O le Sini e Sili le Matagofie
Sa le mafai ona faatali Tavita e alu i le malumalu o Dubai i se aso.
Sa oomi e Tavita sina kelu i luga o se kupita suka. Ona ia faatulagaina lea ma le faaeteete.
“Oka!” Na fai atu ai Tina. “E foliga ofoofogia lau malumalu kupita suka.”
“Faafetai!” Na fai atu ai Tavita. “O le Malumalu o Dubai. E le mafai ona ou faatali mo le faia o le malumalu moni.”
Sa fiafia lava Tavita talu ona tau mai e Peresitene Nelson se malumalu fou i le atunuu sa nofo ai Tavita. Sa i ai i le Iunaite Arab Emirates nisi o fale aupito sili ona maualuluga i le lalolagi. Ae e le‘i i ai lava se malumalu—i le taimi nei. O le malumalu muamua lea i Sasae Tutotonu atoa.
Sa faamau e Tavita le kupita suka mulimuli i luga o lana malumalu. “A la lea!” na ia fai mai ai. “Ua uma!”
Sa punou ifo Tina ina ia tilotilo lelei atu. “Manaia tele! O fea e tatau ona ta tuuina ai?”
Na mafaufau Tavita. “Ae a totonu o lo‘u potu? I autafa o a‘u nofoaafi.’ Sa fiafia Tavita i nofoaafi. Sa manao o ia e avea ma se inisinia nofoaafi i se aso.
“Manaia le manatu,” o le tala lea a Tina.
Sa ave ma le faaeteete e Tavita lana malumalu kupita suka i lona potu. Sa ia tuuina lemu i autafa o ana faatusa o nofoaafi. Sa le mafai ona faatali o ia e faaali atu i ona tuafafine ma tamā.
O le aso na sosoo ai, na sau ai le tuafafine o le tamā o Tavita o Ana e asiasi mai. Sa la talanoa e uiga i mea sa sili ona ia tulimatai atu i ai. Ona ia mafaufau ai lea i se mea,
“E te fia iloa le mea e sili ona ou fiafia i ai?”Na fesili ai Tavita.
“Ioe!” Sa fai atu ai Aunt Ana.
“O le ekalesia e o i ai lo‘u aiga o le a fauina se malumalu i Dubai!”
Sa ataata Aunt Ana. “E foliga taua tele lena mea.”
“E taua!” Na fai atu ai Tavita. “I le taimi nei, e leai se malumalu mo la matou lotu e lata mai, o lea matou te o ai i se malumalu i Suitiselani po o Siamani. Ou te fiafia o le a i ai se tasi e latalata tele mai ia i matou. Ua ou faatuina se sini e saunia e alu iina.”
“E maeu le manaia!” Sa fai atu ai Aunt Ana. “O le a se mea o e faia e saunia ai?
“Ou te tatalo ma faitau tusitusiga paia,” na fai atu ai Tavita. “Ma ou te taumafai e mulimuli ia Iesu Keriso. Ma o le a ou saunia e alu i le malumalu!”
“Manaia tele,” o le tala lea a Aunt Ana. “Ou te mautinoa o le a e galue malosi e ausia au sini.”
“O le a ou faia!” Sa lue atu le ulu o Tavita ma le fiafia. Sa manaia le lagona o le faasoa atu o se mea e sili ona taua ia te ia.
I lena po, sa fesili atu ai Tavita pe mafai ona ia sii atu lana malumalu kupita-suka i le umukuka.
“Ou te manao e tuu i le mea e mafai ona tatou vaai i ai i taimi uma. Ou te fia manatua pea le saunia pea mo le malumalu.”
“O se manatu manaia tele lena.” na fai atu ai Tamā. “Ou te manatu o le vaai atu i lau malumalu i aso uma o le a fesoasoani foi ia te au.”
Sa fesoasoani Tama ia Tavita e sii atu le malumalu kupita-suka i le umukuka.
“E foliga lelei,” o le tala lea a le tuafafine o Tavita o Kaitlynn.
“Pe a uma le Malumalu moni o Dubai, e mafai ona ou valaaulia a‘u uo e o mai e vaai i ai?” Na fesili ai Tavita.
Sa lue atu le ulu o Tina. “O se manatu manaia tele lena!”
“Ma Aunt Ana?”
“Ae a, e mafai,” o le tala lea a Tama.
Sa ataata Tavita. Sa matuai faafetai lava o ia mo le Malumalu o Dubai!
Ata na tusia e Mark Robison