Te ’itera’a i te hau
« ’A tauturu mai na iā’u ’eiaha ’ia mo’emo’e roa ».
’Ua tāmata ’o Molly ’eiaha e ta’i ’a aroha ai ’oia i tōna tuahine, ia Macy. « ’Ua here au ia ’oe ! » ’ua parau Molly. ’Ua ’āpā maita’i ’oia ia Macy.
« E fārerei fa’ahou tāua i te mau ’āva’e ri’i i muri nei », te parau ïa a Macy. Tē reva nei ’o Macy nō te haere i te fare ha’api’ira’a tuarua i teienei. Tei te fare ha’api’ira’a tuarua a’ena te hō’ē o te mau taea’e o Molly. Tei roto i te ’āua misiōni te tahi atu taea’e tōna. ’Ua mihi roa Molly ia rātou pā’āto’a !
’Ua ’umi’umi a’era te māmā i te rima o Molly. ’Ua hi’o noa rāua ia Macy i te terera’a. « E mihi tātou iāna », ’ua parau māmā. ’Ua tahe tōna roimata.
’Ua haere atura Molly i roto i te fare. ’Ua haere ’oia i roto i te piha ta’ata ’ore o Macy ’e ’ua tāpiri i te ’ōpani. I muri iho, ’ua pārahi ’oia i ni’a i te ro’i o Macy ’e ’ua ha’amata i te ta’i.
’Ua pātōtō mai te hō’ē ta’ata i ni’a i te ’ōpani. ’Ua tomo mai ’o māmā ’e ’o pāpā. ’Ua tauahi rāua ia Molly. ’Ua pārahi rātou pā’āto’a i ni’a i te ro’i o Macy ē tae roa i te taime ’ua fa’aea Molly i te ta’i.
« ’Ua ’ite au ē, tē ’oto ra ’oe nō te mea ’ua reva ’o Macy », ’ua parau pāpā. « E fa’aoti ana’e tātou i te hō’ē pure ’utuāfare ? E nehenehe tātou e ani i te Metua i te ao ra e tauturu mai ia tātou ’ia huru maita’i a’e mai. E nehenehe ānei tā ’oe e pure, e Molly ? »
« OK ». ’Ua pi’o Molly i tōna upo’o. « E te Metua i te ao ra, māuruuru mātou nō te mau ta’ata ato’a i roto i tō mātou ‘utuāfare—nō Will, Parker, Macy, nō’u, ’e ’o māmā ’e ’o pāpā. Tē ha’amāuruuru nei mātou ia ’oe i te mea ē, e nehenehe mātou e riro ’ei ’utuāfare e a muri noa atu. Tauturu mai na ia mātou ’ia fāri’i i te tāmāhanahanara’a. ’E e tauturu mai iā’u ’eiaha vau ’ia ’ite i te mo’emo’e ».
Tē mihi nei Molly ’ia paraparau ia Macy i te taime ta’otora’a. ’Ua ’ite rā ’oia ē, ’ua fa’aro’o te Metua i te ao ra i tāna mau pure. ’Ua ’ite ’oia ē, e tauturu ’oia (te Fatu) iāna ’ia huru maita’i a’e mai.
I te po’ipo’i a’e, e mea māniania ’ore te fare o Molly ! ’Ua mihi ’oia i te ’atara’a ’e ’o Macy ’a fa’aineine ai rāua nō te ha’api’ira’a. ’Ua mihi ’oia i te tāmā’a-’āmui-ra’a i te po’ipo’i ’e te paraparaura’a. I te tahi taime, e paraparau Macy iāna nō ni’a i te mea tāna i ha’api’i mai i te séminaire. E tupu noa te hau i roto ia Molly ’ia paraparau ana’e rāua nō ni’a i te ’evanelia.
Terā ïa ! E mana’o tō Molly.
’Ua fa’aineine Molly iāna nō te ha’api’ira’a. I muri iho, ’ua haere ’oia e hi’o i tōna māmā.
« ’Ia ora na, e tā’u here ». ’Ua tauahi atu māmā iāna. « ’Ua ineine ’oe nō te ha’api’ira’a ? »
« E nehenehe ānei tātou e tai’o ’āmui i te hō’ē a’ora’a nō te ’āmuira’a hou vau ’a haere ai ? » ’ua ui atu Molly. « ’Ia mana’o vau, e tauturu terā iā’u ’ia huru maita’i a’e mai ».
’Ua ʼataʼata māmā. « E mana’o maita’i roa te reira ».
Te tahi i muri mai i te tahi, ’ua tai’o rāua i te hō’ē a’ora’a nō te ’āmuira’a rahi nō ni’a i te tāmāhanahana. E mea au roa nā Molly e pārahi i pīha’i iho ia māmā. E mea au roa ’ia tai’o i te a’ora’a ’e ōna.
I te otira’a tā rāua tai’ora’a, ’ua ’ata’ata Molly. « E rave fa’ahou tāua i te reira ! »
Tē mihi noa ra ā ’oia ia Macy, ia Will, ’e ia Parker. ’Ua iti ri’i mai rā tōna mana’o mo’emo’e. ’Ua pāhonohia mai tāna pure ! E nehenehe tāna e pārahi i pīha’i iho i tōna māmā ’e tōna pāpā. ’E e nehenehe te mau parau a te mau peropheta e tauturu iāna ’ia ’ite i te hau.
Fa’ahōho’ara’a nā Liz Brizzi