O se Valivaliga e Faateaese ai se Aso le Manaia
O le faasoa atu o ni ata i tuaoi sa matuai malie lava!
Sa oi Clara. “E leai se mea e faia!”
Sa tele mea sa ia manao e fai. Ae sa le mafai ona ia faia. Sa manao o ia e alu e aau. Ae sa tapuni le vaitaele. Sa manao o ia e taalo i ana meataalo. Ae sa teuina ese. Sa manao o ia e taaalo ma ana uo. Ae faatoa siitia ese atu lona aiga. O lea ua latou nonofo i se fale mautotogi lea latou te le iloa o latou tuaoi.
“Aisea e le valivali ai sau ata?” O le fesili lea a Tina.
“E le manaia,” na fai atu ai Clara.
Ae sa oso i luga lona tuagane laitiiti, o Ben. “Ua Lelei!” o lana tala lea. Sa tamoe atu o ia i le laulau ma maua ai ni valigao. Sa ia tusia se laau ma se la samasama.
“Ou te fia tuuina atu lenei ata i lo tatou tuaoi,” o lana tala lea.
Sa faauu Clara. “Ae tatou te le iloa o tatou tuaoi.”
“Ta o la e feiloai ia i latou!” Na fai atu ai Tina.
Sa savavali atu Ben ma Tina i fafo o le faitotoa i luma. Sa la tuitui i le faitotoa i le isi itu o le faletele. Sa tilotilo atu Clara mai le faitotoa.
Sa tali mai se fafine. Sa tuu atu e Ben ia te ia le ata. Sa ataata le fafine. “Faafetai lava,” o lana tala lea.
Sa tilotilo atu Clara ia Ben o toe savali mai i le laulau ma se ataata lapoa. Atonu e le leaga tele le valivali, sa ia mafaufau ai.
Sa nofo Clara i talaane o Ben. Sa la valivaliina uma se ata. Sa tusia e Clara se vaa roketi ma le tele o fetu.
Sa la tuuina atu a la ata i isi tuaoi e toalua. Ona la toe valivaliina lea o nisi. Sa la tuuina atu ni ata mo le vaega o totoe o le aoauli. Sa foliga faanoanoa nisi o tagata ao latou taliina le faitotoa. Ae ina ua latou vaai i le ata, sa latou ataata. Sa feiloai foi Clara ma Ben i ni nai tamaiti sa nonofo i le fale mautotogi.
Ina ua uma, sa uu e Clara le lima o Tina. “Sa matua malie lava.”
Na ataata Tina. “Pe a tatou faia se mea manaia mo se tasi, e faafiafiaina ai i latou. E faafiafiaina ai foi i tatou. Ma o le mea sili lava, e faafiafiaina ai le Tama Faalelagi.”
“Atonu o taeao e mafai ona ma fai atu i isi tamaiti e valivali faatasi ma i ma’ua,” o le tala lea a Clara.
“E foliga mai o se manatu lelei.”
Sa ataata Clara. O le valivaliina ma le fefaasoaai o ata sa malie. O lona aso le manaia na liua i se aso fiafia!