Pionie i te mau fenua ato’a
Tē fārerei ra Harriet i te mau misiōnare
E nehenehe ānei tāna e pārahi fa’ahou i pīha’i iho ia pāpā ?
’Ua hi’o noa ’o Harriet i te hoho’a o pāpā i ni’a i te papa’i. I taua taime ra, e va’u ’āva’e tōna pohera’a. ’Ua uiui noa tōna mana’o ē, e ’ite fa’ahou ānei ’oia iāna. ’Ua mihi roa ’oia iāna.
Toc, toc, toc.
’Ua ’īriti ’o Harriet i te ’ūputa o tō rātou nohora’a na’ina’i. Tē ti’a ra e piti taure’are’a tamāroa i rāpae.
« Guten Tag ! ’Ia ora na ! E misiōnare māua nō Te ’Ēkālesia a Iesu Mesia i te Feiā Mo’a i te mau Mahana Hope’a nei. Tē hina’aro nei māua e paraparau i tō ’oe ’utuāfare nō ni’a ia Iesu Mesia ».
’Ua ’ata’ata ’o Harriet. ’Ua fa’atupu te tahi mea tā rāua i parau i te hō’ē mana’o maita’i i roto iāna. « E ani au ia Mutti (māmā) ».
’Ua ’ite Harriet ia Mutti. « E mau misiōnare terā i te ’ūputa », tāna ïa parau. « ’Ua hina’aro rāua e paraparau ia tātou nō ni’a ia Iesu ».
’Ua tu’atu’a te mata o Mutti. « ’A parau ia rāua ē, ’aita tō tātou e taime ».
« E mea maita’i roa ho’i rāua », te parau ïa a Harriet. « E’ita e maoro ».
’Ua hi’o ’o Mutti i te hora. « Nā reira. Te tahi noa tau minuti ».
’Ua tomo mai te mau misiōnare ’e ’ua paraparau ia Mutti, ia Harriet, ’e i te tuahine o Harriet, ’o Carmen. ’Ua parau rāua ia rātou nō ni’a ia Iesu ’e te hō’ē buka tei pi’ihia das Buch Moromona, te Buka a Moromona. I muri iho, ’ua hōro’a mai rāua i te ’utuāfare o Harriet i te hō’ē buka nō te tai’o.
« E nehenehe iho ā paha tā tātou e tai’o i te tahi mau ’api », te parau ïa a Mutti, ma te ’īriti i te buka. I te mau mahana i muri mai, ’ua tāmau noa ’o Mutti i te tai’o ’e i te tai’o. ’Ua tai’o pūai ’oia i te tahi mau tuha’a ia Harriet ’e ia Carmen.
’Āhani pa’i ’ua tai’o ’o pāpā i te reira. E au roa ’oia i te reira, ’ua feruri ’o Harriet.
I te ho’i-fa’ahou-ra’a mai te mau misiōnare, ’ua ha’api’i rāua nō ni’a i te fa’anahora’a a te Atua. « I ora na tātou i pīha’i iho i te Atua hou tātou ’a fānauhia mai ai. ’Ua haere mai tātou i te fenua nei nō te ha’api’i ’e nō te riro mai iāna te huru. ’Ia pohe ana’e tātou, e nehenehe tātou e pārahi fa’ahou i pīha’i iho iāna ».
’E aha te parau nō pāpā ? ’Ua uiui ’o Harriet.
’Ua hi’o mai ra te misionare i ni’a ia Harriet. « Nō te mea ’ua pohe Iesu ’e ’ua ora fa’ahou, e nehenehe tātou e pārahi i pīha’i iho i tō tātou ’utuāfare ē a muri noa atu. ’O te feiā herehia ato’a ho’i tei pohe ».
’Ume mai nei te mana’o ti’aturi i roto ia Harriet. E nehenehe ’oia e pārahi fa’ahou i pīha’i iho ia pāpā ! E mata ’ata’ata rahi ato’a tō Mutti—’a tahi ra e mea maoro i teienei.
’Ua tāmau noa ’o Harriet, ’o Mutti ’e ’o Carmen i te ha’api’i mai nā roto mai i te mau misiōnare. ’Ua haere rātou i te purera’a. ’Ua riro mai Harriet ’ei hoa nō te hō’ē tamaiti maita’i, ’o Dieter te i’oa.
I teienei, e au ē, tē vai ra te mahana i roto i te mau piha ato’a o te nohora’a o Harriet. ’Aita i maoro roa, ’ua fa’aoti ’o Harriet ’e tōna ’utuāfare ’ia bāpetizo ia rātou.
Te pō nā mua a’e i tō rātou bāpetizora’a, ’ua tūturi ’o Harriet i piha’i iho ia Mutti ’e ia Carmen nō te pure. ’Ua parau ’o Harriet i te nā-’ō-ra’a ē : « E te Metua i te ao ra, ’ua māuruuru roa mātou nō te mau misionare, nō te ’evanelia ’e nō tō mātou ’utuāfare. E hina’aro rū tō mātou ’ia bāpetizohia mātou. »
I tō Harriet ’ara’arara’a i tōna nā mata, ’ua hi’o ’oia i te hōho’a ’o Pāpā ’e ’ua ’ata’ata. E hina’aro rū tōna ia ’ite fa’ahou iāna i te hō’ē mahana.
E piti hiero i Heremani.
Hō’ē tuha’a i ni’a i te toru o Heremani e uru rā’au.
E iva fenua hō’ē ā ’ōti’a ’e te fenua Heremani.
I te pa’arira’a ’o Harriet, ’ua fa’aipoipo ’oia i terā tamaiti maita’i ra ’o Dieter te i’oa.
’O Dieter te hō’ē o te mau ’āpōsetolo i teienei—’o Elder Dieter F. Uchtdorf !
Tē parau ra ’o Elder Uchtdorf ē, ’o Harriet « te hihi mahana nō [tōna] orara’a ».
Fa’ahōho’ara’a nā Giovanni Abeille