Pāpa’ihia e ’outou

Haere e pārahi i pīha’i iho iāna

Sierra F., 12 matahiti, Utaha, Marite

I te hō’ē mahana i te fare ha’api’ira’a, ’ua fa’aro’o vau ē, tē ha’amata’uhia ra te hō’ē tamaiti. ’Ua ’oto vau. ’Eiaha e nā reira i te hō’ē noa a’e ta’ata.

I muri a’e i taua mahana ra, ’ua fa’atupu tā mātou piha ha’api’ira’a i te hō’ē fa’a’oa’oara’a. Te tamaiti tei ha’amata’uhia nā mua atu, ’ua haere ato’a mai ’oia i te fa’a’oa’oara’a ’e ’ua pārahi ’ōna ana’e. I tō’u ’itera’a atu iāna, ’ua ha’amana’o vau i te ’ohipa i tupu. ’Ua fa’aro’o vau i te hō’ē reo i te paraura’a mai iā’u ’ia pārahi i pīha’i iho iāna. ’Aita rā vau i hina’aro e haere ’o vau ana’e tē pārahi i pīha’i iho iāna. ’Aita e fifi nōna, ’ua feruri au. ’Aita ’oia e tītau i te hō’ē ta’ata ’ia pārahi i pīha’i iho iāna. ’Ua ha’amo’e au i terā mana’o.

’Ua tae fa’ahou mai te reo iā’u ra, ma te pūai a’e. ’A haere e pārahi i pīha’i iho iāna.

’Ua hi’o vau i te tamaiti. E hi’ora’a mo’emo’e tōna ’e te ’oto. OK ïa, ’ua feruri au. I tō’u pārahira’a i pīha’i iho iāna, ’ua huru ’ē ri’i ’oia. ’Ua fa’a’ite atu vau iāna i tō’u i’oa ’e ’ua ui atu vau nō ni’a iāna. I te ha’amatara’a, ’ua taiā ri’i au. I te paraparaura’a rā māua, ’ua ’ite au i te hau. ’E ’aita fa’ahou terā hi’ora’a mo’emo’e ’e te ’oto.

I te taime nō te ho’ira’a i roto i te piha ha’api’ira’a, ’ua parau atu vau e paraparau fa’ahou ā māua ’a muri a’e. ’Ua ’ata’ata ri’i ’oia ’e ’ua parau mai OK. ’Ua haere mai ra tō’u ’orometua ha’api’i iā’u ra ma te parau ē : « Māuruuru e Sierra. E mea maita’i roa te reira ». ’Ua tā’iri’iri noa vau i tō’u upo’o.

’Ua tere ’oi’oi noa te toe’a o te mahana, ’aita rā taua mana’o hau ra i ’ore. ’Ua ’ite au ē, ’ua rave au i te ’ohipa ti’a. I te tahi taime, ’aita te ta’ata e rave-maita’i-hia ra nō te mea e mea ta’a ē rātou. ’Aita vau e au i te reira, tē tupu nei rā te reira.

E mau tamariʼi ana’e tātou nā te Atua. E ti’a ia tātou ’ia fa’a’ite i te maita’i i ni’a ia vetahi ’ē. Mai te mea e nā reira tātou, ’ua ’ite au ē e ha’amaita’i mai te Atua ia tātou.

Fa’ahōho’ara’a nā Kristin Sorra