Tō’u tere mātāmua i te hiero
Hola ! ’O Elena vau. Teie tō’u taime mātāmua i te haerera’a i te hiero.
Ma’a hepetoma i ma’iri na, ’ua fārerei atu vau i tō’u ’episekōpo. ’Ua ui mai ’oia iā’u i te tahi mau uira’a nō te ha’apāpū ē ’ua ineine ānei au nō te haere i te hiero. (E nehenehe ’outou e tai’o i te mau uira’a i te ’api 22 !) I muri iho ’ua hōro’a mai ’oia i tā’u parau fa’ati’a nō te hiero.
Tē fa’aineine ra māua nō te haere. ’Ua ’ō’omo vau i tō’u ’ahu nehenehe roa a’e nō te sābati. ’Ua fa’aineine ato’a vau i te tahi mau mea nō te tā’amu i tō’u rouru ’ia rari te reira. ’E tē hi’o ra vau, tei reira ānei tā’u parau fa’ati’a. ’Ua ineine māua nō te haere nā ni’a i te pere’o’o uta ta’ata !
Teie te hiero ! E mea nehenehe mau ā.
’Ia tomo atu vau i roto i te hiero, ’ua vai te hau iā’u nei. ’Ua fa’a’ite atu vau i tā’u parau fa’ati’a i te rave ’ohipa nō te hiero i mua i te ’iri ’ohipara’a. ’Ua hōro’a mai te tahi atu rave ’ohipa nō te hiero i te ’ahu ’uo’uo. Haere atu ra vau i roto i te piha ’ahura’a nō te taui iā’u.
I teienei tē tīa’i nei au i te taime ’ia bāpetizohia vau. I te bāpetizora’ahia tō’u taea’e, ’ua ti’a atu vau i mua i te āpo’o ’ei ’ite. ’Ua hi’opo’a maita’i au ē, ’ia mo’e roa ’oia i raro a’e i te pape.
’O vau i teienei ! E mea māhanahana te pape. ’Ua bāpetizohia vau nō te mau ta’ata ato’a e rave rahi, te tahi i muri i te tahi.
I tō’u haerera’a mai i rāpae, ’ua hōro’a mai te hō’ē rave ’ohipa nō te hiero i te tahi tauera. ’Ua tāmarō vau iā’u i roto i te piha ’ahura’a ’e ’ua ’ō’omo fa’ahou i tō’u ’ahu sābati. ’Ia haere mai au i rāpae, ’ua tītau mai te rave ’ohipa nō te hiero iā’u ’ia rave i te ha’amaura’a nō te mau ta’ata e rave rahi.
E mea ta’a ’ē mau tō’u taime i roto i te hiero ! Tē ’oa’oa nei au i te mea ’ua nehenehe iā’u e tauturu ia vetahi ’ē nā roto i te bāpetizora’a ’e te ha’amaura’a nō rātou. E hia’ai rahi tō’u nō te ho’i fa’ahou mai.
Fa’ahōho’ara’a nā Rachel Hoffman-Bayles