E mau pionie i te mau fenua ato’a
Te piāna a Ludovic
’Ua ’oa’oa Ludovic ’ia tāvini i te Metua i te Ao ra.
’Ua rave Ludovic i te tahi mau pārahira’a tūfetu ’e ’ua ’āfa’i i te reira nā ni’a i te purūmu. E sābati te reira mahana, ’e fātata roa te purera’a i te ha’amata. ’Aita i nava’i te pārahira’a i te fare i reira rātou e fa’atupu ai i tā rātou purera’a i Togo. Nō reira, ’ua ’āfa’i tāmau noa Ludovic i te mau pārahira’a nō ’ō mai i te fare ’o tōna pāpā rū’au.
« Nō te aha ’oe i fa’aru’e ai i te hō’ē fare purera’a maita’i nō te haere i roto i te hō’ē fare na’ina’i ? » te reo ïa o te hō’ē ta’ata i ni’a iāna. « ’Aita ato’a ho’i e pārahira’a roroa i roto i tā ’oe fare purera’a ! », te reo ïa o te tahi atu ta’ata, ma te ’ata.
’Ua fa’ahua fa’aro’o ’ore ’o Ludovic. Tītau-noa-hia iā’u ’ia tāmau noa i te rave i te mea ti’a, tōna ïa mana’o.
’Ua ha’api’i mātāmua mai Ludovic nō ni’a i te ’Ēkālesia i te 10ra’a o tōna matahiti. I teienei, e 12 matahiti tōna. ’Ua bāpetizohia ’oia ’e tōna ’utuāfare ’aita i maoro a’enei. ’Ua mau ’oia i te autahu’ara’a ’e ’ua tauturu i te ’ōperera’a i te ’ōro’a mo’a. ’Ua fa’aherehere ato’a ’oia i te tahi o tāna moni tāmā’a nō te ho’o mai i te faraoa nō te ’ōro’a mo’a i te hepetoma tāta’itahi. ’Ua oa’oa ’o Ludovic ’ia tāvini i te Metua i te Ao ra.
I te taime ’a ha’amata ai te purera’a, ’ua ’ī roa te piha na’ina’i. Tē pārahi ra te tahi mau ta’ata i ni’a i te mau pārahira’a tā Ludovic i ’āfa’i mai. ’Ua ti’a noa te tahi atu mau ta’ata.
’Ua ha’amata te purera’a nā roto i te hō’ē hīmene. « Pi’i mai ra te Atua », te reo hīmene ïa ’o Ludovic. E mea au nāna ’ia hīmene i te fare purera’a.
I muri a’e i te purera’a, e hīmenemene noa ’o Ludovic ’a fa’anaho noa ai ’oia i te mau pārahira’a. E hīmenemene noa ’oia ’a ho’i ai ’oia i te fare. I muri iho, ’ua tupu mai te hō’ē mana’o i roto iāna. ’Ua tātara mai ’oia i tānā piāna ha’uti. Penei a’e e nehenehe tāna e hi’o e nāhea i te ha’uti « Pi’i mai ra te Atua » !
’Ua hīmenemene noa Ludovic i te mau nota ’e ’ua ha’uti i terā ’e terā tāviri ’ē tae roa atu ’ua ’āfaro roa. ’Aita i maoro, ’ua ha’api’i ’oia iāna iho ’ia ha’uti i te tā’āto’ara’a o te hīmene.
’Ua ha’amana’o a’era oia ē, tē vai ra tā tōna ’utuāfare te tahi mau haruharura’a nō te mau hīmene a te ’Ēkālesia. ’Ua fa’aro’oro’o ’oia i te reira ’e ’ua ha’api’i i te ha’uti ato’a i te tahi atu mau hīmene. ’Ua ha’api’ipi’i noa ’e ’ua ha’api’ipi’i noa ’o Ludovic.
« Nō te aha ’aita ’oe e ha’uti i roto i te fare purera’a ’a hīmene ai tātou ? » Te anira’a ïa a te pāpā ’o Ludovic i te hō’ē mahana.
’Ua ’ōtu’i ri’i te vaira’a mā’a ’o Ludovic. « E mea ha’amā roa », tāna ïa parau. « E ’ia hape ana’e au ? »
« E tāmau noa ’oe i te ha’uti », te parau ïa ’a pāpā « E fa’ata’i piāna maita’i a’e ’oe i tā ’oe e feruri ra »
I te sābati i muri iho, ’aita ’o Ludovic i hōpoi noa i te pārahira’a. ’Ua hōpoi ato’a ’oia i tāna tahua nota ha’uti i te fare purera’a. I te taime nō te hīmene mātāmua, ’ua tu’u ’oia i tōna mau manimani rima ma te taiā i ni’a i te mau tāviri nota. I muri iho ’ua ha’amata ’oia i te ha’uti. ’Ua hīmene te mau ta’ata ato’a. ’E e mea maita’i roa te ta’i piāna !
I muri a’e i te reira, ’ua ha’uti ’o Ludovic i te fare purera’a i te mau sābati ato’a. I te tahi taime e hape ’oia. ’Aita rā ’oia i fa’aea. Mai te mea ē, e mea fifi roa ’ia ha’uti i te hīmene, e hīmene rātou ma te piāna ’ore, ’e nā Ludovic e arata’i i te hīmene.
’Ua ’ata’ata ’o Ludovic. ’Aita ’oia e fifi ’ia fa’atupuhia tā rātou purera’a i te fare o te tahi ta’ata. ’Aita ato’a ’oia e fifi ’ia fa’ao’ō’o mai te ta’ata iāna. Te mea faufa’a rā ’o te fa’a’ohipara’a ïa ’o Ludovic i tōna mau tāreni nō te tāvini i te Atua.
E fenua na’ina’i o Togo i Afirita to’o’a o te rā.
I teie mahana, tē vai nei e 21 pāroita ’e te ’āma’a i reira.
Te reo tumu o Togo, e reo farāni ïa.
’Ua ha’api’i te hō’ē misiōnare ia Ludovic ’ia tai’o i te pehe, e nehenehe ïa iāna ’ia ha’uti maita’i a’e i te piāna.
’Ua pa’ari ’o Ludovic i teienei. E mea au roa nāna ’e tāna vahine ’o Benedict te pehe.
E piāna mau tā Ludovic i te fare ’e e ha’uti ’oia i te hāmonia i te fare pure.
Fa’ahōho’ara’a nā Caroline Garcia