Tauturura’a ’e te Vārua Maita’i
’Oia, e nehenehe ’outou e fāri’i i te Vārua Maita’i hou ’outou ’a bāpetizohia ai.
’Ua haere atu Mateo ’e tōna pāpā i te vāhi ho’ora’a mā’a hotu a tō rātou ’utuāfare. ’Ua pe’e atu te ’ūri a Mateo, ’o Zeus, ia rāua.
« ’Ua ui ānei ’oe i te ’episekōpo nō ni’a i tō’u bāpetizora’a ? » ’ua parau Mateo. ’Ua vau a’ena tōna matahiti, ’aitā rā ’oia i bāpetizohia atura nō te ma’i pe’e.
« ’Ua parau ’oia e’ita ’oe e nehenehe ’ia bāpetizohia i teie ’āva’e », ’ua parau pāpā. « Penei a’e i te ’āva’e i muri nei ».
« OK » ’Ua tu’atu’a ri’i te mata o Mateo. ’Ua hina’aro roa ’oia ’ia bāpetizohia ’oia ’e ’ia fāri’i i te hōro’a o te Vārua Maita’i. E au rā ē, e’ita roa atu te reira e tupu !
’Ua tātara pāpā te vāhi ho’oho’ora’a. ’Ua tauturu Mateo i te amora’a i te mau ’āfata ’ānani, te tāporo, te vī ’e te mai’a i rāpae. ’E ’ua tauturu ’oia i te pānahora’a i te reira i ni’a i te mau pa’epa’e.
’Ua feruri tāmau noa ’o Mateo nō ni’a i te Vārua Maita’i ’a ’ohipa noa ai rāua. « E aha te huru o te Vārua Maita’i ? », ’ua ui atu ’oia.
« E tāmāhanahana te Vārua Maita’i iā’u ’ia ’oto ana’e au », ’ua parau pāpā. « ’E e fa’atupu ’oia i te mana’o maita’i i roto iā’u ’ia tauturu ana’e au i te hō’ē ta’ata ».
« Tē hina’aro ’oi’oi nei au ’ia bapetizohia vau nō te fāri’i i te Vārua Maita’i ! »
« E fāri’i ato’a ’oe i te Vārua Maita’i hou ’a bāpetizohia ai ’e ’a ha’amauhia ai ’oe », te parau ïa a pāpā. « E nehenehe ’oe e ’ite i tāna tāmāhanahana i teienei. Mai te taime ’ia pure ’oe ’aore rā e rave ai ’oe i te hō’ē ’ohipa maita’i nō te hō’ē ta’ata. ’E ’ia oti ’oe i te ha’amauhia, e vai tāmau mai te Vārua Maita’i ia ’oe ra.
’Ua feruri Mateo i terā parau. ’Ua fāri’i ānei ’oia i te Vārua Maita’i nā mua a’e ?
’Aita i maoro ’ua fa’auta rāua i te mau ’āfata ato’a. « ’Ua ineine ānei ’oe nō te tauturu ia Sosa ma ? » ’ua ui atu pāpā.
’Ua tū’au Mateo i tōna upo’o. E mea fifi roa nā Sosa tāne ’e tāna vahine ’ia hāhaere. Nō reira e haere ’o Mateo i te mātete nō rāua. I te tahi taime e tauturu ’oia ia rāua ’ia rave ato’a i te mau ’ohipa o te fare.
’Ua haere atu ’o Mateo ’e ’o Zeus i te fare o Sosa ma. ’Ua tārape mai ’o Sosa vahine i mua i te taupe’e fare. « ’Ia ora na ! »
« E hina’aro ānei ’oe te tahi mau mā’a i te fare toa i teie mahana ? » ’ua ui atu Mateo.
« ’Ē. E hina’aro vau i te faraoa, te ’ūmara putete ’e te i’o pu’a’atoro ». ’Ua tai’o ’o Sosa vahine i te tahi mau moni pa’ari. « E nava’i terā ».
’Ua rave mai Mateo i te moni. ’Ua ’ite atu ’oia i te hō’ē fa’ari’i pehu i pīha’i iho i te ’ūputa. « E nehenehe ānei tā’u e ’āfa’i i teie i rāpae’au ? », ’ua ui atu ’oia.
« ’Ē. Māuruuru ! » ’ua parau ’o Sosa vahine.
I muri a’e i tōna ’āfa’ira’a i te fa’ari’i pehu i rāpae, ’ua ho’o mai Mateo i te mā’a. ’Ua feruri fa’ahou ’oia i te mau mea ato’a tāna i rave i taua po’ipo’i ra. ’Ua tauturu ’oia ia pāpā i te vāhi ho’ora’a mā’a. ’Ua tauturu ’oia ia Sosa ma ’ia ho’o mai i te mā’a. ’E ’ua vai mai te hō’ē mana’o maita’i i roto iāna. ’Ua fāri’i ’oia i te Vārua Maita’i, mai tā pāpā i parau !
’Ua ti’aturi ’o Mateo ē, e’ita ’oia e tīa’i maoro atu ā ’ia bāpetizohia ’oia. ’Ua hina’aro ’oia ’ia vai noa te Vārua Maita’i iāna ra i te mau taime ato’a !
Fa’ahōho’ara’a nā Carolina Farías