O Le Tuuga Fafie
Na saunoa mai le perofeta e le tatau ona tuu lo tatou sauniuni.
Sa patapatatu vae o Luke i le eleele. Sa tilotilo atu o ia mai lona tau’au. O lona uso, o Robert, toeititi lava maua atu o ia!
“Pe! O oe ua pe!” Na fai atu ai Robert.
Sa ataata Luke. Sa ia tuliloaina lona tuafafine matua, o Mili.
Ina ua uma le taaloga, sa saofafai uma i lalo tagata e malolo.
“O le a seisi taaloga tatou te taaalo ai nei?” O le fesili lea a Mili.
Sa fiafia Luke i le i ai o ona tei e taaalo ai. Ae o le KOVITI-19 ua suia ai le tele o mea. Sa le mafai ona latou o i nofoaga e toatele ai tagata. Ma o nisi taimi sa le faatagaina foi i latou e o i fafo.
Sa taumafai Luke e mafaufau i se taaloga e mafai ona latou taaalo ai. Ona ia mafaufau lea i se mea sa ia faalogo i ai i le Peraimeri.
“Ou te manatu e tatau ona tatou faia se mea e saunia ai,” o le tala lea a Luke.
“O le a le uiga o lau tala?” O le fesili lea a Mili.
Sa tilotilo atu Luke i laau kuava o loo faataamilo i lo latou fale. “Na fai mai le perofeta e le tatau lava ona tuu lo tatou saunia. Atonu e mafai ona tatou aoina fafie i le asō. E mafai ona tatou faia o se taaloga e iloa ai po o ai e sili ana fafie e maua!”
Sa taufetuli atu Luke ma ona tei i laau e lata ane i lo latou fale. Sa faaputu e Luke fasilaau i ona lima ma toe tamoe e faaputu ana fafie i totonu o le fale. Ina ua taunuu mai ona tei iina, sa ia fesoasoani ia i laua e faaputu foi a la fafie. Sa latou taufetuli i tua ma luma seia oo ina latou aoina mai se faaputuga tele.
“Ua lava lea e kuka ai mo se vaiaso atoa!” Sa fai atu ai Mili.
“Sa malie lena mea,” o le tala lea a Robert. “Ou te fiafia e saunia!”
“E faapena foi a’u,” o le tala lea a Luke. Sa manao o ia e fai se isi mea ina ia saunia ai.
Na sosoo ai ma le totoina e ia ma lona uso ma lona tuafafine o le bele (o se fualaau faisua lanumeamata) i le latou togalaau. Sa tipi e Luke ia lala mai laau tuai ina ia mafai ona latou totoina ma ola tele ai.
A o latou galulue, sa o mai o latou matua matutua ma matua i fafo.
“Na outou totoina e outou lava ia na pele?” Na fesili atu ai Tamamatua.
“Ioe,” o le tala lea a Luke. “Ma ua matou maua mai foi fafie!”
“Faafetai lava,” o le tala lea a Tama. “Sa ou matua pisi lava i le asō. Semanu e le mafai ona ou faia.”
I lena aoauli, sa saofafai ai Luke i totonu ma lona aiga. Sa latou faalogo i se faasilasilaga i luga o le leitio e tatau i tagata uma ona nonofo i totonu mo aso e fa e taofi ai le pepepsi o le KOVITI-19. Sa faasa ona tuua e se tasi lo latou fale.
“E lelei sa matou aoina mai fafie i le asō. O le a le mafai ona tatou faia i le taimi nei,“ o le tala lea a Mili.
Sa ataata Luke. Sa fiafia o ia ona sa latou mulimuli i le valaaulia a le perofeta ina ia saunia.