O Le Fesili o le Vitio
Sa manaomia e Josué ni tali, ae o ai e mafai ona ia fesili i ai?
Sa savali atu Josué i totonu o le fale initoneti. Na laina komepiuta i puipui, ma o leo o sapa ma pigi mai taaloga vitio na faatumulia ai le potu. E leai sana komepiuta i le fale, o iina la e sau i ai e faaaoga se komepiuta. Sa le mafai ona faatali o ia e matamata i ni vitio mananaia!
Sa mulimuli mai lana uo o Carlos i ona tua. Sa tuuina atu e Josué i le pule se tupe. Ona la maua lea ma Carlos se komepiuta e faaaoga.
Sa muamua lava vaai e Josué se vitio malie sa ta‘u atu e se uo i le aoga ia te ia. Ona piki lea e Carlos se vitio e matamata ai. Sa la feauauai pea.
“Vaai, o le ata lenei e faatatau i le Ekalesia,” o le tala lea a Josué. Sa ia kiliki i luga o le vitio ma amata ona matamata.
Sa fai mai e le tamaloa i le vitio ni mea fenumiai e uiga i le Ekalesia. Sa ia fai mai e le moni le Ekalesia. O le vitio na lagona ai e Josué le pei ua oomi e se tasi totonu o ia.
“E te manatu o le mea na fai mai ai lena tagata e moni?” Sa fesili atu ai Josué ina ua uma le vitio.
“Na lulu le ulu o Carlos. “E te manatu e moni le mea na ia fai mai ai?”
Sa faanonou Josué. Sa ia tatalo ia iloa e moni le Ekalesia ma sa ia maua se lagona lelei e uiga i ai. Sa ia lagonaina i taimi uma le toafilemu pe a alu i le lotu pe faitau ana tusitusiga paia. Ae na te le iloa po o le a le mea e mafaufau i ai e uiga i mea sa ia faalogo i ai i le vitio.
I lena po, sa feliuai solo Josué i lona moega. Sa le mafai ona moe o ia! E tele naua fesili sa feosoi mai i lona mafaufau. Ae o ai e mafai ona ia fesili i ai? O Papa e le o se tagata o le Ekalesia, ma sa pisi tele Mama e faigaluega. Sa leai se tasi e talanoa i ai.
O le aso na sosoo ai i le aoga, sa ataata tele ai Carlos i ona foliga. “Sa ou fesili i lo‘u tama po o le a le mea sa talanoa i ai le alii i le vitio. Sa ia taliina uma a‘u fesili.”
Sa tu faasasa’o i luga Josue. “E mo’i? E te manatu e mafai foi ona ou talanoa i lou tama?”
“Ioe! Sau i lo‘u fale pe a tuua le aoga, ma e mafai ona ta talanoa i lo’u tama.”
O le vaega na totoe o le aso aoga na faasolosolo lemu lava. Sa minoi solo Josué i lona nofoa. Sa faigata ia te ia ona taulai atu. O fesili uma o loo feosofi i lona mafaufau e mafai ona i ai ni tali!
Ina ua tuua le aoga, sa saofafai i lalo Uso Zavala, le tama o Carlos, ma Josué ma Carlos. Sa latou talanoa mo se taimi umi e uiga i le vitio. Sa i ai ia Uso Zavala se tali i fesili uma a Josué!
“Sa ou popole nei e le iloa tali i a’u fesili,” o le tala lea a Josué.
“E tusa lava pe ou te le mauaina, e i ai lava tali a Tama Faalelagi,” o le tala lea a Uso Zavala.
“Ae soo se taimi lava ou te tatalo ai ia iloa se mea, ou te maua lava se lagona. Ou te le maua moni lava se tali,“ o le tala lea a Josué.
“O nisi taimi o se lagona o la tatou tali lea,” o le tala lea a Uso Zavala. “E mafai ona tatou suesue pea i tusitusiga paia ma tatalo mo le malamalama. Atonu e le oo mai tali i le taimi lava lena, ae e le afaina lena mea. E silafia e Tama Faalelagi mea uma tatou te le iloa. Ma e mafai e le Agaga Paia ona fesoasoani ia i tatou ia lagona le filemu.”
Mo le vaega o totoe o le aso na mafaufau ai Josué e uiga i le mea na fai mai ai Uso Zavala. I lena po, sa tootuli ifo o ia i lalo e tatalo. “Tama Faalelagi,” na ia fai atu ai, “o le mea moni lea na fai mai ai Uso Zavala? “Ou te le fia lagona se le mautonu.”
Sa lagona e Josué le to’a ma le fiafia. Sa faafetai o ia ona sa mafai ona ia faia pea ni fesili. Ma sa fiafia o ia na tuuina mai e Tama Faalelagi ia te ia le tali sa ia manaomia.