Te mau pupu ’e te mau tārēni
E ’ohipa āmui te mau pupu maita’i roa a’e ma te tauturu te tahi i te tahi ’ia ha’amaita’i ia rātou.
« Horo, Jillian, horo ! » Tuō a’era ’o pāpā. ’O tōna metua tāne te ta’ata fa’aineine nō te pupu tu’era’a pōpō o Jilian. Tē pūpū hope ra rātou ia rātou nō te fa’aineine nō te ha’utira’a harura’a ’aito. E mea ve’ave’a te mahana, ’ua tāmau noa rā Jillian i te horo.
I te hope’a, ’ua fa’ata’i ’o papa i te hio. « OK, e fa’afa’aea ri’i tātou ».
’Ua rave mai Jillian i tāna mōhina pape ’e ’ua pārahi i ni’a i te pārahira’a ’e te mau tamāroa. ’O ’oia ana’e te tamāhine i roto i te pupu, ’aita rā ’oia i ha’ape’ape’a. ’Ua ’ohipa ’āmui rātou pā’āto’a ’e ’ua tauturu te tahi i te tahi nō te ha’amaita’i ia rātou. Noa atu tōna rohirohi ’e tōna rari hou, ’ua ’oa’oa ’oia i te ha’utira’a ’e tāna pupu.
« Pāpā, e aha tō mātou huru i teie mahana ? », tāna ïa uira’a.
’Ua ’ata ’o pāpā. « Maita’i roa ! I tō’u mana’o, ’ua ineine te pupu nō te ha’utira’a ».
’Ua ʼata ato’a mai ’o Jillian. E ho’ona maita’i tā rātou ’ohipa itoito !
I tōna ho’ira’a i te fare nā te ha’api’ipi’ira’a, ’ua ’ite atu ’o Jillian i tōna hoa ’o Mei. ’O rāua i tā rāua piha Paraimere. ’Aita rā ’o Mei i haere mai i te Paraimere nō te hō’ē roara’a taime.
’Ua ’ata’ata ’o Jillian i ni’a ia Mei. « ’Ia ora na, e Mei ! ’Ua mihi au ia ’oe i te Paraimere. E aha te huru ? »
Pi’o a’era te upo’o o Mei, te mata i ni’a i tōna tia’a. « ’Aita tō’u māmā e hina’aro e haere i te purera’a ».
« Nō te aha ? »
« ’Aita vau i ’ite. » Ti’a mai ra te upo’o o Mei. « Nā reira ïa, e haere au ».
’Ua nānā atu ra ’o Jillian ia Mei. Nāhea vau e nehenehe ai e tauturu ia Mei ? ’ua uiui tōna mana’o.
I te taera’a ’o Jillian i te fare, ’ua ha’uti ’oia i te tahi mau hīmene Paraimere i ni’a i tāna ukulele. I muri iho ’ua ani ’oia i tōna mau taea’e ’ia hīmene mai. ’Ua hīmene noa rātou ē tae roa i te taime ’ua pi’i mai ’o māmā ia rātou nō te tāmā’ara’a i te pō.
« E haere au e fārerei i te tuahine Aurea ananahi », te parau ïa a māmā.
« Te tuahine Aurea te māmā ïa o Mei, e ’ere ānei ? » Te uira’a ïa a Jillian. « E nehenehe ānei tā’u e haere nā muri ia ’oe ? ’Aita ’o Mei i haere mai i te Paraimere. ’E i tō’u ’itera’a iāna i teie mahana, e au ē, ’ua ’oto ri’i ’oia ».
« Pāpū roa, e nehenehe ’oe e haere mai », te parau ïa a māmā.
« E ’āfa’i au i tā’u ukulele ! E nehenehe au e ha’uti i te mau hīmene Paraimere. ’Iā’u e mana’o, tē mihi ra ’oia i te hīmene i te reira », te parau ïa a Jillian.
I te taera’a rāua i te fare o Mei i te mahana i muri iho, ’ua tauahi roa ’o Jillian ia Mei. ’A paraparau noa ai tō rāua nau māmā’, ’ua haere nā tamāhine i rāpae. ’Ua ha’uti ’o Jillian i tāna ukulele, ’e ’ua mā’iti ’o Mei i te mau hīmene. ’Ua ’ata’ata rāua ’e ’ua hīmene ē tae roa i te taime nō Jillian ’ia haere.
« E mea ’oa’oa roa ’ia ’ite ia ’oe », te parau ïa a Jillian. « ’Ua mihi mātou ia ’oe i te Paraimere ».
« ’Ē, ’ua hina’aro iho ā vau e haere mai. Penei a’e e ani fa’ahou vau i tō’u māmā ».
I te sābati i muri iho, tei te fare purera’a ’o Mei. ’Ua pārahi ’o Jillian i pīha’i iho iāna. « ’Oa’oa roa vau ’ua tae mai ’oe », tāna ïa parau.
’Ua ’ata’ata ’o Mei. « ’O vau ato’a ».
Tau mahana i muri mai ’ua tae i te taime nō te ha’utira’a rahi o te tu’era’a popo. ’Ua ani ’o Jillian i te pupu ’ia pure hou te ha’utira’a. ’E ’ua tae i te taime nō te ha’utira’a. ’Ua horo ’o Jillian i te vitiviti hope’a e mara’a iāna. ’Ua ha’a ’oia i pīha’i iho i tāna pupu nō te fāri’i i te pōpō ’e nō te tītau i te rē. ’Ua upo’oti’a tāna pupu !
I taua pō ra ’a tārava noa ai ’oia i ni’a i te ro’i, ’ua feruri ’o Jillian ia Mei ’e i tāna pupu ha’uti pōpō. ’Ua ’oa’oa ’oia tei roto ’oia i te hō’ē pupu, mai tāna e ’oa’oa ra i roto i te Paraimere. ’Ua tauturu rātou pā’āto’a te tahi i te tahi. ’Ua ’oa’oa roa Jillian i te tauturura’a i tōna mau hoa, i te fare purera’a ānei ’aore rā i ni’a i te tahua.
Te mau fa’ahoho’ara’a nā Marcos Calo