Gaoioiga o le Sau, Mulimuli Mai ia te A’u
Mo afiafi faaleaiga, suesueina o tusitusiga paia, pe tau lava o se mea malie!
Tepora ma le Laau o le Pama
Mo le Faamasino 2–4; 6–8; 13–16
Tala: O Tepora o se taitai amiotonu. Sa nofo o ia i lalo o se laau pama ma faalogologo i lona nuu (tagai Faamasino 4:4–5). Sa ia fesoasoani ia i latou ia salamo ma mulimuli i le Atua.
Pese: “Filifili le Ala Sa’o” (Tusipese a Tamaiti, 82)
Gaoioiga: Fai mai le Salamo 92:12, “E uluola e amiotonu e pei o le laau o le pama.” Fai le laau o le pama i le itulau 36. Talanoa e uiga i auala e mafai ona e mulimuli ai i le Atua.
Auaunaga o Saito
Mo le Ruta; 1 Samuelu 1–3
Tala: Faitau e uiga ia Ruta i le tala faatusi paia i le itulau 8. Sa ia galue malosi ma ao mai saito e tausi ai le tina o lana tane. Sa faamanuiaina o ia e le Atua mo le auauna atu i isi.
Pese: “Pe a Tatou Fesoasoani,” (Tusipese a Tamaiti, 108)
Gaoioiga: ‘Oti ese fasipepa i foliga o fatu saga. Faaaoga se fasilaau po o se fasipepa umi e fai ma lala. Kelu pe faapipii au fatu saga i le lala e fai ai se laau saito. Soo se taimi lava e te auauna atu ai i se tasi, toso ese se fatu saga. Faaauau pea seia leai se fatu e totoe i le lala!
Togi a Koliata
Mo le 1 Samuelu 8–10; 13; 15–18
Tala: A o laitiiti Tavita, sa feagai o ia ma se fitafita maoae e igoa ia Koliata e puipuia lona nuu. Na iloa e Tavita o le a fesoasoani le Alii ia te ia e faatoilalo Koliata. E mafai ona e faitauina le tala i le 1 Samuelu 17.
Pese: “O Le a Ou Lototoa” (Tusipese a Tamaiti, 85)
Gaoioiga: Fai se sikuea i luga o le foloa i se sioka po o se lipine. Tusi le igoa “Koliata” i totonu. Tu i tua ma togi ia maamaa i totonu o le sikuea. O taimi uma lava e oo ai sau maamaa i totonu o le sikuea, ta‘u mai se auala e fesoasoani ai le Tama Faalelagi ia te oe e faatoilalo luitau tetele.
O Le Tala i le Tamai Mamoe
Mo le 2 Samuelu 5–7; 11–12; 1 Tupu 3; 8; 11
Tala: Sa faamatala e le perofeta o Natano se tala e uiga i ni alii se toalua. E tele tamai mamoe a le tagata muamua. O le tagata lona lua sa na o le tasi le tamai mamoe. Sa gaoia e le tamaloa e tele ana tamai mamoe le tamai mamoe a le isi tamaloa. O lena mea na faanoanoa tele ai le tamaloa e na o le tasi le tamai mamoe. Na faanoanoa ai foi Tama Faalelagi. (Tagai 2 Samuelu 12:1–4.)
Pese: “O Loo Ou Taumafai e Avea e Pei o Iesu” (Tusipese a Tamaiti, 40–41)
Gaoioiga: Faatino le tala i alii e toalua ma tamai mamoe. E mafai ona e faaaogaina meataalo po o isi mea faitino mo tamai mamoe. Ona toe faatino lea, ae o le taimi lenei ia sui le faaiuga! O le a se mea e mafai e le tagata muamua ona fai ia agalelei ai nai lo le manatu faapito?