ’A ti’a noa ai ’oia i roto i te pape, hi’o a’era Jarom i tōna ’utuāfare fēti’i tā’āto’a. Te mau taea’e, te mau pātea, te mau pā’ino. Tei reira pā’āto’a rātou !
’Ua tāpiri Jarom i tōna nā mata. ’Ua tae mai te mana’o māhanahana ’e te hau. E au ra ē tē tauahi mai ra te hō’ē ta’ata iāna. Mana’o a’era ’oia i tōna Nana. Mana’o a’era ’oia i tōna mau tupuna. I ’ite ai ’oia ē, ’ua fa’ahiahia ato’a rātou iāna.
’Ua taui Jarom i tōna ’ahu rari. I muri iho, ’ua tauahi ’oia i te mau melo tāta’itahi o tōna ’utuāfare. ’Ua māuruuru roa ’oia ia rātou pā’āto’a. ’E ’oia ato’a i te mau melo o tōna ’utuāfare i te ra’i, tāna e fārerei atu ’ia tae i te hō’ē mahana. ’Ua hina’aro ’o Jarom e rave tāmau noa i te mau mā’itira’a tano ’ia ha’apeu rātou iāna.
Fa’ahōho’ara’a nā Oksana Grivina