O Le Lisi a Tuagane Matua
O le tuafafine laitiiti o Anetelea, o Samantha, sa faaauau pea ona taalo i meatotino a Anetelea.
“Aisea e le mafai ai ona ia tuua au mea?” na ia fesili atu ai ia Tina.
“O loo laitiiti lava Samantha. O loo ia aoao pea,“ o le tala lea a Tina. “Ae e alofa o ia ia te oe.”
Na ia iloaina. Ae e lei maua ai e ia se lagona lelei. Sa lelava o ia i le faasoa atu.
Sa ave i fafo e Anetelea ana vali. Sa ia tusia se ata o le pusi a lona tinamatua. Ona alu atu lea o ia e sue Tina.
“E mafai ona ou auina atu la‘u ata ia Tinamatua?” na ia fesili ai.
“O se manatu manaia tele lena!” na fai atu ai Tina.
Ina ua toe foi mai Anetelea, sa valivali foi e Samantha le ata.
“Ua e faaleagaina!” sa ia ee atu ai.
Na amata ona tagi Samantha. Sa lagona e Anetelea le faanoanoa. Na te lei mafaufauina e faatagi o ia.
“Ou te faamalie atu,” o lana tala lea ia Tina. “Ae ua ou lelava i le avea ai ma se tuagane matua.” Sa ia lagona le fia tagi foi.
Sa opo atu e Tina ia Anetelea. “Ou te faamalie atu sa ia tusitusi i lau ata. O le avea ma se tuagane matua e mafai ona faigata. O le a ou talanoa ia Samantha e aua nei tago i au mea e aunoa ma le fesili. Ma atonu e mafai foi ona ta tusia i lalo nisi o mea e te fiafia e fai faatasi ma ia. Ma a e le fiafia ia te ia, e mafai ona e faia se tasi o mea o loo i luga o le lisi.
Sa mafaufau i ai Anetelea. Ona lue atu lea o lona ulu.
Sa galulue faatasi Anetelea ma Tina i le lisi.
Ou te fiafia e taaalo ma Samantha.
Ou te fiafia e faaaoga e ia au meataalo i nisi taimi.
Ou te fiafia pe a opoina au e Samantha.
Ou te fiafia e faitau tusi ia te ia.
Sa faauma e Anetelea lana lisi. Ona ia tuuina atu lea o se opo ia Samantha. Sa tele ni mea lelei e uiga i le avea ma se tuagane matua!