A‘oga Fou, Uo Fou
E mafai faapefea e Ada ona faia ni uo pe a le mafai ona ia tautala i le faa-Saina?
“Ua ou fefe,” o lana tala lea. O lona aso muamua lea o le aoga i Taiuani. Ae na te lei tautala i le faa-Saina e pei o isi tamaiti aoga. E mafai faapefea ona ia faia ni uo? O ai o le a ia taalo i ai i le taimi o le malologa?
Sa tuu atu e Tina se opo lapo’a ia Ada. “E le afaina le fefe.”
Sa faanonou Ada. “Ou te le iloa pe faapefea ona faia ni uo iinei.”
Sa toe fusi atu e Tina o ia. “Afai e te popole, atonu e mafai ona e mafaufau i se pese a le Peraimeri. O le a fesoasoani lena?”
Sa lue atu le ulu o Ada. Ona la savavali atu lea ma Tina i lona potuaoga. Sa faatalitali lona faiaoga mo ia. “Ni hao!” o le tala lea a le faiaoga. Sa taumafai Ada e ataata. Na te lei iloaina le uiga o na upu.
Sa faatofa atu Ada ia Tina. Ona ia maua lea o se kesi ma nofo i lalo.
Na ia tilotilo atu i isi tamaiti. O nisi o i latou sa talanoa le tasi i le isi. O isi sa saofafai filemu e pei o Ada. Sa popole Ada. Sa pei na feoa’i solo ni lagomeli i lona manava.
Ona vaai lea o Ada i se teineitiiti o tagi. Sa manao Ada e fesoasoani ia te ia. Ae e mafai faapefea ona ia fesoasoani pe a le mafai ona ia tautala i le faa-Saina? Ae faapefea pe afai e le manao le teineitiiti i se fesoasoani?
Ona fai lea e Ada le mea na fai atu ai Tina. Sa ia mafaufau i upu o lana pese Peraimeri e sili ona fiafia i ai: “Ia fealofani e pei ona alofa Iesu ia te oe.” Sa iloa e Ada sa talosagaina o ia e le Agaga Paia e fesoasoani atu.
Sa nofo Ada i autafa o le teineitiiti. Sa ia faauouo mai o ia. Ona ia popo atu lea o lona patua e pei ona sa faia e Tina pe a faanoanoa Ada. Sa le toe tagi le teineitiiti! Sa ia toe fusiina Ada.
Sa tusi atu Ada ia te ia lava. “Ada.”
Sa tusi le teineitiiti ia te ia lava. “Mei,” na ia fai ane ai.
Sa ataata Ada. Sa nofo o ia i talaane o Mei i le aso atoa na totoe. E ui lava la te lei tautatala i le gagana e tasi, ae sa la fiafia faatasi. Sa la aai faatasi i a la meaai. Sa la taaalo faatasi i le malologa. Ma sa fesoasoani Mei ia Ada e aoao ni nai upu fou i le faa-Saina!
Sa le mafai ona faatali Ada e ta‘u atu ia Tina e uiga i lana uo fou. Sa ia iloa afai e mulimuli o ia ia Iesu, o le a le tatau ona fefe o ia i soo se mea.
Ata na tusia e Shawna J. C. Tenney