Te hoa i te hoa
Te tātarahapara’a nō te piha hīvira’a ta’ata
I te 11ra’a o tō’u matahiti, tē ora ra tō’u ’utuāfare i roto i te hō’ē fare 12 tahua i Hong Kong. I te mau mahana ato’a i muri a’e i te ha’api’ira’a, e horo vau i roto i te fare tahua ’e e pata i te piha hīvira’a ta’ata nō te ta’uma i tō mātou piha nohora’a.
I te hō’ē mahana, ’ua tomo vau i roto i te piha hīvira’a ta’ata ’e ’ua patapata i te mau pitopito ato’a ’ia ’ama pauroa te reira. I teienei, e tāpe’a te piha hīvira’a ta’ata i te tahua tāta’itahi. ’Ua ha’amata te ’ūputa i te piri, i terā iho rā taime, ’ua toro mai te hō’ē rima i roto ’e ’ua matara a’era te ’ōpani. ’O te hō’ē ïa o te mau ta’ata e fa’aea ra i ni’a atu ia mātou. ’Aita ’oia i parau hō’ē noa a’e parau nō ni’a i te mau pitopito, ’ua taiā rā vau. E au rā iā’u, e rā ’ē te tau e tae ai ’oia i te fare !
’Oia mau, ’ua tāpe’a te piha hīvira’a ta’ata i te tahua i muri iho, ’ua tīa’i ri’i, ’e ’ua tere fa’ahou. I te taime ’a matara ai te ’ōpani i ni’a i tō’u tahua, ’ua horo atu vau i rāpae. ’Ua rari roa vau i te hou i te taera’a i fare nō te mea ’ua horo vitiviti au !
I muri noa iho i tō’u taera’a i te fare, ’ua ta’i mai te niuniu. ’O terā ta’ata i roto i te piha hīvira’a. ’Ua taiā ri’i au i te tīa’ira’a ’ia oti te paraparaura’a a tō’u māmā i roto i te niuniu.
’Ia oti tāna paraparaura’a i roto i te niuniu, ’ua u’i mai ra tō’u māmā, « ’ua patapata ’oe i te mau pitopito ato’a i roto i te piha hīvira’a ta’ata » ?
E’ita tā’u e nehenehe e ha’avare i tō’u metua vahine. ’Ua pāhono atu ra vau, « ’Ē ».
’Ua ’ata tō’u metua vahine. « Teie : e pa’uma tāua i ni’a ’e e paraparau i te ta’ata e ora ra i pīha’i iho i tō tātou piha ».
’Ua pa’uma atu māua. ’Ua pātē atu vau i te oe o te ’ōpani fare, ’e ’ua haere mai tō’u veutupu i te ’ūputa. ’Ua pi’o vau i tō’u upo’o i raro ’e ’ua parau tē tātarahapa nei au i te patapatara’a i te tā’āto’ara’a o te mau pitopito. ’Ua fafau atu vau e’ita roa vau e nā reira fa’ahou.
E mea maita’i roa tō mātou veutupu. ’Ua parau ’oia, « mai te mea e’ita ’oe e nā reira fa’ahou, tē mana’o nei au e mea maita’i te reira ».
I muri a’e i tō’u paraura’a iāna ē, tē tātarahapa nei au, ’ua ’oa’oa vau. ’E ’aita vau i patapata fa’ahou i te mau pitopito o te pīha hīvira’a ta’ata.
’Ua tauturu teie ’ohipa iā’u ’ia ha’api’i mai nō ni’a i te tātarahapa. ’Ua ’ite au ē, ’ua rave au i te hō’ē ’ohipa hape. ’Ua ’oto vau ’e ’ua ani au ’ia fa’a’ore mai i tā’u hapa. ’E ’aita roa atu vau i nā reira fa’ahou. I muri iho ’ua ’oa’oa vau ! E nehenehe ato’a te tātarahapa e hōro’a mai ia ’outou i te ’oa’oa.
Fa’ahōho’ara’a nā Alyssa Tallent