O Grace Ofoofogia
Sa fiafia o ia i lona tino, e tusa lava po o a tala a isi tagata.
“Tina! Vaai la.” Sa faaminoi solo e Grace ona vae, ma faapa’ona seevae siva i luga o le fola o le umukuka.
“Oka!” Na fai atu ai Tina. “Ua e lelei ifo lava.”
Sa faataavili Grace. Sa fiafia o ia e siva.
O lona tuagane matua o Nate na sau i lalo o le faasitepu. Ua oo i le taimi mo ia e tietie ai i lana uila i le aoga.
“Fa, Tina! Tofa, Grace,“ na ia fai atu ai, ma tamoe atu i fafo o le faitotoa.
“E mafai ona ou tamoe i le faaiuga o le auala faatasi ma ia ona toe tamoe mai lea?” Sa fesili atu Grace ia Tina.
Sa tilotilo atu Tina i le uati. “Ua lelei,” sa ia fai atu ai. “O loo lava pea le taimi ae e te le’i alu mo le aoga.”
Sa kiki ese e Grace ona seevae pa’o ma vave ona faamaulu ana seevae koleni. Sa ia oso i fafo le faitotoa. Sa a‘e Nate i luga o lana uila. Sa tamoe atu Grace i ona autafa seia oo ina taunuu i le faaiuga o le auala. Sa talotalo atu o ia a o ia liliuina le tulimanu. Ona ia faliu lea ma toe sikipi atu i le fale.
“Ua ou toe foi mai!” Sa valaau atu Grace ia Tina. Sa ia palasi ifo i luga o le nofoa.
“O le matuai vave lava!” Na fai atu ai Tina. Na nofo ifo o ia i talaane o Grace. “Vaai i nei mea ofoofogia uma e mafai ona e faia. Siva. Tamoe. O lou tino o se meaalofa maoa’e.”
Sa mafaufau Grace i lena mea. Na te le’i manatu o lona tino e matagofie faapena. Aemaise lava pe a ia faatusatusaina o ia lava i isi tamaiti i le aoga. O nisi taimi sa faitio foi o ia e uiga i lona tino.
Ae sa fiafia o ia e tamoe. Ma sa ia lagonaina le fiafia tele ina ua ia siva. Ma sa na o le faafetai uma i lona tino. Sa ia faasuigi ona vae ma ataata. Atonu sa matagofie lava lona tino.
I ni nai aso mulimuli ane, sa piki ai e Tina ia Grace mai le aoga. “Na faapefea mai lou aso?” O le fesili lea a Tina.
“Lelei.” Sa oso Grace i totonu o le taavale ma fusi lona fusipau. “Ia, o le tele lava o le lelei. I le taumafataga o le aoauli sa fai mai ai se tala a se tamaitiiti e uiga i lo‘u tino.”
Sa tilotilo atu mama ia te ia i le faata e iloa atu ai tua. “Oi, la’u pele. Ou te matuā faamalie atu.”
Sa faamimigi Grace . “Sa ou ta’u atu ia te ia o le mea sa ia fai mai ai e le agalelei. Ona ou aluese lea ma talanoa atu i isi tamaiti.”
“Ua ou mitamita lava ia oe,” na fai atu ai Tina. “Na faapefea ona e tumau i le toafimalie?”
Sa fitifiti vae o Grace. “Ia, ou te manatua le mea na e ta‘u mai ia te a’u. E uiga i lo’u tino o se meaalofa mai le Tama Faalelagi. Ou te iloa afai ou te tausia lelei lo‘u tino, o le a Ia faamanuiaina a’u ia mafai ona ou faia le mea e tatau ona ou faia.
Sa paka Tina i luma o lo latou fale. “E matua’i sa’o lelei oe! Ua okay la oe?”
“O lea ou te manuia. O le a ou alu mo se tietiega uila ae ou te le’i faia a’u meaaoga, Ua lelei?” Sa oso mai i fafo Grace mai le taavale. E lei umi ae i ai o ia i lana uila, ma vili masau atu i lalo o le auala savali.
Sa alofa o ia i lona tino, e tusa lava po o le a le tala a se isi tagata. O lona tino o se meaalofa.
Sa ee fiafia Grace ma vili saoasaoa atu.