Nō roto mai i te Peresidenira’a Mātāmua
Te upo’oti’ara’a i ni’a i tō ’outou mau tāmatara’a
Nā te peresideni Dallin H. Oaks
Tauturu hō’ē i roto i te Peresidenira’a Mātāmua
Tā’u tāmatara’a rahi roa a’e i tō’u tamari’iri’ira’a, i te taime ïa ’a pohe ai tō’u metua tāne. E hitu ïa tōʼu matahiti.
E metua vahine fa’ahiahia roa tō’u ’e te mau metua tupuna maita’i. Terā rā, ’ua ta’i maoro vau. I te fare ha’api’ira’a ’ua fa’ao’ō’o tō’u mau hoa ha’api’ira’a iā’u nō te mea ’aita vau i ’ite maita’i i te tai’o ’aore rā, i te nūmera. ’Ua hāmani ’ino te tahi o te mau tamari’i pa’ari iā’u i ni’a i te pere’o’o uta ta’ata o te fare ha’api’ira’a. ’Ua hina’aro roa vau ’ia fāri’i i te mau tārēni mai tō vetahi, e mau mā’ona maita’i ’aore rā e mau ta’ata hīmene maita’i rātou.
Mā’a taime i muri mai, ’ua ha’amata vau i te maita’i mai. ’Ua here ’e ’ua tauturu tō’u ’utuāfare iā’u. ’Ua tāmau noa vau i te rave i te ’ohipa, ’e ’ua maita’i marū noa mai au i te fare ha’api’ira’a. ’Ua ’ite-ato’a-hia iā’u te mau mea e maita’i ai au i reira. ’Ua ha’a vau ’ia maita’i roa vau i roto i taua mau mea ra. ’Ua tauturu mai te Metua i te ao ra iāʼu.
’A pa’ari ai tātou, e fa’aruru tātou pā’āto’a i te mau tāmatara’a. Tē tahi pae o tātou tē vai ra te hō’ē ma’i ’aore rā, te huma. Vetahi e mea veve rātou ’e ’aita e nehenehe e fāri’i i te rapa’āura’a maita’i ’aore rā, te ha’api’ira’a maita’i. Tē hāmani-’ino-hia nei te tahi nō te ’ū ’o tō rātou ’iri ’aore rā nō te vāhi nō reira mai rātou.
Nāhea ’outou e nehenehe ai ʼia upo’oti’a i ni’a i tō ’outou mau tāmatara’a ?
-
’A ti’aturi i te Metua i te ao ra. E tae mai paha te mana’o paruparu i te tahi taime, e ti’a rā ia tātou ’ia ti’aturi iāna. ’Ua here ’oia i tāna mau tamari’i ’e ’ua fafau mai ’oia e ha’amaita’i ia tātou.
-
’A tāmau noa i te tāmata. ’Ua ha’api’i mai te Fatu ia tātou ē, e mau hōro’a ta’a ’ē tō tātou pā’āto’a. E nehenehe tātou e ’ite i tō tātou iho mau hōro’a. I muri iho e nehenehe tātou e fa’a’ohipa i te reira nō te ha’amaita’i i tō tātou orara’a ’e nō te tāvini ia vetahi ’ē.
Noa atu te pōiri i muri a’e i te topara’a mahana, e māramarama mai iho ā ’ia hiti ana’e mai te mahana. E parau mau te reira nō tō tātou orara’a. Mai te mea ’ua tāpe’ahia te hō’ē ’ē’a, e nehenehe tātou e ’imi i te tahi atu ’ē’a. Mai te mea e mea fifi roa ’ia rave i te hō’ē ’ohipa, e nehenehe tātou e haere i mua ’e e tupu i te rahi i roto i te reira.
Tē parau fafau atu nei au ē, e tauturu mai te Metua i te ao ra ia ’outou ’ia upo’oti’a i ni’a i tō ’outou mau tāmatara’a. ’Ua here ’oia ia ’outou ’e e tauturu ’oia ia ’outou ’ia riro mai i te mea tāna e hina’aro ’ia riro mai ’outou.
E nehenehe au e upo’oti’a i ni’a i te mau tāmatara’a
Fa’ahōho’ara’a nā Alyssa Petersen