Pāpa’ihia e ’outou
Te mau fā nō te bāpetizora’a
I te ’āva’e Novema 2019, ’ua fa’aro’o vau ’e tō’u ’utuāfare i te purera’a mata ’e mata a Elder Gong nō ni’a i te fa’anahora’a nō te mau tamari’i ’e te feiā ’āpī. I muri iho, ’ua hōro’a mai tō’u ’episekōpo ia mātou i te mau buka iti nō te tauturu ’ia ’ohipa i ni’a i tā mātou mau fā.
Ta’u fā mātāmua o te fa’aotira’a ïa i te tai’o i te Buka a Moromona nā mua a’e i te va’ura’a o tō’u matahiti nō te fa’aineine nō tō’u bāpetizora’a. ’Ua ha’amata a’ena vau i te tai’o i te reira e ’ere rā ma te ’ana’anatae maita’i. I terā rā mahana, ’ua rave au i te hō’ē fa’anahora’a ’e tō’u pāpā. ’Ua nūmera māua e fea rahira’a pene e ti’a iā’u ’ia tai’o i te mahana tāta’itahi nō te fa’aoti i te Buka a Moromona hou tō’u bāpetizora’a. ’Ua ha’amata vau i te tai’o i te mau mahana ato’a ma te tāpa’o ’ia oti ana’e tā’u tai’ora’a i te tuha’a tāta’itahi.
’A tai’o ai au, ’ua hina’aro vau e rave i te mau ’ohipa maita’i atu ā. Nō reira ’ua ’āmui atu vau i roto i te ha’apaera’a mā’a nā te ao ato’a nei tā te peresideni Nelson i fa’aara nō te tauturu i te āraira’a i te Tovi-19. ’Ua ’oa’oa vau i te mea ē, ’ua ti’a iā’u ’ia rave i te hō’ē ha’apaera’a mā’a hope roa. ’Ua fa’aitoito tō’u nā metua iā’u ’ia pure ’e ’ia ha’apae i te mā’a nō te fāri’i i tō’u iho ’itera’a pāpū nō te Buka a Moromona ’e nō te bāpetizora’a.
I te sābati mātāmua nō te ’āva’e mē, ’ua pure au ’e ’ua ha’apae i te mā’a. I muri noa iho, ’ua oti iā’u i te tai’o i te Buka a Moromona tā’āto’a. ’Ua ’oa’oa roa vau nō tō’u bāpetizora’a—i tō’u mahana fānaura’a. ’Ua ’ite au ’ua ineine au nō te rave i teie fafaura’a ’e te Atua ! ’Ua ’ite au ē e parau mau te Buka ’a Moromona. ’Ua au roa vau i te tai’ora’a i te reira, ’e tē ’oa’oa nei au i te mea ē, ’ua fa’aoti au i teie fā nā roto i te tauturu a tō’u ’utuāfare.
Fa’ahōho’ara’a nā Rosalie Ledezma