Te pupu ’āpī a Samuela
E fāri’i ānei te tahi atu mau tamāroa iāna ?
E mahana mā’a po’ipo’i roa. ’Ua pārahi Samuela i te ’amura’a mā’a o te fare tūtu ’a hi’o noa ai i tāna āu’a mā’a. ’Aita ’oia i hina’aro roa e tāma’a.
« Pāpā ? » ’ua parau marū atu ’oia. « ’Ua taui tō’u mana’o. ’Aita vau e hina’aro e fārerei i tā’u pupu tāora pōpō i roto i te ’ete i teie mahana. »
« ’Ua ’ite au ē, e mea fifi ’ia fa’aō i roto i te hō’ē pupu ’āpī, terā rā e fa’ahoa mai iho ā rātou ia ’oe », te parau ïa a pāpā.
« ’Aita, e ’ere te reira… Tē ha’ape’ape’a nei au nō te mea tā rātou e feruri ».
’Ua pārahi a’era ’o pāpā i pīha’i iho iāna. « Tē uiui ra ānei tō ’oe mana’o ē, e aha tā teie pupu e parau nō ni’a i te hō’ē ta’ata ha’uti ’āpī hō’ē noa rima tōna ? »
’Ua fānauhia ’o Samuela ’aita e rima ’aui. E hope tōna rima ’aui i te fatira’a rima.
« ’Ē », te parau ïa a Samuela. « Nō te mea ’aita rātou i ’ite iā’u, e mana’o paha rātou ē, e’ita te hō’ē tamari’i hō’ē noa rima tōna e nehenehe e ha’uti i te tāora popo i roto i te ’ete ».
« E nā reira paha rātou i te feruri, terā rā, e ta’ata ha’uti maita’i roa ’oe. ’E ’ia haere ’oe i te ha’api’ipi’ira’a, e maita’i atu ā ïa ’oe », te parau ïa a pāpā ma te mata ’ata’ata. « Haere mai. ’A rave mai i tō ’oe ’ahu ’e tā ’oe mōhina pape. Haere ana’e e fārerei i tā ’oe pupu ».
’Ua mapu a’era ’o Samuela i te aho. « OK ».
I te tomora’a atu rāua i roto i te fare ha’utira’a, ’ua haere mai ra te ta’ata fa’aineine.
« Hei, ’ia ora na ! ’O vau ’o Monroe, te ta’ata fa’aineine. ’O ’oe paha tō mātou ta’ata ha’uti ’āpī ».
« ’Ē, ’o Samuela vau ».
« Tē ’oa’oa nei mātou i te fāri’i ia ’oe i roto i tā mātou pupu », te parau ïa a te ta’ata fa’aineine Monroe. « E haere ana’e e fārerei i te tahi atu mau tamāroa ».
’Ua pārahi ’o pāpā i ni’a i te hō’ē pārahira’a. ’Ua rave ’o Samuela i tāna pōpō ’e ’ua pe’e i te ta’ata fa’aineine.
« Tē hina’aro nei au e fa’a’ite atu ia ’outou ia Samuela, tā tātou ta’ata ha’uti ’āpī roa a’e », te parau ïa a te ta’ata fa’aineine Monroe. ’Ua aroha mai ra te tahi mau tamāroa ia Samuela nā te ātea. « ’Ua fāna’o tātou ’ia fāri’i iāna nā mua noa i tā tātou ha’utira’a mātāmua. I tō’u mana’o, e pupu maita’i roa tā tātou, ’e e tupu maita’i tā tātou ha’utira’a, ’e teie matahiti ato’a ! »
’Ua fa’ata’i a’era te ta’ata fa’aineine Monroe i tāna hio, ’e ’ua ha’amata te pupu i te rave i te tahi mau ’ohipa fa’aineinera’a. ’Ua ’ite ’o Samuela i te tahi o tōna mau hoa nō te pupu i te hi’ora’a iāna ’a tūpa’ipa’i ai ’oia ’e ’a tāora ai i te pōpō i tōna noa rima ’atau. ’Ua tāmata ’oia ’eiaha e vaiiho i te reira ’ia fa’anevaneva iāna.
I te hō’ē taime fa’afa’aeara’a nō te inu i te pape, ’ua pārahi te hō’ē tamāroa i pīha’i iho ia Samuela i ni’a i te pārahira’a. « ’Ia ora na, ’o Jackson vau. E aha tei tupu i ni’a i tō ’oe rima ? »
« ’Aita hō’ē mea. Mai te reira noa i tō’u fānaura’ahia », te parau ïa a Samuela.
« ’Aitā vau i ’ite a’enei i te hō’ē ta’ata hō’ē noa rima i te ha’utira’a i te pōpō », te parau ïa a Jackson. « E mea maita’i roa ’oe ».
’Ua ’ata’ata ’o Samuela. « Māuruuru ».
’Ua fa’ata’i a’era te ta’ata fa’aineine Monroe i tāna hio. « Nō te 30 minuti e toe ra, e ha’uti tātou ». ’Ua fa’ata’a ’oia i te mau tamāroa i roto e piti pupu. ’Ua ’oa’oa ’o Samuela tei roto ’o Jackson i tāna pupu.
Hō’ē minuti hou te hope’a o te ha’utira’a, hō’ē ā fāito rē tā nā pupu e piti. ’Ua fāri’i te hō’ē o te mau hoa pupu o Samuela i te pōpō ’e ’ua ’imi ’oia i te hō’ē ta’ata nō te hōro’a i te pōpō. E mea fātata mai ’o Samuela, ’ua ineine nō te haru i te pōpō. Terā rā, ’ua tāora te reira tamaiti i te pōpō ia Jackson ra.
’Ua nu’u ri’i ’o Jackson i mua. ’Ite a’era ia Samuela ’e ’ua taora atu ra i te pōpō iāna ra. ’Ua haru ’o Samuela i te pōpō, ’ua fāriu, ’e ’ua tāora i ni’a i te ’ete.
Roto roa ! ’Ua ō te pōpō i te taime mau ’a fa’ata’i ai te ta’ata fa’aineine Monroe i te hio. ’Ua oa’oa roa te pupu a Samuela.
« Tano maita’i ’oe i te tāorara’a mai i te pōpō », te parau ïa a Samuela ia Jackson ’a haere ai rāua i ni’a i te mau pārahira’a.
« Roto roa tā ’oe tītōra’a », te parau ïa a Jackson. « E ’ite mai te ta’ata ē, e nava’i noa hō’ē rima nō te ha’uti i te tāorara’a pōpō i roto i te ’ete ».
’Ua ’ata ’o Samuela ’e ’ua tūpa’i i te rima o Jackson. ’Ua tupu te mana’o i roto iāna ē, ’ua tano te ta’ata fa’aineine Monroe. E pupu maita’i roa tā mātou, ’e e tupu maita’i tā mātou ha’utira’a, ’e teie matahiti ato’a.
Fa’ahōho’ara’a nā Sandra Eide