Te tōtōāra’a pere’o’o ta’ata’ahi
’Ua parau tōna mau hoa ē, e mea ’ārearea. E ’ere rā i te mea maita’i.
’Ua ta’ahi vitiviti ’o Sam i tōna pere’o’o i ni’a i te ’āivi. ’Ua hipa ’oia i mua. ’Ua ta’iri te mata’i i tōna rouru. ’Ua ta’ahi tōna hoa ’o Liam nā pīha’i iho iāna.
« Tē rohirohi ra ? » ’ua parau ’o Liam.
« ’Aita roa atu ! » ’ua parau ’o Sam.
’Ua tae a’ena tō rāua hoa ’o Eric i te ’āua ha’utira’a i ni’a i te tupua’i ’āivi.
« Komm schon ! Haere mai ! » tē tuō mai ra ’oia.
’Ua tae atura ’o Sam ’e ’o Liam i ni’a i te tupua’i ’āivi. ’Ua tāpe’a nā tamāroa i tō rātou pereo’o ta’ata’ahi ’e ’ua pārahi i raro a’e i te hō’ē tumu rā’au.
’Ua rave mai Liam i te hō’ē ’ōfa’i ’e ’ua tāora atu. « ’Ua fiu vau ». ’Aita i rahi te vāhi e haere i roto i tō rātou ’oire iti i Helevetia.
« ’O vau ato’a », tē parau ra Eric. ’Ua pāra’u ’oia i te repo i te hō’ē rā’au.
« E nehenehe noa tā tātou e ta’ata’ahi noa tā i te pereo’o », te parau ïa a Sam.
’Ua fa’atu’atu’a ’o Liam i tōna mata. « Terā noa tā tātou ’ohipa ».
« E rave ana’e i te hō’ē ’ohipa ’ārearea ! » ’ua parau Eric. ’Ua ti’a tā’ue ’oia i ni’a haere atu ra i te vāhi tāpe’ara’a pere’o’o ta’ata’ahi, e rave rahi pere’o’o ta’ata’ahi e vai ra i reira. ’Ua pe’e atu ra ’o Sam ’e ’o Liam iāna.
’Ua vī a’era te ’ōpū ’o Sam. I te tahi taime, te mea tā Eric ’e tā Sam e feruri ra, e mea ’ārearea, e ’ere ïa i te mea ’ārearea nōna. E mea au nā Eric ’e nā Liam e fa’aharama’au i te tahi atu mau tamari’i ’e e parau i te mau parau ’ino i roto i te piha ha’api’ira’a. E mea ta’a ’ē paha i teie taime.
Ta’a ’ē atu i te reira, ’aita i rahi te tamāroa i roto i te piha ha’api’ira’a a Sam. ’Āhiri e ’ere ’oia i te hoa nō Eric ’e nō Liam, ’o vai ïa tōna hoa ?
« E tātara ana’e i te mau tāpo’i ti’ara’a mata’i o te mau huira ato’a », ’ua muhumuhu mai Eric. « E nehenehe tātou e huna i te reira i pīha’i iho i te tumu rā’au ». ’Ua tūturi ’oia i pīha’i iho i te hō’ē pereo’o ta’ata’ahi ’ute’ute ’ana’ana ’e ’ua tātara i te hō’ē tapo’i ti’ara’a mata’i o te hō’ē o nā huira.
’Ua ’ata ’o Liam. « ’Ē ! E ’ohipa ’ārearea roa ïa te reira ».
’Ua māpu Sam i te aho. ’Aita. I teie ra taime, ’aita ïa i ta’a ’ē atu. « Aita vau i ’ite », tāna ïa i parau. « E ti’a paha ia tātou ’ia haere ’ē ».
’Ua patu atu Eric i te rima o Sam. « Eee, haere mai ! », ’ua parau ’oia « ’Aita hō’ē noa a’e ta’ata e hi’o mai ra ».
« E mau tuha’a iti noa terā », ’ua parau Liam. « ’Aita hō’ē ta’ata e ’ite ē, ’ua mo’e te reira ».
’Ua tāmata Sam i te tāu’a ’ore i te mana’o māuiui i roto i tōna ’ōpū. Te ravera’a i te mau tapo’i ti’ara’a mata’i, e’ita te reira e fa’a’ino i te mau pere’o’o ta’ata’ahi. ’Ua ha’ape’e ’oia i tōna pa’ufifi ’e ’ua ta’iri’iri i tōna upo’o.
’Ua tātara nā tamāroa e toru i te tā’āto’ara’a o te mau tāpo’i ti’ara’a mata’i o te mau huira pereo’o ta’ata’ahi ’e ’ua horo atu pīha’i iho i te tumu rā’au. ’Ua huna rātou i te mau tāpo’i ato’a i raro a’e i te hō’ē ’ōfa’i ’e ’ua pārahi i raro nō te hi’o i te mau pereo’o ta’ata’ahi. ’Ua ’ata roa ’o Liam ’e ’o Eric.
’Aita i maoro ’ua haere maira te hō’ē ta’ata, ’ua tātara i tōna pere’o’o ta’ata’ahi, ’e reva atura.
« ’A hi’o na ? ’Aita ’oia i ’ite ri’i a’e », te parau ïa ’a Liam.
’O vau rā ’ua ’ite ïa vau, te ferurira’a ïa ’o Sam.
I te toe’a o te mahana, ’aita i nehenehe ia Sam ’ia fa’aea i te feruri i te mau tāpo’i ti’ara’a mata’i. ’Ua hina’aro roa ’oia e fa’aho’i i te reira, ’aita rā tāna e rāve’a nō te ’ite i te mau fatu o te mau pereo’o ta’ata’ahi. ’Ua tūturi a’era ’oia i raro ’e ’ua parau atura i te Metua i te Ao ra nō ni’a i te reira.
« ’Ua māuiui roa vau », te parau ïa ’a Sam. « ’Ahani hoa pa’i ’aita vau i rave i te reira. ’A fa’a’ore mai na i tā’u hapa, e te Metua i te Ao ra ».
I te po’ipo’i a’e, ’ua tere fa’ahou ’o Sam ’e tōna nā hoa i te ’āua ha’utira’a nā ni’a i tō rātou pere’o’o ta’ata’ahi.
’Ua parau fa’ahou ’o Eric, « E rave ana’e i te mau tāpo’i ti’ara’a mata’i ! »
Fa’ahou ā, ’ua fāri’i ’o Liam.
’Ua ha’amana’o ’o Sam i tāna pure. ’E i teie taime, ’ua tupu te tahi ma’a mana’o itoito i roto iāna.
« ’Aita vau e mana’o nei ē, e mea ti’a ia tātou ’ia nā reira ».
« Nō te aha ’aita ? » Te parau ïa a Liam.ma te fa’atu’atu’a i te mata. « ’Aita hō’ē a’e ta’ata i ’ite i nanahi ra ».
« E’ita vau e hina’aro ’ia fa’a’ino te hō’ē ta’ata i tō’u pere’o’o ta’ata’ahi », te parau ïa ’a Sam. Hou ’a nehenehe ai i te hō’ē tamāroa ’ia pāhono, ’ua ’ōu’a ’oia i ni’a i tōna pereo’o ta’ata’ahi. ’Ua tuō ’oia « Pārie au ia ’ōrua ’e tae atu i te fare hāmanira’a faraoa ! » ’E ’ua ha’amata ’oia i te ta’ahi vitiviti.
’Ua haru ato’a ’o Eric ’e ’o Liam i tō rāua pereo’o ta’ata’ahi.
« ’Aita i tano ! ’Ua ha’amata ’oe nā mua », te pi’ira’a ïa ’a Liam.
’Ua ’ata ’o Sam ’a tere mai ai tōna nā hoa nā muri iāna. ’Ua muhumuhu ’oia i te hō’ē ha’amāuruurura’a i te Metua i te Ao ra. ’Ua huru maita’i roa mai ’oia.
Fa’ahōho’ara’a nā Shane Clester