O Paionia i Atunuu Uma
O Le Lauga Muamua a Moira
Sa ia iloa e mafai ona ia faia i le fesoasoani a le Tama Faalelagi.
Sa hamu lemu Moira a o la savavali atu ma Mama i fafo o le falesa. Faatoa uma lava le lotu.
“Talofa, Moira,” o le saunoaga lea a Peresitene Scott. O Richard G. Scott o le peresitene o le misiona i Atenitina, lea sa nofo ai Moira. “Pe o le a e naunau e tuuina atu se lauga i le konafesi a le itu i le masina a sau?”
Sa folofaua Moira. Sa na o le 12 ona tausaga, ma na te le’i tuuina atu muamua lava se lauga! “E mafai ona ou taumafai,” na ia fai atu ai.
Sa ataata Peresitene Scott. “Faafetai! O le a maoae lau taumafaiga.”
A o agai atu i le fale mai le lotu, sa vave le tata o le fatu o Moira. “Ou te le iloa pe mafai ona ou faia.” na ia fai atu ai.
“O le a fesoasoani Tama Faalelagi ia te oe,” na fai atu ai Mama. “Sa Ia fesoasoani ia te oe e fai mea faigata muamua, a ea?”
Sa lue atu le ulu o Moira. Sa fesoasoani mai Tama Faalelagi muamua ia te ia. E pei o le taimi na la auai ai ma Mama i le Ekalesia i se tausaga ua mavae.
Sa fiafia Moira e ta’u atu i lana uo mamae, o Dorita, e uiga i lona papatisoga. Ae ina ua iloa e matua o Dorita, sa la le toe faatagaina Dorita e taaalo ma Moira. Sa lagona e Moira le tuuatoatasi.
Ae sa fesoasoani Tama Faalelagi ia te ia e maua ni uo fou. I lona aso Sa muamua lava i le lotu, sa ia vaaia ai se teineitiiti o tu i tafatafa o le faitotoa.
“Talofa,” o le tala lea a le teineitiiti. “O a’u o Carmen. “Pe e te fia nofo faatasi ma a’u?” E le’i umi ae avea Carmen ma Moira ma ni uo lelei.
E tatau ona lototele Moira e lauga i le konafesi a le itu. Ae sa ia iloaina e mafai ona ia faia i le fesoasoani a Tama Faalelagi. Mo nai vaiaso na sosoo ai, sa galue malosi Moira i lana lauga. Sa ia tusia i lalo mea o le a ia fai atu. Ona ia faataitai lea ona fai leotele atu.
Na iu lava ina oo mai le aso mo lana lauga. Sa saofai Moira i luma ma tilotilo atu i tagata uma i le falesa. Sa matuai toatele naua!
Ona iloa atu lea e Moira se tasi o talotalo atu ia te ia. O Carmen! Sa toe talotalo atu Moira. O le vaaia o lana uo i le motu o tagata na ia maua ai se lagona sili atu.
Ina ua oo i lona taimi, sa laa atu Moira i luga i le faaleotele leo. Sa manava loloa o ia. Ona ia faia ai lea o lana lauga. Sa tete lona leo muamua. Ae sa mafai ona ia lagonaina le Fesoasoani o le Agaga Paia ia te ia. I le faaiuga, sa ia faasoa atu lana molimau. “Ou te iloa o loo soifua Iesu ma e alofa ia te i tatou. I le suafa o Iesu Keriso, amene.”
Ina ua maea le sauniga, sa o uma tagata i fafo mo se taumafataga o le aoauli. Sa maua atu e Carmen ia Moira ma fusi atu ia te ia. “Sa manaia lau lauga!!” o lana tala lea.
“Faafetai! Sa ou fefe, ae na fesoasoani moni lava Tama Faalelagi ia te a’u.” Sa ataata Moira. Sa ia faia se mea na te lei faia muamua lava, ma o lena mea na avea ai o ia ma paionia.
O Atenitina o le atunuu lona lua e aupito tele i Amerika i Saute.
E le o toe mamao ona lima lea o malumalu i Atenitina.
O Argentna e silia ma le 30 paka a le atunuu.
O Elder D. Todd Christofferson o se tasi o faifeautalai na aoaoina Moira ma lona aiga.
Ina ua 12 tausaga o Moira, sa avea o ia ma failautusi o le Peraimeri i lana paranesi.
I le asō, ua faigaluega Moira mo le Ekalesia i Iuta, ISA.
Ata na tusia e Christopher Thornock