Te tahi i muri iho i te tahi nō te purera’a
« ’Ia ho’i mai ’oe i te fare, ’a fa’a’ite mai i te mau hīmene tā ’oe i hīmene i te Paraimere », te parau ïa a Jenny.
« Nā reira ! », te parau ïa a tōna tuahine ’o Miriam ’a ’ō’omo noa ai i tōna tīa’a.
E’ita te tā’āto’ara’a o te ’utuāfare o Jenny e nehenehe e haere i te purera’a i te mau sābati ato’a. E ono ta’ata i roto i te ’utuāfare o Jenny. Terā rā, ’ua nava’i tā māmā moni nō te ho’o mai e piti noa tīteti pere’o’o uta ta’ata i te hepetoma tāta’itahi. Nō reira, ’ua tītauhia ia rātou ’ia haere, te tahi i muri i te tahi, nā ni’a i te pere’o’o uta ta’ata i te purera’a.
’Ua hina’aro ’o Jenny e haere i te mau hepetoma ato’a. E mea au nāna ’ia ha’api’i mai nō ni’a ia Iesu Mesia. E mea au nāna ’ia hīmene i roto i te Paraimere. ’Ua hina’aro ’oia e ’ite i tōna mau hoa. Hau atu, ’ua hina’aro oia ’ia ’ite i te mana’o māhanahana ’e te ’oa’oa tāna e fāri’i i te fare purera’a i te mau taime ato’a. I teie rā mahana, ’ua tītauhia iāna ’ia fa’aea i te fare.
« ’Ua hora nō te haere ». ’Ua apa ’o māmā ia Jenny ’e tōna taea’e ’e tōna nā tuahine.
’Ua tāmata ’o Jenny i te ’ata’ata ’a reva ai ’o Miriam ’e ’o māmā. Mai te huru rā te tahi ’ū’umi i te hi’oara’a ia rātou ’ia haere ’ē atu. ’Āhani pa’i ē, nō’u a’e teie taime haerera’a, te mana’o ïa o Jenny. E mea fifi i te mau taime ato’a ’ia fa’aea i te fare.
« Hina’aro i te pēni ? » ’Ua fa’atoro mai te teina o Jenny, ’o Marco, i te tahi mau pēnitara ’e te pāpie.
’Ua tā’iri’iri ’o Jenny i tōna upo’o.
I te mau hora i muri mai, ’ua tai’o ’o Jenny i te mau ’ā’amu ’e ’ua pēni ’e ’o Marco ’e tō rāua nau tuahine pa’ari. E mea ’ārearea, ’ua tāmau noa rā ’o Jenny i te feruri i te purera’a. Tē ha’api’i ra ānei rātou i te mau hīmene āpī i roto i te Paraimere i teienei ? E aha ra ïa te ha’api’ira’a i teie mahana ?
’Ua fa’aro’o a’era ’o Jenny i te ’ōpani mua i te matarara’a. ’Ua ho’i mai ’o māmā ’e ’o Miriam !
« Māmā ! Miriam ! » Horo atura ’o Jenny i te ’ūputa ’e tauahi atu ra ia rāua.
’Ua tu’u a’era māmā i tāna pūtē i raro. « E paraparau tātou nō ni’a i te mea tā māua i ha’api’i mai i te fare purera’a ».
’Ua pārahi ’āmui a’era rātou pā’āto’a. ’Ua tātara mai ra ’o māmā i te buka hīmene na’ina’i tāna i tāpe’a i roto i tāna pūtē. ’Ua hīmene a’era te ’utuāfare o Jenny i te hīmene « E ti’a i te ’utuāfare ’ia ora tāhō’ē ». ’Ua mau iāna terā hīmene tā’āto’a.
I muri iho, ’ua ani ’o Jenny ia Miriam nō ni’a i te Paraimere. ’Ua ’īriti a’era ’o Miriam i tāna Buka a Moromona ’e ’ua huti mai ra i te hō’ē ’api parau tūfetuhia. ’Ua ’āfa’i ’oia i te reira i ni’a ’ia nehenehe i te tā’āto’ara’a ’ia ’ite. E hōho’a ïa nō Iesu ’e te tahi mau tamari’i, tāna i fa’a’ū.
« ’Ua fa’a’ū mātou i te hō’ē hōho’a ma te hīmene ‘Jésus Christ est mon modèle’. I muri iho ’ua paraparau mātou e nāhea Iesu e nehenehe ai e tauturu i te mau ta’ata ato’a ».
« ’Ua paraparau ato’a mātou nō ni’a i te reira i roto i te Sōtaiete Tauturu », te parau ïa a māmā. « E nehenehe Iesu Mesia e tauturu ia tātou ’ia ri’ari’a ana’e tātou ’aore rā ’ia vai ’ōtahi noa ». ’Ua huti mai ’o māmā i te hō’ē ’api parau mai roto mai i tāna pūtē. « ’Ua hōro’a te ’orometua ha’api’i i te mau ta’ata ato’a i teie fa’ahitira’a parau a te peropheta. ‘’Ia ma’iti ana’e ’outou ’ia ora i te pae o te Fatu, e’ita roa atu ’outou e vai ’ōtahi noa’ ».*
« I te fare ato’a nei ! » Te parau ïa a Jenny.
’Ua ’ata’ata ’o māmā. « I te fare ato’a. E nehenehe tātou e ’ite i te Fa’aora i pīha’i iho ia tātou i te mau taime ato’a. »
’Ua ’ata’ata rahi ’o Jenny. E’ita ’oia e nehenehe e haere i te purera’a i te mau hepetoma ato’a. E nehenehe rā e tupu tōna mana’o piri ia Iesu, i te fare. ’E ’ua ’oa’oa roa ’oia ’ua fātata tōna taime nō te haere fa’ahou i te purera’a.
Fa’ahōho’ara’a nā Laura Catrinella