“Ou te le Fia Matua!”
Sa foliga mai sa matua taufaafefe le lumanai.
“Manuia lou aso fanau!” sa pepese ai tagata uma.
Sa tape uma e Chakell moligao o lana keke i se feula e tasi. Sa ataata o ia a o alalaga fiafia lona aiga.
Sa 10 ona tausaga i le asō, ma o lenei aso fanau o le a avea ma se aso silisili ona lelei!
“Ua vave tele lou tuputupu ae,” o le tala lea a Tina.
“O lea la ua e i ai i fuainumera e lua!” o le tala lea a Tama i lona leo paū.
“O le a vave ona e matua e pei o au,” o le tala lea a Chantele, lona uso matua.
Sa faaitiitia le ataata a Chakell. “Ia, ou te le o matua tele lava!” o lana tala lea. “E na o le 10 o’u tausaga.”
“Ae o le tausaga a sau o le a e i ai i Tamaitai Talavou, ona e agai atu lea i le aoga tulagalua,” o le tala lea a Chantele. “Ona e aoao lea i le auala e ave ai le taavale, ma e le o toe mamao ae e matuai matua lava!”
Sa faafuasei ona lagona e Chakell o lona manava ua ese lava. Sa tiga tele lona manava talu ai nei, aemaise lava pe a popole o ia e uiga i le lumanai.
Sa ia le amanaiaina lona manava ma ataata. “Sei ai se tatou keke!”
Mulimuli ane i lena po, sa nofo Chakell i luga o lona moega ma susue se tasi o ana tusi e sili ona fiafia i ai. Ae sa lei taulai atu o ia i le mea sa ia faitauina. Sa ia lagona pea o lona manava e pei ua felavasai.
O aso fanau e masani lava ona mafaufau ai Chakell e uiga i le tuputupu ae. O le tele o lona matua, o le tele foi lea o le taufaafefe na foliga mai ai le lumanai. O le le iloaina o le mea o le a tupu na mafua ai ona popole o ia!
O mafaufauga popole na oo mai pea i le mafaufau o Chakell.
O le a le toe avea lava au ma se tamaitiiti!
Ae faapefea pe afai e le lava lo’u atamai mo le aoga tulagalua?
Ae faapefea pe afai e leai ni au uo?
O le a suia lo’u olaga atoa.
Sa tafe ifo loimata vevela i ona alafau. Sa ia solo i ona mata ma manava faatopetope.
Ona ia faalogoina lea o se tu’itu’i malie i le faitotoa. “O e tagi?” O le fesili lea a Tina. Sa ia saofai ane i le moega o Chakell. “E te lei maua se aso fanau fiafia?”
Sa soso atu Chakell, ma sa fusi atu o ia e Tina.
“Sa matagofie lo‘u aso fanau,” sa ia fai atu ai, ma faalagolago atu i le tauau o Tina. “Ae ou te le fia matua! Ua ou fefe lava.”
Sa seluselu e Tina lona lauulu i lona lima. “O le tuputupu ae e mafai ona taufaafefe. Ae e mafai foi ona malie!”
Sa solo ese e Chakell loimata mai ona mata. “E le foliga malie tele,” o lana tala lea. “E na ona foliga mai e faigata.”
Sa lue atu le ulu o Tina. “E mafai ona faigata i nisi taimi,” o lana tala lea. “Ae e mafai ona e lototele! Na e iloa o lou olaga e tatau ona avea ma se malaga suesue? Na auina mai oe e le Tama Faalelagi iinei ina ia maua ni aafiaga ofoofogia.”
Sa tilotilo atu Chakell i le tusi sa ia uuina. Sa fiafia o ia e faitau e uiga i malaga suesue. Sa lei mafaufau muamua o ia i le olaga o se malaga suesue.
“Ae e mafai faapefea ona ou lototele pe a ou le iloa le mea o le a tupu?”
“O le mea lena e i ai lo tatou faatuatua.” Na ataata Tina. “O le faatuatua o le faatagaina lea o le Tama Faalelagi e taitaia i tatou ma le iloaina o le a Ia fesoasoani mai ia i tatou ia lototetele. Sa Ia fesoasoani ia te au ia ou lototele i le tele o taimi na ou fefe ai i ni mea fou. Ma o le a Ia fesoasoani foi ia te oe.”
“E mo’i?”
“E mo’i,” o le tali atu lea a Tina. “E mafai ona e tatalo ma ole atu mo se fesoasoani i soo se taimi.”
O lena mea na maua ai e Chakell sina lagona lelei. “Ua lelei.”
A o lei moe o ia, sa tootuli Chakell i ona tulivae ma tatalo. “Faamolemole fesoasoani mai ia te au ia ou lototele,” sa ia musumusu atu ai. “Fesoasoani mai ia te au ia aua nei ou fefe i le lumanai.”
Ina ua uma, sa lagona e Chakell se lagona toafimalie, ma le filemu. Atonu e foliga taufaafefe le lumanai. Ae faatasi ai ma le fesoasoani a le Tama Faalelagi, e mafai foi ona avea o se malaga ofoofogia!
Ata na tusia e Natalie Briscoe